PUITHIAM HNAṬUANNAK 26

Daan Thluntu Hrang Thlawsuah

(Daan 7.12-24; 28.1-14)

1 Bawipa in, “Biak dingah milem siseh, lungphun siseh, lungto in zuk siseh, ṭelhmi lung siseh, nan tuah lo pei. Keimah cu Bawipa nan Pathian ka si. 2Ka sabbath ni pawl cu nan ul pei ih in biaknak hmun thianghlim cu nan upat pei. Keimah cu Bawipa ka si.

3“Ka daan le ka thupek nan thlun a si ahcun, 4nan ram in rawl a suahnak dingah le nan thingkung pawl in rah an rahnak dingah vanruah a tikcu hmantein ka surter ding. 5Nan lo rawl a tamzet ding ih sabit rah lawh a cut tik khalah lo rawl nan lak hrih ding; cule nan sabit rah cu a tamzet ding ih nan lo thlaici tuh a cut tik khalah sabit nan lo hrih ding. Ei-baar ding nan duhmi hmuahhmuah cu nan ngah ṭheh ding ih nan ram sungah hnangamzet in nan um ding.

6“Nan ramah raldaihnak ka leenter ding ih zohman ṭih ding um loin zanah nan it ding. Nan ram sung ihsin ṭihnungza sahrang pawl cu ka dawi thluh ding ih raldo awknak le ralnam khal a um nawn lo ding. 7Nan ral pawl parah nehtu nan si ding; ralnam in nan hmaiah an thi ding. 8Nannih minung panga in nan ral zakhat nan neh ding ih nannih zakhat in nan ral thawng hra nan neh ding. 9Ka lo thlawsuah hai ding ih tefa tampi ka lo pe ding. Nanmah thawn thukamnak ka tuahmi kha keimah cun ka kimter thluh ding. 10Nan lo ihsin a suakmi rawl a tam ngaingai ding ih kum a cem tikah rawl thar ret duh ah rawl hlun pawl cu nan hlon a ṭul ding. 11Nanmah lakah ka Puanthlam thianghlim sungah ka um ding ih ziangtik hmanah ka lo dungtun lo ding. 12Nan hnenah ka um ding; keimah cu nan Pathian ka si ding ih nannih cu ka minung nan si ding. 13Sal nan si nawn lonak dingah Izipt ram ihsin Bawipa nan Pathian keimah rori in ka lo suah zo a si. A lo ṭawnhremtu hreng pawl cu ka khiak thluh ih dingte le hmaihngal zetin ka lo fehter hai a si,” tiah a ti.

Daan Thlunlotu Pawl Hremnak

(Daan 28.15-68)

14 Bawipa in, “Ka thupekmi nan thlun lo a si ahcun hremnak nan tuar ding. 15Ka daan le ka thupekmi pawl thlun duh loih nanmah thawn ka tuahmi thukamnak nan bal a si ahcun, 16Ka lo hrem hai ding. Harsatnak nan parah ka thlen ter ding - a dam thei nawn lomi natnak a phunphun le khurhnat pawl nan tuar ding ih nan mit a caw ding ih nan caar vivo ding. Thlaici nan tuh khalle nan hrangah a ṭhahnem lo ding; ziangahtile a eitu cu nan ram a nehtu nan ral pawl an si ding. 17Ka lo hnong hai ding ih ralih nehmi nan si ding; a lo huatu pawl in an lo uk ding. Nan thin a phang tuk ding ih zohmanih dawi lo khal in nan tlan rero ding.

18“Cutiih nan tuar hnu khalah ka thu nan ngai lo thotho a si ahcun nan tuarnak cu, nan sual ruangah, a let sarih in ka luarter ding. 19Nan puarthau ringringnak cu ka balkiak thluh ding; nan tlun ih van cu thir bangtuk in ka hakter ding ih nan hnuai ih leilung cu daar bangtuk in ka ruhter ding. 20Harsazet ih hna nan ṭuannak cu thulolak an si ṭheh ding; ziangahtile nan leilung in rawl a suah lo ding ih nan thingkung pawl khal an rah lo ding.

21“In el thotho ih ka thu nan ngai lo a si ahcun ka lo hremnak zonzaihnak cu, nan sual ruangah, a let sarih in ka ṭhanter lala ding. 22Nan lakah sahrang ka thlah pei ih nan faate pawl le nan ṭilva pawl an deh ding; mi malte lawng nan taang ding ih nan lamzin pawl an ṭhing thluh ding.

23“Hi bangtuk hremnak nan tuar hnuah ka hnenah kir cuang lo ih in dodal thotho a si ahcun, 24Keimah rori in ka lo dodal hai ding ih tuih hlan hnakih let sarih har in ka lo hrem ding. 25Ka thukamnak nan balsiat ruangah phuhlamnak ral nan parah ka tlunter tikah khawpi sungah him duh ih nan relh a si khalle nan parah natsia ka tlunter ding ih nan ral pawl ih kut sungah tlakter thluh nan si ding. 26Ei ding rawl ka lo pe lo ding ih nunau pahra-ih comi sang cu sangrawhnak pakhat ih rawh khop fang a si ding. Bangraan ih co dingah nan zem aw ding; asinain nan comi hmuahhmuah nan ei ding tikah nan ril a rawng thotho ding.

27“Hi bangtuk hremnak hmuahhmuah hnu khalah ka thu nan ngai lo ih in dodal thotho lai a si ahcun, 28ka thinheng in napi in ka lo tuah hai ding ih nan parih hremnak cu, nan sual ruangah, a let sarih in ka luarter ding. 29Nan rilrawn tukah nan sungsuak nan fanu le nan fapa rori hman nan ei ding. 30Tlang parih nan sakmi biakinn pawl cu ka siatsuah thluh ding; nan rimhmui urnak biakṭheng pawl khal ka bal thluh ding ih nan milem a rilmi pawl ih parah nan ruak pawl cu ka hlon ding. Ka hrangah fihnungza nan si ding ih, 31nan khawpi pawl cu ka siatsuah thluh ding; nan biakinn pawl ka balsiat thluh ding ih nan pekmi thawinak pawl khal ka saang duh nawn lo ding. 32Nan ram ka siatsuah zia cu a nasa tuk ding ih nan ram a luahtu nan ral pawl hman in an hmuh tikah an khawruah a har zet ding. 33Raldonak ka tlunter ding ih ram dangdangah ka lo ṭhekdarh thluh hai ding. Nan khawpi pawl cu khawrop ah a cang thluh ding ih nan ram cu a ṭhing reprep ding. 34Nan ram a ṭhin sung le nan ral pawl ih ramah nan taan sung hmuahhmuah cu nan ram in sabbath colh kum a ngah ve ding a si. 35Cuticun colhnak tikcu nan pek dah lomi nan ram in colhnak caan a ngah ding. Tlansan mi ramṭhingah a cang pei ih ral ramih ralkaihmi nan can sungah nan ram cu a rak cawl ding a si.

36“Ram dangih hruaimi nannih mivakvai pawl cu thinphang ringring in ka lo tuah hai ding ih thli-ih thinghnah a hran thawmvang hmanah nan tlan rero ding. Raldonak ih ral dawimi vekin nan tlan ding ih nan kiangkapah ral an um lo naón nan ril rero ding. 37Zohman ih an lo dawi lo hmanah pakhat le pakhat parah nan bah nan ril ding ih nan ral ziangvek hman nan do thei lo ding. 38Ral ramih nan um sungah nan thi ding; nan ral pawl ih leilung in a lo dolh thluh hai ding. 39A taangsun pahnih khat nan um khalle nanmah ih sualnak le nan pupa ih sualnak ruangah nan cemral thotho ding.

40“Sikhalsehla nan tesinfa pawl cun an sualnak an phuang ding; anmah ih sualnak lawng si loin ka thu i ngai lotu le i dodaltu an pupa pawl ih sualnak pawl tla an phuang ding. 41Cutiin an pupa pawl an sual ruangah ka hnong hai ih an ral pawl ih ramah ralkaihmi-ah ka canter. A neta bikah nan tesinfa pawl an sual ruangih hremnak an tuar hnu, an thinlung a neem tikah, 42ka miphun pawl Kanaan ram pek dingah Jakob, Isaak le Abraham hnenih ka thukamnak cu ka thei sal pei ih ka kimter sal ding. 43Sikhalsehla hmaisabik ahcun hi ram in colhnak a ngah theinak dingah ramsung minung pawl cu hi ram an suahsanta a ṭul a si. Cule ka thupekmi le ka daan pawl an hnon ruangah harsatnak phun kim an tuar hrimhrim a ṭul a si. 44Cutiin asinain, ral ram sungih an um sung hmanah cun ka tlansan thluh hai lo ding ih ka siatsuah thluh fawn lo ding. Cutiih siatsuah thluh ngaingai an si ahcun anmah thawn ka thukamnak cu a cem thla rori ding a sisi; Keimah cu Bawipa an Pathian ka si. 45Keimah cu Bawipa an Pathian ngaingai ka sinak dingah miphun dangdangih mithmuh ah ka huham suah tahratin Izipt ram ihsin ka suahter hai laiih an pupa pawl thawn ka tuahmi thukam cu ka thei sal ding a si,” tiah a ti.

46Hi daan pawl le thupekmi pawl cu Israel miphun hrangah Sinai Tlang parah Bawipa in Moses hnenih a pekmi an si.

Currently Selected:

PUITHIAM HNAṬUANNAK 26: FCL

Highlight

Copy

Compare