MIPUM SIARNAK 23
23
1Cutikah Balaam in Balak hnenah, “Hitawk ah ka hrangah biakṭheng pasarih in dawl awla cawcang pasarih le tuucang pasarih i rak ken aw,” tiah a ti.
2A sim vekin a tuah ih Balak le Balaam in biakṭheng pakhat ah cawcang pakhat le tuucang pakhat fingfing biakṭheng pasarih ah thawinak an pek. 3Cule Balaam in Balak hnenah, “Na mei-ur thawinak kiangah hin rak ding hrih awla kei cu Bawipa in i tong duh maw tong duh lo ka va hliahta hrih pei. Bawipa in ka hnenih a langtermi hmuahhmuah cu ka lo sim ding,” tiah a ti. Cule Balaam cu tlang parah a feh ih, 4Pathian in Balaam cu a tong. Balaam in, “Biakṭheng pasarih ka dawl zo ih pakhat parah cawcang pakhat le tuucang pakhat fingfing ka thawi a si,” tiah a ti.
5Cutikah Bawipa in, “Balak hnenah kir awla ka thucahmi va sim aw,” a ti. 6Curuangah Balaam cu a kir ih Balak cu a mei-ur thawinak kiangah Moab mi hotu pawl thawn a rak din hrih kha a hmu.
7Cule Balaam in a tanglam vekin profet ṭongkam in a ṭong:
“Moab siangpahrang Balak in i ko,
Aram#23.7 Aram: timi hi khuahlan hmin a si. Tuihsan hmin cu Siria ti a si. le nisuahnak lam tlang ihsin,
‘Ka aiah ra sim aw,’ i ti,
‘Israel mi pawl camsiat aw,’ i ti.
8Pathian ih camsiat lomi
ziangtinso ka camsiat thei ding?
Pathian ih camriam lomi
ziangtinso ka camriam thei ding?
9Lungpi tlangsaang in anmah cu
ka cuan,
Tlangzik par ihsin anmah ka hmu.
Anmahte a nungmi miphun an si,
Miphun dang lakah
a siarcih awmi an si lo.
10Jakob ih tefa pawl cu vunnel
zat an si,
Israel cithlah pawl cu
siar cawk an si lo.
Pathian ih minung bangin
ka nunnak ni cu liamseh,
Miding bangin daihnak in
thi ning law,” tiah a ti.
11Cutikah Balak in Balaam hnenah, “Ka parih na thil tuahmi hi ziangvek so a si? Ka ral pawl camsiat dingah hinah ka lo ko. Asinain anmah riangri thlawsuah na pek,” a ti.
12Cule Balaam in, “Keiih ka simmi cu Bawipa in sim dingih i fialmi lawng a si,” tiah a ti.
Balaam Ih ṭongmi Voi Hnihnak
13Cun Balak in Balaam hnenah cun, “Ra awla Israel mi hrekkhat lawng na hmuh theinak hmunah kan feh pei. Cutawk ihsin ka aiah camsiat hai aw,” a ti. 14Balak in Balaam cu Pisgah Tlang zik, Zofim ih lo ah a fehpi. Cutawk ahcun biakṭheng pasarih a dawl ih biakṭheng pakhat parah cawcang pakhat le tuucang pakhat fingfing thawinakah a pek.
15Cule Balaam in Balak hnenah, “Hitawk na mei-ur thawinak kiangah rak ding awla khitawk ah Pathian ka va tong ta pei,” tiah a ti.
16 Bawipa in Balaam cu a tong ih a ṭong dingmi pawl cu a sim ih Balak sim dingah a kirter. 17Balaam cu a kir ih Balak a mei-ur thawinak kiangah Moab mi hotu pawl thawn a din hrih kha a hmu. Cutikah Balak in, “Bawipa in ziang a ti so?” tiah a rak sut. 18Balaam cun a thok ih profet ṭongkam in hiti in a ti:
“Ra aw, Zippor fapa Balak, ra aw,
Ka sim dingmi hi ra ngai hnik aw.
19Pathian cu thuphan per hmang
milai vek a si lo,
A thinlung a thleng leuhleuhmi
milai vek khal a si lo.
A tiamkammi hmuahhmuah cu
a tuah suak,
A ṭong ih tuah thluh an si.
20Thlawsuah pek ding lawng hi
in fialmi a si,
Pathian in thlawsuahnak
a pek zo ih
ka khir sal thei nawn lo.
21Israel mi pawl hmailamih an
fehnak dingah,
Vanduainak le harsat tonnak
ding ka hmu lo.
Bawipa an Pathian cu
an hnenah a um ih,
Pathian cu an Siangpahrang ah
an aupi a si.
22Pathian in Izipt ram ihsin
a suahpi hai ih,
An hrangah cawcang hraang bangin
a ṭang a si.
23Dawi siseh polsia siseh a um lo,
Israel miphun dodal ding ahcun.
Miphun pawl in Israel an hmuh
tikah,
‘Zohhnik uh, Pathian thiltuah hi,’
an ti ding.
24Israel miphun cu a cakzetmi
kiosa vek a si,
A deh ciami sa a bauh thluh le
a ei thluh hlan lo,
A thisen a in thluh hlan lo cu
colh ti a nei lo,” a ti.
25Cutikah Balak in Balaam hnenah, “Israel mi pawl camsiat ding cu na el thla rori a sihi! Sikhalsehla thlawsuahnak tal cu pe loin um aw,” a ti.
26Asinain Balaam cun, “Bawipa ih i fialmi lawnglawng ka tuah ding, tiah ka lo sim cia zo lo maw?” tiah a ti.
Balaam Ih ṭongmi Voi Thumnak
27Balak in Balaam hnenah, “Ka hnenah ra awla hmun dangah ka lo fehpi ding. Cutawk ihsin cun ka ai-ih Israel mi pawl camsiat dingah Bawipa in a lo siang khal a si thei men,” a ti. 28Curuangah Balak in Balaam cu nelrawn hmuh theinak Peor Tlang zik ah a fehpi. 29Cule Balaam in Balak hnenah, “Ka hrangah biakṭheng pasarih hitawk ah dawl awla cawcang pasarih le tuucang pasarih i rak ken aw,” a ti. 30A tivek cun Balak in a tuah ih biakṭheng pakhat parah cawcang pakhat le tuucang pakhat fingfing thawinakah a pek.
Currently Selected:
MIPUM SIARNAK 23: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
