PUITHIAM HNAṬUANNAK 4
4
Sualthlah Thawinak
1-2Mi pakhatkhat a sual ih Bawipa ih thukham a buar pang a si ahcun, a hnuailam ih daan pawl cu thlun tengteng dingah Israel mi hnenih sim dingah Bawipa in Moses cu thu a pek.
3Hriakculh Puithiam Sang a sual ih Israel mi hnenih mawhnak a thlenter a si ahcun, a sual thlahnak ah raitluan cawcang a keng pei ih Bawipa ih hnenah thawinak a tuah pei. 4A cawcang cu Bawipa umnak puanthlam sangka ah a hruai pei, a caw lu parah a kut a suang pei-ih Bawipa hmaiah cutawk ahcun a that pei. 5Cule cuih puithiam cun a caw-ih thisen hrekkhat a lak pei ih Puanthlam sungah cun a fehpi pei. 6A cuih thisen sungah a mehtok kutzung a hnim pei ih a thiangmi puanzar ih hmaiah voi sarih tiang thisen cu a theh pei. 7Cule Puanthlam sungih rimhmui urnak biakṭheng ki pawl parah acuih thisen hrekkhat cu a hnih pei ih a taang hrihmi thisen cu Puanthlam sung vung lutnakih a ummi mei-ur thawinak hrangih hmanmi biakṭheng hram ah a thlet thluh pei. 8Hi caw-ih thau hmuahhmuah, a sungril pawl ih thau le, 9a kaileng pawl le a kaileng parih a kopmi thau pawl le a thinhnun parih thau tla a phorh thluh pei. 10Remnak thawinak hrangih cawcang an thahmi a thau an lak thluh ih an ur vekin puithiam in hi cawcang ih thau cu a lak pei ih mei-ur thawinak biakṭheng parah a ur pei. 11Sikhalsehla a vun, a sa hmuahhmuah, a lu, a ke pawl le a sungril hmuahhmuah a lak pei ih, 12an riahnak hmun ihsin hnarpawn vutcam an thletnak hmun thiangfai ih thingpen parah a ur pei.
13 Bawipa ih thukham buar pangih Bawipa hmaiih a sualtu cu Israel mipi an zate an si ahcun, 14an sualnak cu theih a si vete in an sualthlah thawinak hrangah cawcangte pakhat an keng pei; Bawipa umnak Puanthlam ah an keng pei ih, 15Israel mi hotu pawl in a lu parah an kut an suang pei ih cutawkah an that pei. 16Hriakculh Puithiam in caw thisen hrekkhat cu Puanthlam sungah a keng pei ih, 17thisen sungah a mehtok zung a hnim hnuah puanzar ih hmaiah voi sarih tiang a theh pei. 18A thisen hrekkhat cu Puanthlam sungih ummi rimhmui urnak biakṭheng ih ki pawl parah a hnih pei ih, a taangmi thisen cu Puanthlam sung luhnak ih a ummi mei-ur thawinak biakṭheng hramah a thle thluh pei. 19Cule a thau hmuahhmuah a lak pei ih biakṭheng parah a ur pei. 20Sualthlah thawinak cawcang a tuah vekin hi cawcang khal cu Israel mi sualnak ruangah puithiam in thawinak a tuah pei ih ngaithiam an si ding. 21Amah puithiam sualthlahnak cawcang a tuah vek thotho in hi cawcang khal cu a lak pei ih an riahnak ihsin hnarpawn ah a fehpi pei ih a ur pei. Himi hi misenpi sualthlahnak hrangih thawinak a si.
22 Bawipa ih thukham cu ram uktu in a buar ih a sual pang a si ahcun, 23a sualnak a theih awk vete in raitluan mecang pakhat thawinak hrangah a keng pei. 24Mecang ih lu parah a kut a suang pei ih mei-ur thawinak sa an thahnak, biakṭheng ih saklam kapah a that pei. Himi cu sualthlahnak hrangih thawinak a si. 25Mecang ih thisen cu puithiam in a mehtok zungin a vun tok pei ih biakṭheng ih ki pawl parah a hnih pei. A taangmi thisen cu biakṭheng hramah a thlet thluh pei. 26Cun remnak thawinakih an thahmi ṭilva-ih thau pawl a ur vekin mecangih thau hmuahhmuah cu biakṭheng parah a ur pei. Cubangtuk in hotu ih sualnak ruangah puithiam in thawinak a pek pei ih hotu cu ngaithiam a si ding.
27Israel mi lakah mi pakhatkhat tumtahnak zianghman nei loin a sual pang ih Bawipa ih thukham a buar pang a si ahcun, 28a sual a theih awk vete in raitluan mi menu a rak keng pei. 29A menu-ih lu parah a kut a suang pei ih mei-ur thawinak sa an thahnak, biakṭheng ihsin saklam kapah a that pei. 30A cuih thisen sungah puithiam in a mehtok zung in a tok pei ih biakṭheng ih ki pawl parah a hnih pei; a taangmi thisen cu biakṭheng hramah a thlet thluh pei. 31Cun remnak thawinak sa-ih thau pawl an lak vekin a thau a lak thluh pei ih Bawipa ih duhmi rimthaw si dingah biakṭheng parah a ur pei. Cubangtuk in a cu pa-ih sual ruangah puithiam in thawinak a pek pei ih cupa cu a sualnak ngaithiam a si ding.
32Mi pakhat in a sualthlahnak hrangah tuu pakhat a rak keng asile a nu raitluan a si pei. 33A tuu ih lu parah a kut a suang pei ih mei-ur thawinak sa an thahnak, biakṭheng ihsin saklam kapah a that pei. 34A cuih ṭilva thisen sungah puithiam in a mehtok zung in a tok pei ih biakṭheng ih ki pawl parah a hnih pei; a taangmi thisen cu biakṭheng hramah a thlet thluh pei. 35Remnak thawinak sa a thau an lak bangtuk in puithiam in a thau a lak thluh pei ih mei-ur thawinakih an pekmi rawl thawn Bawipa a pek pei ih biakṭheng parah a ur pei. Cubangtuk in cupa ih sualthlahnak hrangah puithiam in thawinak a pek pei ih cupa cu ngaithiam a si ding.
Currently Selected:
PUITHIAM HNAṬUANNAK 4: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
