MIPUM SIARNAK 20
20
Kadesh Ah Lungpi Sungin Tidai A Suak
(Suah 17.1-7)
1Thla hmaisabik ah#20.1 Thla hmaisa bik: timi hi Hebru mi pawl in Nisan an ti ih March thlahrek le April thlahrek a ceem. Israel misenpi pawl cu Zin nelrawn an thleng ih Kadesh ah riahhmun an khuar. Cutawkah Miriam cu a thi ih an phum.
2Cule misenpi hrangah tidai a um lo ruangah Moses le Aaron hnenih phunzai dingin an tongkhawm aw ih, 3“Hitiih si hnak cun kan unau Israel mi hrekkhat pawl thawn Bawipa ih Puanthlam hmaiah khan thi ve nungla a ṭha sawn ding naón! 4Ziangah so hi bangtuk ramṭhing ah hin in thlenpi? Hitawkih kan ṭilva pawl thawn thi dingah maw? 5Zianghrangah so hivek ram ṭha lo, zianghman a khoh thei lonak ramih hruai dingah cun Izipt ram ihsin in suahpi? Hinah zianghman a um lo: fang le theipi, sabit le taleti tla a um lo! Tidai in ding rengreng hman a um lo!” tiah an phunzai ciamco. 6Cutikah misenpi hmai ihsin Moses le Aaron cu an ṭhawn ih Puanthlam sangka hmaiah an ding. Cutawkah leilung ah an bok ih an hnenah Bawipa ih huham tleu cu a rung lang.
7 Bawipa in Moses hnenah, 8“Thukam Kuang hmaiih a ummi kianghrol kha la awla nangmah le na u Aaron in misenpi pawl cu kokhawm uh. Cutawkah misenpi hmuh hngan rori ahcun khitawk ih a ummi lungpi khi tidai suak dingin sim uhla tidai a suak ding. Cuticun khi lungpi sungin tidai na suakter ding ih misenpi siseh, an ṭilva pawl siseh, tidai an in ding,” tiah a ti. 9Curuangah Moses cu Bawipa thupeknak bangtuk in a feh ih kianghrol cu a lak.
10Moses le Aaron in Israel misenpi pawl cu lungpi hmai ahcun an kokhawm ih Moses in, “Ngai uh, nannih raltho pawl! Nanmah ih hrangah a si lo maw hi lungpi ihsin tidai suahter rero a ṭul cu?” a ti ih, 11Moses in a kianghrol cu a thlir ih lungpi cu voihnih a vuak. Cutikah tidai cu a puut zurzo ih misenpi le ṭilva pawl cun an in.
12Sikhalsehla Bawipa in Moses le Aaron cu, “Ka thianhlimnak huham nan zum kim lo ruangah Israel misenpi hmaiah tlamtling in in upat lo; curuangah hi misenpi pawl pek dingih ka tiammi ram ah nannih in nan hruai suak hai lo ding,” tiah a ti.
13Cuih hmun cu Israel mi pawl in Bawipa hnenih an phunzainak le Bawipa in a thianhlimnak huham a langternak a si ruangah Meribah #20.13 Meribah: timi cu Hebru ṭong in Phunzainak tican a si. tiah an ti.
Edom Siangpahrang In A El
14Moses in Kadesh ihsin Edom siangpahrang hnenah palai a thlah. Cuih palai pawl in Edom siangpahrang hnenah, “Na unau Israel hrin pawl in thu an lo cah. Ziangtluk in harsatnak kan tong ti cu na thei thluh ko. 15Kan pu le kan pa pawl cu Izipt ramah an feh ih kum reipi an vung um. Izipt mi pawl in kan pupa le kanmah pawl in tisiat tuk ruangah, 16Bawipa ih hnenah bomnak dil in kan au. Kan aunak in thei ih vancungmi pakhat a run thlah ih Izipt ram in in suahpi. Atu-ah cun na ramri kiangih Kadesh khua ah kan um. 17In zaangfah awla na ram sungin in fehter siang hram aw. Kanmah siseh, kan ṭilva pawl siseh, lamzin ihsin zinsak zinthlangah kan pial lo ding. Nan lo ah siseh, nan sabit hmuan khal ah siseh, kan lut lo ding. Cun nan tikhur pawl ih tidai khal kan in hrimhrim lo ding. Na ram sung ihsin kan liam hlan lo lamzinpi lawnglawng kan zawh ding, an ti a si,” tiah an sim.
18Asinain Edom mi pawl cun, “Kan ram cu a pal in nan pal hrimhrim lo pei. Nan pal a si ahcun kan ra suak pei ih kan lo do ding a si,” an ti.
19Cutikah Israel mi pawl cun, “Lamzinpi lawnglawng kan zawh ko ding. Kanmah in siseh, kan ṭilva pawl in siseh, nan tidai kan in pang a si khalle a man kan kuan ko ding. Nan ram voikhat pal phahte lawng khi kan lo dilmi cu a si,” an ti.
20Edom mi pawl cun, “Kan ram nan pal thei lo,” an ti ih Israel mi pawl do dingah an ralkap tamzet, hriamnam ṭhazet thawn an pok. 21Cutiin Edom mi pawl ih an ram pal an sian lo ruangah Israel mi pawl cu an kir ih lamzin dang an thlun.
Aaron A Thi
22Israel mi pawl cu Kadesh hmun ihsin an pok ih Edom ramri kiangih ummi Hor Tlang an thleng. 23Cutawk ahcun Bawipa in Moses le Aaron hnenah, 24“Aaron cu Israel mi hnenih pek dingah ka tiammi ram a thleng lo ding. Ziangahtile nan pahnih in Meribah ah ka thupekmi nan thlun duh lo ih in dodal ruangah Aaron cu a thi ding. 25Aaron le a fapa Eleazar cu Hor Tlang ah fehpi awla, 26Aaron ih puithiam thilthuam cu hlit awla Eleazar hrukter aw. Aaron cu khitawk ah a thi ding,” tiah a ti. 27Bawipa ih a ti vek cun Moses in a tuah ṭheh. Misenpi hmuhah Hor Tlang cu an kai ih, 28Moses in Aaron ih puithiam thilthuam cu a hlit sak ih Eleazar a hrukter. Cule Aaron cu cutawk tlangpar ahcun a thi ih Moses le Eleazar cu an rung kir. 29Israel misenpi in Aaron a thih an theih tikah an zatein ni sawmthum sung mithi ngai in an um.
Currently Selected:
MIPUM SIARNAK 20: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
