MIPUM SIARNAK 28
28
A Tikcu Caan Ih Thawinak Pekmi Pawl
(Suah 29.38-46)
1-2Israel mi pawl in rimthawmi rawlhun thawinak pawl Bawipa ih hnenah a tikcu kim tikih an pek dingah sim dingin Bawipa in Moses hnenah thu a pek.
3 Bawipa hnenih rawlhun thawinak nan pek dingmi pawl cu hihi an si: nitin mei-ur thawinak hrangah raitluanmi kum khat ti tuucangte pahnih; 4tuucangte pakhat cu zinglamah, a dang pakhat cu zanlam ah, nan pek pei. 5Cumi thawinak thawn hmun khatah fanghun thawinak tla nan pek pei ih olif siti ṭha bik khuat khat thawn rawimi sangphut reeltan a si ding. 6Bawipa hnenih rimthaw thawinak pekmi a si ih Sinai Tlang parih hmaisa bik nan rak thawi bangtuk in hi thawinak cu nitinte meisa ur in thawinak a si. 7Cumi pakhatnak tuucangte pekmi thawn inmi thawinak khal nan pek pei ih sabit khuat khat biakṭheng ah nan toih pei. 8Zinglam thawinak nan pekmi bangtuk in pahnihnak tuucangte cu zanlam ah nan pek pei ih inmi thawinak khal nan pek pei. Himi cu rawlhun thawinak a si ih Bawipa ih hrangah rimthaw a si.
Sabbath Ni Thawinak
9Sabbath ni ah kum khat ti raitluan tuucangte pahnih, thlairawl thawinak hrangah olif siti thawn rawimi sangphut reel khat cu inmi thawinak thawn nan pek pei. 10Hi mei-ur thawinak cu nitinte pekmi fanghun thawinak le inmi thawinak hlei ah Sabbath nitin pekmi thawinak a si pei.
Thlatin Ni Hmaisabik Ah Thawinak
11Thlatin ni hmaisabik ah Bawipa ih hnenah a tanglam pawl cu nan pek pei: cawcangte pahnih, tuucang pakhat, kum khat ti tuucangte pasarih, an zatein raitluan an si pei. 12Cuih tlunah olif siti thawn rawimi thlairawl thawinak, cawcang pakhat ah sangphut reel khat le a tan, tuucang pakhat ah sangphut reel khat thawn, 13kum khat ti tuucangte pakhat ah sangphut reel tan thawn nan pek pei. Hi mei-ur thawinak pawl cu rawlhun thawinak an si ih Bawipa ih hrangah rimthaw an si. 14Felzet ih inmi thawinak pekmi a si ahcun cawcang pakhat ah sabit khuat hnih, tuucang pakhat ah khuat khat le a hrek, kum khat ti tuucangte pakhat ah khuat khat nan pek pei. Kum khat sung thlatin ni hmaisa bikih mei-ur thawinak pek tikah thlun ding daan an si. 15Cun nitin mei-ur thawinakah sabitti an telh ih hlei ah sualthlah thawinak hrangah mecang pakhat pek a si pei.
Thilnu Rawi Lo Puai ih Thawinak
(Pui 23.5-14)
16 Bawipa ih upat cawimawinak ih tuahmi Lantak Puai cu thla hmaisa bik #28.16 thla hmaisa bik: timi hi Hebru ṭong in Nisan a si lole Abib thla an ti ih March thlahrek le April thlahrek a ceem. ni hleili ni ah tuah a si pei. 17Ni hleinga ni ihsin biaknak puai a thok pei ih ni sarih sung a si pei. Cuih sung hmuahhmuah cu thilnu tel lo sang nan ei pei. 18Puai ni hmaisa bik ni ahcun ziang hnaṭuan hman nan ṭuan lo pei. Pathian biak dingah nan pumkhawm sawn pei. 19Mei-ur thawinak pek uhla cumi cu Bawipa hnenih pekmi rawlhun thawinak a si pei: cawcangte pahnih, tuucang pakhat, kum khat ti tuucangte pasarih, an zatein raitluan nan pek pei. 20Fanghun thawinak feltein tuah uhla olif siti thawn rawi uh; cawcang pakhat ah sangphut reel khat le a tan, tuucang pakhat ah reel khat, 21tuucangte pakhat ah reeltan a si pei. 22Cuih tlunah sualthlah thawinak hrangah mecang pakhat nan pek pei ih cuticun misenpi thianhlimnak hrangah mawhnak thawinak cu tuah a si pei. 23Himi cu nitinte tuahmi mei-ur thawinak hlei ah nan pek pei. 24Cubangtuk ṭhiamṭhiam in ni sarih sung Bawipa ih hnenah rawlhun thawinak, a hrangih rimthawmi cu nan pek pei. Himi cu nitinte nan pekmi mei-ur thawinak le inmi thawinak hlei ah nan pek pei. 25Ni sarih ni ah a thianghlim mi pumkhawmnak nan nei pei ih zianghman nan ṭuan lo pei.
Rawllak Puai ih Thawinak
(Pui 23.15-22)
26Nan Rawllak Puai ni hmaisa bik Bawipa hnenih fangthar nan pek tikah Pathian biak dingah nan pumkhawm pei ih zianghman hna nan ṭuan lo pei. 27Bawipa hrangah rimthaw, mei-ur thawinak nan pek pei ih, cawcang pahnih, tuucang pakhat, le kum khat ti tuucangte pasarih, an zatein raitluan an si pei. 28Cumi thawn olif siti rawimi, felteih tuahmi thlairawl thawinak nan pek pei ih cawcang pakhat ah sangphut reel khat le a tan, tuucang pakhat ah reel khat le, 29kum khat ti tuucangte pakhat ah reel tan a si pei. 30Cuih tlunah sualthlah thawinakah mecang pakhat nan pek pei ih cuticun misenpi thianhlimnak hrangih sualthlah thiannak cu nan tuah pei. 31Hi thawinak pawl le inmi thawinak cu nitin nan tuahmi mei-ur thawinak le thlairawl thawinak hlei ah nan pek pei.
Currently Selected:
MIPUM SIARNAK 28: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
