MIPUM SIARNAK 30
30
Thukam awknak Tuah Tikih Thlun Ding Daan
1Moses in a hnuailam ih daan pawl cu Israel mi hnam tinih hotu pawl hnenah a pek. 2“Mi pakhat in Bawipa ih hnenah thil pakhat pek dingin thu a kam-awk tikah siseh, a si lole thil pakhat tuah lo dingin thu a kam-awk tikah siseh, cuih a thukammi cu a bal sal lo pei. Ka ti ding a timi cu kimtein a tuah thluh pei.
3Fala pakhat in a pa ih innih a um laiah Bawipa hnenih ziangmaw pek dingah thu a kam-aw, a si lole ziangmaw tuah lo dingin thu a kam-awk tikah, 4cuih a thukammi cu a pa in a theih tikah lungkim lonak a neih dah ti lo ahcun a thukammi vekin a thlun thluh pei. 5Asinain a thukammi cu a pa in a theih ih a kham a si ahcun a thlun a ṭul lo pei. A thukammi vekih tuah ding cu a pa in a kham ruangah Bawipa in a ngaithiam ding a si.
6Pasal nei hrih lomi nunau pakhat in, tumtahnak nei fetfet in maw, a si lole tumtahnak mumal nei lem lo in maw, thil pakhatkhat tuah hrimhrim lo dingin thu a kam-awk hnuah pasal a nei ih, 7cumi cu a pasal in a theih tikah a lung a kim loih a kham dah tilo ahcun a thukammi vekin a thlun thluh pei. 8Asinain a thukammi cu a pasal in a thei ih a kham a si ahcun a thlun a ṭul lo pei. Bawipa in a ngaithiam ding a si.
9Nuhmei siseh, leengleh siseh, tuah dingih thu a kam awkmi, a si lole tuah lo dingih thu a kam awkmi cu a thlun thluh pei.
10Pasal a neimi nunau in thil pakhatkhat tuah lo dingih a kammi cu, 11a pasal in a theih tikah a lung a kim loih a kham dah tilo ahcun a thukam vekin a thlun thluh pei. 12Asinain a thukammi cu a pasal in a thei ih a kham a si ahcun a thlun a ṭul lo pei. A pasal in a kham a si ruangah Bawipa in a ngaithiam ding a si. 13Nunau pakhat in siatcam ih thu a kammi, a si lole thu a tiammi kha hngetter ding, a si lole phiatsak dingah a pasal in thu a nei a si. 14Asinain a nupi ih thukammi a theih sunah lungkim lonak zianghman a langter lo ahcun a thukammi vekin a thlun a ṭul a si. A theih vete in a nupi cu a kham lo ruangah a lungkimpi ah a cang. 15Cun a nupi ih thukammi a theih hnupi-ah a bal sak a si ahcun a nupi ih mawhnak cu amah in a tuar pei,” tiah a ti.
16Hi daan pawl cu Bawipa in Moses hnenah pasal neimi nunau in siseh, pasal nei hrih lo a pa ih innih um laimi fala in siseh, thukamnak an tuah tikih thlun dingah a pekmi an si.
Currently Selected:
MIPUM SIARNAK 30: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
