PUITHIAM HNAṬUANNAK 15

Taksa Sungin Hnai Dokmi

1 Bawipa in Moses le Aaron hnenah a tanglam daan pawl cu, 2Israel mi pawl ih thlun dingah a pek. Mi pakhatkhat a zahmawh sungin hnai a dok asile a thiangfai lo a si. 3Cat loih a dok ah siseh, a pih ah siseh, cupa cu a thiangfai lo a si. 4A tonak, a si lole a ihnak ihkhun cu a thiangfai lo a si. 5Cupa ih ihkhun cu mi pakhatkhat in a tham, 6a si lole a rak tonak ih a to asile a thamtu, a si lole a totu in a hnipuan a sawp fai thluh pei ih ti a kholh-aw pei ih cuih sun cu zanlam tiang mi thiangfai lo a si pei. 7Hnai dok pa cu mi pakhatkhat in a dai asile a daitu cun amah ih hnipuan a sawpfai thluh pei ih ti a kholh-aw pei ih cuih sun cu zanlam tiang mi thiangfai lo a si pei. 8Hnai dok pa in thianfai lonak zianghman a nei lo mi pakhat parah a cil a phui asile cupa cu a hnipuan a sawp fai thluh pei; ti a kholh-aw pei ih cuih sun cu zanlam tiang mi thiangfai lo a si pei. 9Hnai dok pa ih tonak rangkung, a si lole tokham cu a thiangfai lo a si. 10Hi pa ih tonak thil pohpoh a thamtu cu zanlam tiang mi thiangfai lo a si. Hi pa ih tonak a phurtu pohpoh cun amah ih hnipuan a sawpfai thluh pei ih ti a kholh-aw pei ih cuih sun cu zanlam tiang mi thiangfai lo a si pei. 11Hnai dok pa in a kut pawl kholh hmaisa loin mi pakhatkhat a tham a si ahcun cupa cun amah ih hnipuan a sawpfai thluh pei ih ti a kholh-aw pei ih cuih sun cu zanlam tiang mi thiangfai lo a si pei. 12Hi pa ih a thammi tlakbeel cu nan khuai pei ih thingkheng a thammi cu nan kholh pei.

13Hnai dok pa a dam tikah ni sarih sung a cawl pei ih cuih hnuah a hnipuan a sawpfai pei ih tidai thiang in a kholh-aw pei. Cuticun mi thiangfai ah a cang ding. 14A ni riatnak ah thuro pahnih a si lole laileng pahnih Thukham retnak Puanthlam sangka ah a keng pei ih puithiam hnenah a pek pei. 15Puithiam in vate pakhat cu sualthlah thawinakah a pek pei ih a dang pakhat cu mei-ur thawinakah a pek pei. Cuticun puithiam in hnai dok pa ih hrangah thianfaiternak a tuah pei.

16Mi pakhatkhat a bua a suak asile a pumpuluk in ti a kholh-aw pei ih cuih sun cu zanlam tiang mi thiangfai lo a si pei. 17Cuih bua a tlaknak, pat in tuahmi siseh, savun in tuahmi siseh, thilri hmuahhmuah cu sawpfai ṭheh ding an si ih zanlam tiang thilri thiangfai lo an si pei. 18Nu le pa an pawl-awk hnuah an pahnih in ti an kholh-aw pei ih cuih sun cu zanlam tiang mi thiangfai lo an si pei.

19Nunau in thlatin thi a neih tikah ni sarih sung mi thiangfai lo a si pei. Cuih nunau a daitu cu zanlam tiang mi thiangfai lo a si pei. 20Thi a neih sung a tonak, a si lole a ihnak cu a thiangfai lo a si. 21Mi pakhatkhat in a ihkhun a tham ahcun amah ih hnipuan a sawpfai pei ih tidai in a kholh-awk hnuah zanlam tiang mi thiangfai lo a si pei. 22Mi pakhatkhat in a tonak pakhatkhat a tham ahcun amah ih hnipuan a fawpfai pei ih a kholh-awk hnuah zanlam tiang mi thiangfai lo a si pei. 23A ihkhun siseh, a tonak pakhatkhat siseh, a tham a si ahcun zanlam tiang mi thiangfai lo a si pei. 24Thi a neih sungih mipa thawn an pawl-awk asile a pawltupa khal mi borhhlawh ah a cang ih ni sarih sung cu mi thiangfai lo a si ve; a ihnak ihkhun khal ihkhun thiangfai lo a si.

25Nunau pakhat in thlatin thi a neih mi hlei ah ni tampi thi a neih ahcun, a si lole nunau daan keel lengih thi a neih ahcun, thi a neih sung hmuahhmuah cu, nunau daan a neih sung vek thotho in mi thiangfai lo a si. 26Cutiih thi a neih sung hmuahhmuah a ihnak le a tonak pawl cu thil thiangfai lo an si thluh. 27Cuih thil pawl a thamtu cu mi thiangfai lo a si ih a hnipuan a sawpfai pei ih ti a kholh-aw pei; cuih sun zanlam tiang cupa cu mi thiangfai lo a si pei. 28A thi a reh hnuah ni sarih sung a zoh-aw hrih pei ih cuih hnuah mi thiangfai a si pei. 29A ni riatnak ah thuro pahnih a si lole laileng pahnih a lak pei ih Bawipa umnak Puanthlam sangka ih ummi puithiam hnenah a keng pei. 30Puithiam in pakhat cu sualthlah thawinakah a pek pei ih a dang pakhat cu mei-ur thawinakah a pek pei. Cuticun acuih nunau nuih thianfainak cu puithiam in a tuah sak pei.

31Israel mi pawl ih thianfai lonak ruangah an riahnak laifangih a ummi Bawipa umnak Puanthlam an borhhlawhter lonak ding Israel mi pawl sim dingah Bawipa in Moses a fial. Puanthlam an baalter ngaingai asile thihnak an tong ding.

32Mipa pakhat a zahmawh ihsin hnai a dokmi, a si lole a bua a suakmi, 33nunau pakhat thlatin thi a neimi, a si lole mi pakhat nunau thiangfai lo thawn an pawl-awk thu-ih thlun ding pawl cu a tlun lamih daan pawl hi an si.

Currently Selected:

PUITHIAM HNAṬUANNAK 15: FCL

Highlight

Copy

Compare