MIPUM SIARNAK 22
22
Moab Siangpahrang In Balaam A Sawm
1Israel mi pawl cu an feh sal ih Jerikho khua ih khatlam ral, Jordan tiva ihsin nisuahnak lam, Moab hmunrawn ah an riak.
2Cule Israel mi pawl in Amor mi tlunih thil an tuahmi pawl kha Moab ram siangpahrang Zippor ih fapa siangpahrang Balak in a hmu ih, 3Israel mi pawl cu an tamzet fawn ruangah amah in siseh, a minung pawl in siseh, an ṭih ngaingai. 4Curuangah Moab mi pawl in Midian mi hotu pawl hnenah, “Cawcang ih hrampi a piat thluh ṭheu vekin hi mi burpi in kan kiangkap cu an ciil siat thluh ding a si ko,” tiah an ti. Cule Siangpahrang Balak in, 5Amaw ram, Eufrates Tivapi kiang Pethor khua ih a ummi Beor fapa Balaam hnenah palai a thlah. Cuih palai pawl hnen ihsin Balak in thu a cah ih, “Miphun phun khat pumpi Izipt ram in an suak ih atu-ah hin an minung pawl cu khuazakipah an darh-aw ih kan ram luah ṭheh an tum a si. 6An minung zat ṭuat tikah in hleih tuk fawn. Curuangah i zaangfah hram awla hi mi pawl hi in ra camsiat sakta aw. Cuticun kan neh ding ih kan ram in kan dawi suak thei ding. Nangmah ih na thluasuahmi cu thluasuah an ngah ih na camsiatmi cu camsiat an si, ti ka thei,” tiah a ti.
7Curuangah Moab hotu pawl le Midian hotu pawl cu camsiat man phalh ding keng in an pok ih Balaam hnen an thleng ih Balak ih thucah mi cu an sim. 8Cutikah Balaam cun an hnenah, “Tuihzan cu hinah riak uhla thaisun ah Bawipa ih i simmi poh cu ka lo theihter hai ding,” tiah a ti. Curuangah Moab mi hotu pawl cu Balaam hnenah cun an riak.
9 Bawipa in Balaam hnen ahcun, “Na hnenih a riakmi pawl hi zoso an si?” tiah a sut.
10Balaam in, “Moab siangpahrang Balak ih palai pawl an si ih, 11Izipt ram ihsin a ra suakmi miphun phun khat an ram ah an khat thluh a si ruangah cumi pawl do tahratih a dawi suaknak dingin camsiat dingah in ra fial a si,” a ti.
12Cutikah Pathian in Balaam hnenah, “An hnenah tel ding na si lo; Israel mi pawl tla na cam lo pei; ziangahtile ka thlawsuah mi an si,” a ti.
13A thaizing ah Balak palai pawl hnenah Balaam cu a feh ih, “Va kir uh; nan hnenih feh ve ding cu Bawipa in i kham a si,” a ti. 14Curuangah Balak hnenah cun an kir ih an hnenih Balaam a tel duh lonak thu cu an sim.
15Cule Balak in hotu thupi deuhdeuh le tam deuh a hei thlah sal. 16An va feh ih Balaam hnen ahcun, “Zaangfahnak in ka hnenih rat ding cu zianghman in lo kham hram hlah seh. 17Laksawng tam ngaingai ka lo pe ding ih na simmi hmuahhmuah ka tuah thluh ding. Ra hramhram awla himi pawl hi ka aiah in camsiat sak aw,” tiah Balak ih thucahmi cu an sim.
18Sikhalsehla Balaam cun, “Balak in a siangpahrang inn sungih a ummi sui le ngun hmuahhmuah i pe hmansehla Bawipa ih thu cu ka el thei lo; thil fate thu hmanah Bawipa ka Pathian ih thupekmi cu ka el thei hrimhrim lo a si. 19Asinain midang bangin tuih zan cu hinah riak uhla Bawipa in thudang sim ding i neih asile tuihzan ah ka thei ding,” tiah a ti.
20Cuih zanah Pathian cu Balaam hnenah a ra ih, “Himi pawl in an hnenih feh ding an ra lo sawm a si ahcun feh dingah na tim tuah aw. Asinain ka lo simmi lawnglawng tuah aw,” tiah a ti. 21Cuhrangah a thaizing cu Balaam in a laak cu a kung a tuah ih Moab hotu pawl hnen ahcun a feh.
Balaam Le A Laak
22Balaam a feh ruangah Pathian cu a thin a heng. Balaam cu a hnen-um pahnih in an thlun ih a laak to in a feh laiah a lamzin kham dingah Bawipa ih vancungmi pakhat a hmaiah a rak ding. 23Balaam ih laak in ralnam a kengtu vancungmi pakhat lamzinih a din kha a hmuh tikah lamzin ihsin a pial ih hram lakah a feh. Balaam in a laak cu a vuak ih lamzin ah a kirter sal. 24Cule vancungmi cu lamzin cepthernak, sabit hmuan pahnih karlak, lungtlap pipi a zin kap hnih ih son awknak hmun ah a rak ding. 25A laak in vancungmi a hmuh tikah a khir ih Balaam ih ke cu lungtlap ah a rialcih. Cutikah Balaam in a laak cu a vuak sal. 26Vancungmi cu hmaiah a rak feh lala ih pial-awk thei lonak lamzin ceprep ah a rak ding. 27Vancungmi a hmuh tikah a laak cu a bok. Balaam in a thin a suup thei nawn lo ih a laak cu a fungin a vuak ciamco. 28Cutikah Bawipa in laak cu a ṭongter ih Balaam hnenah, “Ziang ka lo ti ruangah so voi thum tiangtiang i vuak?” a ti.
29Balaam in a laak hnen ahcun, “Lehnak menih i hman ruangah a si. Ralnam keng ningna cu atu rori-ah ka lo saat that ding naón,” tiah a ti.
30Cutikah laak cun, “Na nun sung tutiang in na to ringringmi laak thotho ka si lo maw? Atu bangtuk in a hlanah ka lo ti dah maw?” a ti.
“I ti dah lo,” tiah Balaam in a sawn.
31Cule Bawipa in Balaam ih mit cu a vangter ih vancungmi pakhat a ralnam thawn a din kha a hmuhter. Cutikah Balaam cu leilung ah a bok. 32Cule vancungmi cun, “Ziangah so hi bangtuk in na laak cu voi thum tiang na vuak? Hi lam feh ding na si lo naón na feh ruangah na lamzin ka lo kham a si. 33Na laak in i hmu ih voi thum tiang a pial a si. Cutiin pial hlah sehla na laak cu ka zuah ding ih nang sawn hi ka lo that zo ding,” tiah a ti.
34Cutikah Balaam in, “Ka sual a si. Ka lamzin i kham ih lamzinih na din kha ka theih lo ruangah a si. Hi lam ka feh vivo hi na lung a kim lo a si ahcun inn ah ka kir ding,” tiah vancungmi hnenah a ti.
35Asinain vancungmi in, “Himi pawl hnenah feh ko aw; asinain sim ding ka lo timi lawng na sim pei,” a ti. Curuangah Balaam cu a ra kotu pawl hnenah a feh sal.
Balak In Balaam A Hmuak
36Balak in Balaam a ra ti a theih tikah a feh ih Moab ramri Arnon Tiva kapih Ar khua in a va hmuak. 37Cutikah Balak in Balaam hnenah, “Ka lo sawm rero naón ziangah so na rat lo? Laksawng ṭhahnem i pe thei lo ding tiih na ruah ruangah maw si?” tiah a ti.
38Cutikah Balaam in, “Atu cu ka ra thleng zo a sihi! Asinain ziang poh sim theinak ka nei lo. Pathian ih i simtermi lawnglawng ka sim ding a si,” a ti. 39Cuticun Balaam cu Balak thawn Kiriath Huzoth khua ah an feh ih, 40Balak in caw le tuu that in thawinak a tuah ih a sa hrekkhat cu Balaam le amah thawn a ummi hotu pawl a pek.
Balaam Ih ṭongmi Voi Khatnak
41A thaizing ah Balak in Balaam cu Bamoth Baal tlang ah a fehpi. Cutawk ihsin Balaam in Israel mi burpi umnak hmuahhmuah cu a hmu thei a si.
Currently Selected:
MIPUM SIARNAK 22: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
