PUITHIAM HNAṬUANNAK 6

1 Bawipa in a tanglamih daan pawl hi Moses hnenah a pek. 2Mi pakhat hnenah a rualpi in sumsaw a ret ih a kiltu in a pek sal duh nawn lo ah siseh, a rualpi hnen ihsin thil a ruk ah siseh, a innhnen kha a bum ah siseh, 3thil hlomi a sar naón ka sar lo a si tiih a pheh ih siatcamnak a tuah ah siseh, Bawipa ih hmaiah misual a si ih thawinak a pek a ṭul a si. 4-5Hi bangtuk in a sual asile a dik loih a ngahmi a si hrangah a kuan sal tengteng pei. A mawh a si tiih an theih ni-ah a neitu pa hnenah kimtein a rulh thluh ih tlunah a hlei in zateek kul a bet pei. 6A sualthlah thawinak hrangah puithiam hnenah raitluan tuucang asilole mecang a keng pei. A man cu upa pawl ih khiahmi bangtuk in a si pei. 7Cupa sual ruangah thawinak cu puithiam in a pek pei ih ngaithiam a si ding.

Mei-ur Thawinak

8 Bawipa in, 9Aaron le a fapa pawl ih mei-ur thawinak an pek tikah a tanglam daan pawl hi thlun dingah Moses hnenah thu a pek. Mei-ur thawinak cu zanvarte biakṭheng parah taanta ding a si ih meisa khal mit loin alhter ringring ding a si. 10Cun puithiam in a bawngbi tawite le a kor fualpi a hruk hnuah biakṭheng parih mei-ur thawinak vutcam cu a lak pei ih biakṭheng ih kapah a ret pei. 11Cuih hnuah a hnipuan a thleng pei ih vutcam cu an riahnak leng hmun thiangah a va ret pei. 12Biakṭheng parih meisa cu alhter ringring ding a si ih a mit dah hrimhrim lo pei. Zingtin tein puithiam in zanthing a beet pei ih mei-ur thawinak a timtuah hnuah remnak thawinakih sathau cu a ur pei. 13Biakṭheng parih meisa cu mit dah hrimhrim loin alhter ringring ding a si.

Thlairawl Thawinak

14Thlairawl thawinak hrangih daan pawl cu a tanglam bangtuk in a si. Aaron hrin a si mi puithiam in thlairawl thawinak cu Bawipa hnenah biakṭheng hmaiah a tuah pei. 15A zatein Bawipa hnenih pekmi a si, ti langternak ah sangphut zate-khat le siti le rimhmui a zatein a lak pei ih biakṭheng parah a ur pei. Hi thawinak cu Bawipa hnenah a rim a thawmi thawinak a si. 16A taangmi hmuahhmuah cu puithiam pawl in an ei pei. 17Thilnu tel loin an rawh pei. Himi cu mei-ur thawinak sung ihsin puithiam covo si dingah Bawipa ih pekmi a si. Sualthlah thawinak le mawhnak thawinak bangtuk ih a thiang zetmi a si. 18San khat hnu san khat Aaron hrin mipa hmuahhmuah in Bawipa hnenih thawinak pekmi rawl cu kumkhuain an covo a si ruangah an ei thei pei. Mi pakhatkhat, a si lole thil pakhatkhat, in Bawipa hnenih pekmi rawl cu a dai asile a thianhlimnak in a daitu cu a siatsuah ding a si.

19 Bawipa in a tanglam daan pawl cu, 20Aaron hrin puithiam pawl hriakculh an ngah tikih thlun dingah Moses hnenih a pekmi an si. Hriakculh an ngah ni-ah Bawipa hnenah sangphut reel khat an pek pei; nitin thlairawl thawinakih pekmi zat in a si ding; zinglamah a hrek, zanlam ah a hrek an pek pei. 21Siti thawn an rawi pei ih uhkang sungah an reu hnuah an deng pei ih thlairawl thawinakih pekmi a si ding. Cumi cu Bawipa ih hrangah rimthaw a si. 22San khat hnu san khat, Aaron hrinih Puithiam Sang a ṭuan tinte hi thawinak cu a tuah ringring pei. Cuih thawinak cu cem ko ih urmi Bawipa hnenih thawinak a si pei. 23Puithiam ih a pekmi thlairawl thawinak cu malte hman ei loin a zatein ur ṭheh a si pei.

Sualthlah Thawinak

24Aaron le a fapa pawl in, 25a tanglam ih daan pawl cu sualthlah thawinak an pek tikah an thlun dingin Bawipa in Moses hnenah thu a pek. Sualthlah thawinak hrangih sa an thah tikah mei-ur thawinakih an pekmi sa pawl an thahnak, biakṭheng ihsin saklam kapah an that pei. Hi sualthlah thawinak cu a thiang zetmi a si. 26Hi thawinak a petu puithiam in thawinakih pekmi sa cu, Bawipa umnak Puanthlam kulhsung, hmun thiang sungah a ei pei. 27Mi pakhatkhat, a si lole thil pakhatkhat in hi thawinak sa cu a dai pang asile sa thianghlim a dai ruangah siatsuahnak a tong ding. Cun hi sathi in hnipuan a hnih pang a si ahcun acuih hnipuan cu hmun thiang sungah sawp ding a si. 28Hi sa suannak ah tlak ih tuahmi beel an hman ahcun acuih beel cu khuai thluh ding a si. Asinain thir beel an hman a si ahcun napi in an rawt pei ih tidai in an tlengfai pei. 29Puithiam ih sungkhat mipa pawl cun hi sa cu an ei thei ve ding. Hi sa cu sa thianghlim a si. 30Sikhalsehla sualthlahnak dingah tiah sathi hrekkhat cu Puanthlam sungih an thlenpi a si ahcun acuih thawinak sa cu ei a si hrimhrim lo pei; meisa in ur ṭheh a si pei.

Currently Selected:

PUITHIAM HNAṬUANNAK 6: FCL

Highlight

Copy

Compare