PUITHIAM HNAṬUANNAK 5

Ziangtik ah so Sualthlah Thawinak Tuah A ṭul?

1A hnuailam sualnak pawl hrangah sualthlah thawinak a ṭul a si.

Zokhal a hmuhmi le a theihmi sim dingah thurelnak hmun ah an ko ih a sim a rel duh lo ahcun amah in mawh a phur ding ih hrem a tuar ding.

2Zokhal tumtah hrimnak nei loin, saruak tivek pawl, a thiang lomi a tham pang a si ahcun amah cu mithiang lo a si ih a thil tuahmi a theih vete in mawh a phur ding.

3Zokhal tumtah hrimnak nei loin, minung ih thianhlim lonak a tham pang asile, ziangvek thianhlim lonak a si hmanah, a theih vete in mawh a phur ding.

4Zokhal a sia le a ṭha ruatta loin siatcam in thu a kam zuatzo a si ahcun, ziangvek thu a si hmanah, a tuahmi a theih vete in mawh a phur ding.

5Hi thu pakhatkhat ah mi pakhat cu mawhphurtu a si tikah a mawhnak cu a phuang tengteng pei; 6cule sualthlah thawinak hrangah Bawipa hnenah tuu siseh, me siseh a nu pakhat a pek pei. A sualthlahnak hrangah puithiam in thawinak a tuah sak pei.

7Tuu siseh me siseh a pek thei lo a si ahcun, a sualthawinak hrangah thuro pahnih a si lole laileng pahnih Bawipa hnenah a pek pei; pakhat cu sualthlah thawinak hrangah a si pei ih a dang pakhat cu mei-ur thawinak hrangah a si pei. 8Puithiam hnenah a rak keng pei ih puithiam in a hmaisaah vate pakhat cu sualthlah thawinakah a pek pei. A lu dircat lo tein a hngawng a merh pei ih, 9a thisen hrekkhat cu biakṭheng kapah a theh pei. A taangmi a thisen cu biakṭheng hramah a thlerh pei. Hi thawinak cu sualthlahnak hrangah a si. 10Cun a pahnihnak vate cu mei-ur thawinak hrangah, daan bangtuk in, puithiam in a pek pei. Cubangtuk in mi pakhat sual ruangah puithiam in thawinak a pek pei ih a sualnak cu ngaithiam a si ding.

11Cun cupa in thuro pahnih a si lole laileng pahnih khal a pek thei lo a si ahcun a sualthlah thawinak hrangah sangvut phut rel khat a keng pei. Thlairawl thawinak si loin sualthlah thawinak a si ruangah olif siti a toih lo pei ih rimhmui khal a rawi lo pei. 12Sangphut cu puithiam hnenah a keng pei ih Bawipa hnenah kimtein pek ṭheh a si ti langternak ah puithiam in zate-khat a lak pei ih biakṭheng parah a ur pei. Himi cu sualthlah thawinak a si. 13Cu bangtuk in cupa ih sualnak ruangah puithiam in thawinak a pek pei ih a sualnak cu ngaithiam a si ding. Thlairawl thawinak vek thotho in a taangmi sangphut cu puithiam ih ta a si.

Mawhnak Hrang Thawinak

14Hi daan pawl cu Bawipa in Moses hnenah a pek. 15Zokhal sual tumtahnak a nei lo naón Bawipa hnenih pek dingmi thil thiang pawl #5.15 Bawipa hnenih pek dingmi thil thiang pawl timi ih ahhin: (1) Thlaithar hmaisa bik, (2:14; 23:9-14), (2) ṭilva hmasa bik hrinmi, (27:26-27), (3) ṭhenhra ih ṭhenkhat, (27:30-33), (4) Thutiam-awknak ruangih pek dingmi, (27:1-25), le (5) Pathian hnenih pekmi pawl (27:28-29; Mipum 30:1-16) tla an tel. a pek lo a si ahcun a mawhnak thawinak hrangah raitluan tuucang pakhat Bawipa hnenah a pek pei. A man cu upa pawl ih khiah vekin a si pei. 16A pek lomi Bawipa ih thil thiang pawl cu a kuan sal pei ih cuih tlunah a hlei in zateek kul a kuan pei. Tuucang cu puithiam hnenah a pek pei ih cupa ih mawh ruangah puithiam in thawinak a pek pei ih a mawhnak cu ngaithiam a si ding.

17Mi pakhatkhat in tumtah hrimnak nei loin Bawipa ih thukham pakhatkhat a buar pang ahcun thil sual a si ti a theih lo hmanah a sual man a tuar ding. 18Puithiam hnenah mawhnak thawinak hrangah raitluan tuucang, a si lole mecang a pek pei. A man cu upa-ih an khiah vekin a si pei. Cupa ih mawhnak ruangah puithiam in thawinak a pek pei ih amah cu ngaithiam a si ding. 19Himi cu Bawipa parih a sual ruangah cawhkuannak ih thawinak pekmi a si.

Currently Selected:

PUITHIAM HNAṬUANNAK 5: FCL

Highlight

Copy

Compare