PUITHIAM HNAṬUANNAK 24
24
Meisa Vanmi Kilkhawi Daan
(Suah 27.20-21)
1 Bawipa in Moses hnenah hiti in a ti. 2Israel mi pawl hnenah thu pe awla Bawipa umnak Puanthlam sungih meisa vanmi pawl cu a tikcu hmanteih nan van theinak dingah olif siti phun ṭha bik pawl rak keng hai seh. 3Hmun Thianghlim Bik sung Thukham Kuang hmaiih a ummi puanzar lengah meisa vanmi pawl cu Aaron in Bawipa ih mithmuh ah zanlam tinte a vang ding ih zinglam tiang a vangter ding. Hi daan cu kumkhua thlun ding a si. 4Sui hlirih tuahmi meivannak fung parih meisa pawl cu Aaron in ṭhatein a zoh ding ih a tikcu hmantein Bawipa ih mithmuh ah a vang ding.
Pathian Hnenih Pekmi Sang
5Sangvut reel nga in lak uhla sang zawl hleihnih ah tuah uh. 6Bawipa ih mithmuh ah sui in khuutmi cabuai parah tlar khatah paruk fingfingin tlar hnih in ret uh. 7Bawipa hnenih rawlhun thawinak sang can-aiah sang tlar hnih parah cun frankincense timi rimhmui ṭha bik ret uh. 8Sabbath ni tinin, san khat hnu san khat, cuih sang cu Bawipa mithmuh ah nan ret pei. Himi cu Israel mi pawl in a kumkhua nan tuah dingmi ṭuanvo a si. 9Hi sang pawl cu Aaron le a tesinfa pawl ih ta a si ih hmun thianghlim ah an ei pei; ziangahtile puithiam pawl hrangah Bawipa hnenih pekmi thawinak rawl lakah a thianghlim zetmi an si.
A Dikmi Hremnak
10A nu Israel miphun, a pa Izipt miphun a si mi mipa pakhat cu Israel mi pawl riahnak sungah a feh ih Israel mi pakhat thawn an to aw. 11A nuih hmin cu Shelomith a si ih Dan phun sungih Dibri-ih fanu a si. Cutiih an tawh-awk laiah cupa cun Pathian hmin a camsiat; cu ruangah Moses hnenah an fehpi. 12Moses cun amah cu a kilter hai ih ziangtin tuah ding ti kha Bawipa ih hnen ihsin thupekmi a hngak.
13Cutikah Bawipa in Moses hnenah, 14“Hi pa hi nan riahnak ihsin khawleng ah suahpi uh. Pathian a camsiat lai a theitu hmuahhmuah in a mawh hrimhrim a si ti langternak ah hi pa ih lu parah an kut an suang ciar pei; cule Israel mi zatein lungto in an deng that pei. 15Cun Pathian a thangsiattu cu hi pa bangtuk in hremnak nan tong ding ih, 16thah nan si ding, tiah Israel mi pawl cu sim hai aw. Israel mi siseh, Israel mi lakih a um ramdangmi siseh, Pathian a camsiattu cu Israel misenpi in lungto in denthat a si pei.
17“Mi a thattu cu thah a si ve ding. 18Midang ih ṭilva a thattu cun ṭilva in a kuan pei. Nunnak cu nunnak in kuan a si pei.
19“Mi pakhat in midang a tuahmawh a si ahcun amah cu tuahmawh a si ve ding. 20Mi ih ruh pakhat a kiakter a si ahcun amah ih ruh pakhat khiak a si ve ding a si; mi ih mit pakhat a phorhsuak a si ahcun amah ih mit pakhat phorhsuak a si ve ding; mi ih ha pakhat a kiakter a si ahcun amah ih ha pakhat khiak a si ve ding. Midang a tuahmawhtu cu tuahmawh a si ve ding. 21Ṭilva a thattu cun ṭilva in a kuan pei; sikhalsehla milai a thattu cu amah thah ve ding a si. 22Hi daan cu Israel mi siseh, nanmah lakih a um phundangmi siseh, nan zate ih thlun dingmi a si; ziangahtile keimah cu Bawipa nan Pathian ka si,” tiah a ti.
23Cuticun Moses in Israel mi pawl cu thu a sim ih Pathian a camsiattu pa cu khawlengah an suah ih lungto in an den that. Cuticun Bawipa in Moses hnenih thu a pek bangtuk in Israel mi pawl cun an tuah.
Currently Selected:
PUITHIAM HNAṬUANNAK 24: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
