PUITHIAM HNAṬUANNAK 25

Kum Sarihnak

(Daan 15.1-11)

1A hnuailam ih daan pawl cu Israel mi hnenih pek dingah, 2Bawipa in Moses hnenah Sinai Tlang parah a sim. Bawipa ih a lo pek dingmi ram nan thlen tikah kum sarihnak kum cu nan thlo lo pei; cuticun Bawipa nan upatnak nan langter ding. 3Kum ruk sung nan lo ah thlaici nan tuh pei, nan sabit hmuan simsial in a hnge pawl tla nan tan pei ih lorawl pawl nan khawm pei. 4Sikhalsehla a kum sarihnak cu nan leiram a colh kum, sabbath kum, Bawipa hnenih nan pek kum a si pei. Nan lo ah thlaici nan tuh lo pei. Nan sabit hmuan khal nan simsial lo pei. 5Nan tuh lo naón nan loih a kho thothomi rawl hman kha nan la lo pei; nan simsial lomi nan sabit hnge pawl ih sabit rah khal nan lo lo pei; nan leiram a colh kum a si pei ih a dai in nan dai lo pei. 6Cuih kum ahcun nan lo nan thlo lo ding; asinain nanmah le nan sal pawl, hnaṭuan nan fialmi pawl le nanmah lakih a um ramdangmi pawl cu nan lo in a lo cawm hai ding. 7Innzuat ṭilva le hramlakih ramsa pawl khal a cawm ding. Thlawh lomi ramih a suakmi hmuahhmuah cu ei a si pei.

Jubilee Kum

8Kum sarih kum sarih in voisarih, a zatein sawmli le kum kua a kim tiang siar uh. 9Cuih hnu thla sarih thla ni hra ni, sualthlah thawinak ni ah mi pakhat nan ram pumpi sungah tawtawrawt nan phawtter pei. 10Cuticun kum sawmnga kum cu Jubilee#25.10 Jubilee: timi hi Hebru ṭong in yobhel ihsin a ra ih a tican cu tuucangki tinak a si. Cuih puai caanah tuucangki an tum ṭheu ruangah cutiih hmin an peknak a si. kum Pathian sunloih an pek kum a si pei ih ram sungih a ummi minung hmuahhmuah hnenih zalennak nan than kum a si pei. Hi kumah an neihmi leiram le innlo an rak leimi hmuahhmuah cu a hmaisaih a rak neitu hnenah, a si lole a rocotu a tesinfa hnenah, khirh thluh a si pei. Sal ih an zuar zomi pawl khal a leitu in an sungkhat hnenah an kir thluh pei. 11Nan lo ah thlaici nan tuh lo pei; amah teih a khomi rawl khal nan lak lo pei; nan simsial lomi nan sabit hmuanih sabit rah khal nan lo lo pei. 12Cuih kum cu Jubilee kum a si ih nan hrangah kum thianghlim a si. Nan thlawh lomi ramih a suahmi rawl lawnglawng nan ei pei.

13Hi kum ahcun zuar ciami leiram hmuahhmuah a hlanih a rak neitu hnenah khirh thluh an si pei. 14Curuangah na mi phunpi Israel mi pakhatkhat hnenah leiram na zuar, a si lole a hnen ihsin na lei tikah a dik loin zuar ding le lei ding a si lo. 15A man cu hmai Jubilee kum a kim sal hlanah hi leiram in kum ziangzat sungah rawl ziangzat a suak pei ti zoh in khiah ding a si. 16Kum tampi a duh hrih a si ahcun a man cu a tam dingih kum malte lawnglawng a taang a si ahcun a man a niam thung ve ding; ziangahtile an zuarmi ngaingai cu leiramih a suahmi rawl kha a si sawn. 17Israel mi na laicinpi va bum hlah; na Pathian ṭihzah aw. Keimah hi Bawipa nan Pathian cu ka si.

Kum Sarih Kum Ih Harsatnak

18Hi ram sungah hnangamzet ih nan umnak dingah Bawipa ih daan le thupekmi pawl cu thlun uh. 19Leiram in rawl a suah pei ih, ei nan duhmi nan ngah thluh ding; cule hnangamzet in nan um ding.

20Sikhalsehla mi pakhatkhat in hi kum sarih kum, lo thlawh lo kum le rawl lak lo kum ah hin ei dingah ziangso a um ding, tiah a sut ding. 21Bawipa in kum ruknak kumah leiram cu a thluasuah ding ih curuangah kum thum hrang daih in rawl a suah ding a si. 22Kum riatnak kumih rawlci nan tuh tikah kum ruknak kum ih nan lakmi rawl kha nan ei thotho hrih ding ih cuih kum riatnak kumih nan tuhmi rawl nan lak hlan sung hmuahhmuah cu rawl ei ding cat loin nan nei ko ding.

Thilri Khirhsalnak

23Nan leiram le innlo cu kumkhua hrangin nan zuar lo pei; ziangahtile nan ta a si lo; Pathian ta a si ih nannih cu mikhual a laangte ih hmanter sungmi lawng nan si.

24Leiram le innlo nan zuar tikah a zuartu pa in leikir sal theinak a nei pei. 25Israel mi pakhatkhat a farah ruangah a leiram a zuar a si ahcun a nai bik a sungkhat in a leikir sal thei ding. 26Leikir sal saktu sungkhat a nei lotu cu nehhnu-ah leikir salnak sumsaw a neih sal ahcun, 27a leikir sal thei ni in Jubilee kum tiang hrang ṭuat in a zorh mi pa hnenah a man a pek pei ih cuticun a leiram cu a lak sal pei. 28Sikhalsehla leikir salnak sumsaw nei lo ringring a si ahcun Jubilee kum a kim hlan sung cu a leitu pa in a nei hrih pei. Cule Jubilee kumah a hnenah khirh sal a si pei.

29Tlakrawh phardawl ih kulhmi khawpi sung inn cu a neitupa in a zuar tikah kum khat sungah tlen sal theinak a nei pei. 30Sikhalsehla kum khat sungih a tlen sal thei lo a si ahcun, leikir sal theinak a nei lo pei ih cuih inn cu kumkhua-in a leitu le a tesinfa pawl ih ta a si pei; Jubilee kum khalah khirhsal a si nawn lo pei. 31Cun kulh lomi khawsung inn pawl cu khawleng inn vekah ruah an si pei ih a rak nei hmaisatu in a tlen thei pei; Jubilee kum ahcun khirhsal thluh an si pei. 32Asinain Levi hrin pawl cun Levi khawpiih inn pawl cu an duh tiktikah an tlensal thei ding. 33Kulhmi khawpiih inn cu Levi mi in a zuar ih a tlensal lo a si ahcun Jubilee kumah khirh a si pei; ziangahtile khawpi sungih Levi hrin pawl ih inn cu a kumkhua in anmah ih ta a si. 34Cuih tlunah Levi miphun pawl ih khawpi kiangkapih ram pawl cu ziangtik hmanah zuar ding an si lo; a kumkhua-in an ta a si.

Farah Hnenih Sumsaw Coih Daan

35Nan kiangkapih um nan phunpi Israel mi a farah ih a nun a har a si ahcun, nan kiangih a um thei ringringnak dingah nan hnen-um a si lole mikhual nan cawm vekin cawm ve uh. 36Tangka nan coih asile a ṭhang lak hlah uh; Pathian ṭihzah uhla mifarah pa cu nan kiangah um veseh. 37A ṭhang thawn tangka coih hlah uh; a miat in rawl khal zorh hlah uh. 38Himi cu Bawipa nan Pathian ih thupek mi a si. Amah cu nan Pathian a sinak dingah le Kanaan ram nan conak dingah Izipt ram ihsin a lo suahtu a si.

Sal Pawl Luatternak

39Nan kiangkapih a ummi nan phunpi Israel mi pakhat a farah ih a nun thei lo ruangah salah a zuar-aw a si ahcun sal hnaṭuan nan ṭuanter lo pei. 40Hlawhphalhmi hnen-um vekin nan hnenah a um pei ih hmai Jubilee kum tiang nan hna a ṭuan pei. 41Jubilee kum a thlen tikah amah le a faate pawl cun an lo taan pei ih an sungkhat le an pupa ih leiram ah an kir pei. 42Israel mi pawl cu Bawipa ih sal nan si ih amah in Izipt ram ihsin a lo suah zo a si ruangah salih zuarmi nan si nawn lo pei. 43Nan Pathian ṭihzah uhla cubangtuk farah pawl cu tisia hlah uh. 44Sal neih nan duh a si ahcun nan kiangkapih a ummi ramdangmi pawl sung ihsin nan lei thei. 45Nanmah ih lakih a um ramdangmi sung ihsin an faate pawl tla nan lei thei. Nan ram sungih a suakmi an faate pawl cu nan thilri-ah an cang thei. 46Nan fapa pawl hrangah ro-ah nan roh thei ih nan fapa pawl an nun sung cu an hna an ṭuan ding. Sikhalsehla nan unau Israel mi cu nan tisia lo pei.

47Nan lakih a um ramdangmi, a si lole nan hnaṭuantu pakhatkhat a lian ih nan unau Israel mi pakhat a farah tuk ruangah acuih milianpa hnenah salih a zuar-awk a si ahcun, 48a lei hnu khalah tlensal theinak a um ding. Amah ih unau pakhatkhat, 49a si lole a paseu maw, a unauseu maw, a si lole a sungkhat pakhatkhat in maw an tlen thei ding. Culole amah in paisa a neih thei a si ahcun amah le amah a tlen-aw thei pei. 50Amah a rak leitupa ramdangmi-ih lungkimnak in, amah a zuar awknak ihsin hmai Jubilee kum tiang a kum an siar pei ih hnaṭuan fial mi pa ih nihlawh man ṭuat in a luatnak man cu an khiak ding. 51A luatnak dingah kum reipi a taan hrih a si ahcun a leinak man tuat in a luatnak man cu an khiak ding. 52Jubilee kum tiang kum malte lawng a taang a si khalle a kum tuat in a luatnak man cu an khiak ding. 53Kum khat hnu kum khat hnaṭuan fialmi minung bangtuk ih ruat in ramdangmi-ih kut thuaiah a um ding; sikhalsehla a leitupa cun a tisiat hrimhrim lo pei. 54A tlunih luat theinak lamzin pawl in a luat thei cuang lo a si ahcun hmai Jubilee kumah amah le a faate pawl cu luatter an si pei. 55Israel mi pawl cu Bawipa ih sal nan si ruangah midang salah a kumkhua cun nan si thei lo pei. Izipt ram in a suahmi nan si. Amah cu Bawipa nan Pathian a si.

Currently Selected:

PUITHIAM HNAṬUANNAK 25: FCL

Highlight

Copy

Compare