MIPUM SIARNAK 21
21
Kanaan Mi An Neh
1Kanaan ram thlanglam kapih a ummi Kanaan siangpahrang Arad in Israel mi pawl Atharim lam in an ra ti a theih tikah a rak do ih a hrekkhat cu a kai. 2Cutikah Israel mi pawl in Bawipa ih hnenah, “Hi miphun pawl hi in nehter a si ahcun anmah siseh an khua pawl siseh, nangmah hnenah kan lo hlan thluh ding ih kan siatsuah thluh ding,”#21.2 hlan thluh ding ih siatsuah thluh ding: timi cu Pathian hnenih pek thluhmi cu hman ding a si nawn lo, siatsuah thluh ding a si tiin an rak zum. tiah siatcam in thu an kam. 3Cumi cu Bawipa in a thei ih Kanaan mi pawl cu a nehter. Curuangah Israel mi pawl in Kanaan mi pawl cu an that thluh ih an khua pawl khal an siatsuah thluh. Cuih hmun cu Hormah #21.3 Hormah: timi cu Hebru ṭong a si ih Siatsuahnak tican a si. tiah an ko tata.
Daar Ih Tuahmi Rul
4Israel mi pawl cu Hor Tlang ihsin an feh ih Edom ram heel in Tipi Sen#21.4 Tipi Sen: timi hi a sim duh mi cu Aqaba Tipi a si sawn, tiin zumnak a um. lamin an feh. Asinain lamlakah an thin a ṭeu ih, 5Bawipa le Moses an thangsiat. “Hitawk hmun, tidai le rawl um lonak ih thi dingah hin ziangah so Izipt ram ihsin in suahpi? Hi rawl siava pawl cun in ning tuk zo a si!” an ti. 6Cutikah Bawipa in micuk hrang tur neimi rul pawl an lakah a suahter ih Israel mi tampi an cuk ih an thi. 7Misenpi cu Moses hnenah an ra ih, “Bawipa le nangmah kan lo dodal hi kan sual a si. Hi rul pawl hi cemter dingin Bawipaói hnenah in dilsak hram aw,” tiah an ti. Cutikah Moses in misenpi hrangah thla a cam. 8Cule Bawipa in Moses hnenah, “Rul tuah awla ṭhuam parah thlai aw. Rul ih a cukmi hmuahhmuah in cumi an zoh asile an nung ding,” tiah a ti. 9A ti bangtuk cun Moses in daar rul cu a tuah ih ṭhuam parah a thlai. Rul cukmi pawl cuih daar rul zohtu hmuahhmuah in an nung.
Moab Phairawn An Thleng
10Israel mi pawl cu an feh sal ih Oboth ah riahhmun an khuar. 11Cule Oboth ihsin an feh sal lala ih Moab ram ihsin nisuahnak lam nelrawnih a ummi Iye-Abarim ah riahhmun an khuar. 12Cutawk ihsin an pok sal ih Zered Phairawn ah riahhmun an khuar. 13Zered Phairawn ihsin an feh sal lala ih Amor ramri tiang a kaumi nelrawn ah an thleng ih Arnon tiva saklam ah riahhmun an khuar. Arnon cu Moab mi le Amor mi pawl ih ramri a si. 14Curuangah Bawipa Raldonak Cabu sungih: “Sufah pengah Waheb khua le a phairawn, Arnon Tiva le phairawn pawl; 15horkuam lo tlang pawl in Ar khua tiang, Moab ramri tiangin,” tiih a umnak cu a si.
16Cutawk in an feh ih Bawipa in Moses hnenah, “Miseenpi pawl cu kokhawm awla tidai ka pek hai ding,” a tinak Tikhur timi hmun ah an riak. 17Cuih caanah cun Israel mi pawl in a tanglam hla hi an sak:
“Maw tikhur, na tidai suah awla,
Hla in kan lawm ding.
18Hi tikhur cu lal pawl le,
Mi hotu pawl ih laihmi a si.
Lal pawl in an fung an hmangih,
Hotu pawl in an kianghrol an hmang a si,” tiin an sak.
Cuih phairawn ihsin Mattanah ah an ṭhawn ih, 19cutawk ihsin Nahaliel ah, Nahaliel ihsin Bamoth ah, 20cule Bamoth ihsin Moab ram phairawn Pisgah Tlang zik hnuai nelrawn vun hmuh theinak ah an ṭhawn.
Siangpahrang Sihon Le Og An Neh
(Daan 2.26—3.11)
21Cule Israel mi pawl cun Amor siangpahrang Sihon hnenah palai an thlah ih, 22“Na ram sungin in fehter hram aw. Kanmah siseh, kan ṭilva siseh, lamzinpi in kan pial lo ding. Na lo ah siseh, na sabit hmuan ah siseh, kan lut lo ding. Na tikhur ih tidai khal kan in lo ding. Na ram kan lan lai hlan lo lamzinpi lawnglawng in kan feh ding,” tiah an sim. 23Sikhalsehla Sihon in Israel mi pawl ih a ram an pal ding cu a siang lo. A ralkap pawl a kokhawm ih Jahaz phairawn ah an feh ih Israel mi pawl cu an do. 24Asinain an do awknak ah Israel mi pawl cun tampi an that ih an ram cu Arnon Tiva in saklam ih Jabbok tiang, cuti cun Ammon ramri tiang, an lak ṭheh. 25Cutiin Israel mi pawl in Amor mi ih khawpi pawl, Heshbon le a kiangih khua pawl tla an lak ih an luah ṭheh. 26Heshbon cu Amor siangpahrang Sihon umnak khawpi a si. Sihon cu a hlanih Moab siangpahrang a rak nehtu le a ram hmuahhmuah Arnon Tiva tiang a rak long ṭhehtu a si. 27Curuangah hla phuahtu pawl in:
“Heshbon ah ra uh, Sihon khawpi ah,
Din salmi khawpi ah cang seh.
28Hi Heshbon khawpi in an rak suak,
Meisa bangin Sihon ralkap pawl cu,
Moab mi khawpi Ar an siatsuah,
An ur ṭheh Arnon hmunsang pawl cu.
29Riahsiatza nan si, Moab mi pawl,
Nan cem a si, Khemosh betu pawl.
Nan khawzing in a faale pawl cu
raltlan ah a lo canter ih,
Nunau pawl cu Amor siangpahrang sal ah
a lo canter a si.
30Atu-ah an tefa pawl cu siatsuah thluh an si,
Heshbon in Dibon thleng tiang,
Nashim in Medeba kiang Nofah khua tiang,” an ti.
31Cuticun Israel mi pawl in Amor mi pawl ih ram cu an luah ih an um. 32Cule Moses in Jazer khawpi donak lamzin zohtu dingah mi a thlah. Israel mi pawl cun Jazer khawpi le a kiangkapih khua pawl cu an neh ih cutawkih a ummi Amor mi pawl cu an dawihlo ṭheh.
33Cule Israel mi pawl cu an kir ih Bashan lamah an feh. Cutikah Bashan siangpahrang Og cu Israel do dingah a ralkap thawn Edrei ah ṭanhmun an khuar. 34Bawipa in Moses hnenah, “Hi siangpahrang cu ṭih hlah. Amah le a minung pawl le a ram tlunah nehnak ka lo pe ding. Heshbon bawi, Amor miphun siangpahrang Sihon hnenih na tuah vekin hi Bashan siangpahrang Og tlun khalah na tuah ding,” tiah a ti. 35A ti vek cun Israel mi pawl in Og le a fapa pawl le a ramsung minung, pakhat hman taang loin an that ṭheh ih an ram cu an luah ṭheh a si.
Currently Selected:
MIPUM SIARNAK 21: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
