PUITHIAM HNAṬUANNAK 27
27
Bawipa Hnenih Pekhlan Daan
1A hnuailam ih daan pawl cu, 2Bawipa in Israel mi hrangah Moses hnenih a pekmi an si. Thukam awh-nak kimternakah mi pakhat cu Bawipa hnenih pek ciami a si hnuah luat sal a duh a si ahcun a tanglam sumsaw pawl hi a pek pei. 3Mipa upa, kum kul le kum sawmruk karlak cu ngun tangka sawmnga a pek pei. 4Nunau cu ngun tangka sawmthum a pek pei. 5Mino mipa, kum nga le kum kul karlak cu ngun tangka kul a pek pei; nunau cu fanghra a pek pei. 6Kum nga tang mipa nauhak cu ngun tangka fangnga a pek pei. Nunau cu fangthum a pek pei. 7Mipa kum sawmruk tlun cu ngun tangka hleinga a pek pei. Nunau cu ngun tangka fanghra a pek pei.
8Siatcam in thukamnak a tuah naón a farah ih tangka pek ding a nei lo a si ahcun amah cu puithiam hnenah an fehpi pei ih a pek thei ding zat tiang puithiam in a ṭhum sak pei.
9Thukamnak a tuahmi cu Bawipa ih cotlak ding ṭilva pek ding a si ahcun acuih ṭilva cu a thianghlimmi a si ih, 10thukamnak a tuahtu in ṭilva dang in a thleng lo pei. A thleng a si ahcun ṭilva an pahnih in Bawipa ih ta an si pei. 11Sikhalsehla Bawipa hnenih kammi ṭilva cu raitluan lo a thiang lomi ṭilva a si ahcun a neitu in cuih ṭilva cu puithiam hnenah a fehpi pei. 12Cuih ṭilva cu phun ṭha le phun ṭha lo ti zoh in puithiam in a man a khiah pei ih a khiahmi a man cu zohman in an thleng thei nawn lo pei. 13A petu in a tlensal duh a si ahcun a man zat ih hlei ah zateek kul a pek pei.
14Mi pakhat in Bawipa ih hnenah a inn a pek a si ahcun inn ṭha a si le si lo zoh in puithiam in a man a khiah pei ih cuih a khiahmi cu zohman in an thleng thei nawn lo pei. 15Inn a petu in tlensal a duh a si ahcun a man zat ih hlei ah zateek kul a pek pei.
16Mi pakhat in Bawipa ih hnenah a leiram hrekkhat a pek ahcun thlaici ziangzat tuhnak hmun a si ti zoh in a man cu khiah a si pei ih barli sangvut han khatah ngun tangka fanghra ton in ṭuat a si pei. 17A leiram cu Jubilee kum cem vete ih a pek a si ahcun a man cu an khiah zat in a si ding. 18Asinain Jubilee kum cem hnupi ih pekmi a si ahcun hmai Jubilee kum a kim hlanih kum zat kha siar in puithiam in a man kha a ṭuat pei ih a man a ṭhum pei. 19Leiram a petu pa in a tlensal duh a si ahcun a man zat ih hlei ah zateek kul a pek pei. 20Cun Bawipa hnenah a hlan zomi kha tlen hmaisa loin midang hnenih a zuar a si ahcun tlensal theinak a neihmi kha a sung pei. 21Hmai Jubilee kum a kim tikah cuih leiram cu a kumkhua in Bawipa ih leiramah a cang pei ih puithiam pawl ih ta a si pei.
22Mi pakhat in a lei copmi leiram Bawipa hnenih a pek a si ahcun, 23hmai Jubilee kum tiang a kum ṭuat in puithiam in a man a khiah pei ih a khiah zat in cupa in cuih ni ah a pek pei; cuih tangka cu Bawipa ih ta a si. 24Jubilee kum a si tikah cuih leiram cu a tir ih a neitu pa hnenah, a si lole a tesinfa hnenah khirh a si pei.
25Thil man hmuahhmuah cu biaknak lam ih zapi hman ṭheumi zoh in relcatmi vekin an si thluh pei.
26Zohman in ṭilva fatir cu lungtho teih thawinakah Bawipa ih hnenah an pek lo pei; ziangahtile cuih fatir cu Bawipa ih ta a si cia zo. Caw fa, tuu fa le me fa cu Bawipa ih ta an si. 27Asinain a thiangfai lomi ṭilva ih fatir cu an khiah zat a man le zateek kul in an tlensal thei pei. A neitupa in a tlensal lo a si ahcun midang hnenah a man an khiah zat in zuar a si pei.
28 Bawipa ih hnenah pumpek ih hlan ciami cu milai siseh, ṭilva siseh, leiram siseh, zohman in a tlensal, a zuarsal thei nawn lo pei. A kumkhua-in Bawipa ih ta a si zo. 29Minung hman pumpek ih Bawipa hnenih hlan ciami cu tlensal ding a si nawn lo; thah ding a si.
30Nan lo ihsin a suakmi rawl le thingrah sungin ṭhen hra ṭhen khat cu Bawipa ih ta a si. Bawipa ih hrangah a thianghlimmi a si. 31Mi pakhat in cu pawl cu tlen a duh a si ahcun an khiahmi zat a man le zateek kul a pek pei. 32Ṭilva khal pahra sungah pakhat cu Bawipa ih ta a si. Ṭilva nan siar tikah a pahratnak cu Bawipa ih ta a si. 33Cutiih siar a si tikah a pahratnak cu a ṭawnṭai bik si dingah a neitupa in ngaihtuah hlah seh; hril ciami hrangah ai-awhtu khal a nei thei lo pei. Ṭilva pakhat cu a dangin a airawlter a si ahcun ṭilva an pahnih in Bawipa ih ta an si pei ih tlensal khal an theih lo ding.
34Hi daan pawl cu Moses hnenah Bawipa in Israel mi hrangah Sinai Tlang parih a pekmi an si.
Currently Selected:
PUITHIAM HNAṬUANNAK 27: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
