PUITHIAM HNAṬUANNAK 14

Phaarnat A Dam Tikih Thawinak

1Misuan thei phaarnat ihsin a dammi mi pakhat thawinak hrangah, 2Bawipa in hi daan pawl cu Moses hnenah a pek. Phaarnat nei pa a dam ih mi thiangfai a si ti ih an ti ni ah amah cu puithiam hnenah an fehpi pei ih, 3puithiam in khawlengah a fehpi pei ih a zoh pei. A phaarnat a dam ngaingai asile, 4puithiam in raitluan vate pahnih, sidar zanthing le puansen le hissop kung a hnge tete thawn rak keng dingah thu a pek pei. 5Cun vate pakhat cu tidai thiangfai retnak khuhriang tlunah that dingin puithiam in thu a pek pei. 6Cule puithiam in a dang vate pakhat cu a lak pei ih thah ciami vate ih thisen sungah sidar zanthing, puansen le hissop kung thawn a hnim pei. 7A phaarnat ihsin thianfaiter dingmi pa cu puithiam in vate thisen cun voi sarih tiang a theh pei ih cuih hnuah a thiangfai a si tiah a ti pei. A nungmi vate cu hramlak ah a thlah pei. 8Cun mi pa in a hnipuan a sawp thluh pei; a sam a met thluh pei ih ti a kholh-aw pei; cuticun mi thiangfai a si ding. Khawsung ah a lut pei, asinain a inn lengah ni sarih sung cu a um pei. 9Ni sarihnak ah a lu a met sal pei; a khahmul, a mit hmul le a taksa parih hmul hmuahhmuah a meet thluh pei; a hnipuan a sawp pei ih ti a kholh-aw pei; cuticun mi thiangfai a si pei.

10A ni riatnak ah kum khat a timi raitluan tuucang pahnih le tuula pakhat a rak keng pei ih olif siti thawn rawimi sangvut reel khat le olif siti khuat khat tla a rak keng pei. 11Cupa le a kenmi pawl cu puithiam in Thukham retnak Puanthlam ah a fehpi pei. 12Cule puithiam in tuucang pakhat cu a lak pei ih olif siti khuat khat thawn mawhnak thawinakah a pek pei. Himi pawl cu Bawipa hnenah puithiam hrangih a hleice pekmi laksawng an si. 13Sualthlah thawinak hrang le mei-ur thawinak hrangih ṭilva an thahnak hmun ah acuih tuucang cu puithiam in a that pei. Himi cu a tuah tengteng dingmi a si, ziangahtile mawhnak thawinak cu sualthlah thawinak bangtuk in puithiam ih covo a si ih a thianghlim zetmi a si. 14Puithiam in tuucang ih thisen hrekkhat cu a lak pei ih thianfaiter dingmi pa-ih vorhlam hna-rah le a vorhlam kutzungpi le a vorhlam kezungpi ah a hnih pei. 15Cun puithiam in olif siti hrekkhat cu a lak pei ih amah ih kehlam zaphak sungah a thlet pei; 16acuih siti sungah a vorhlam mehtok kutzung a hnim pei ih Bawipa mithmuh ah voi sarih tiang a theh pei. 17A kut zaphak sungih a ummi siti hrekkhat le tuucang ih thisen hrekkhat a lak pei ih thianfaiter dingmi pa-ih vorhlam hna-rah le a vorhlam kutzungpi le a vorhlam kezungpi ah a hnih pei. 18A kut zaphak sungih a taang hrihmi siti cu cupa ih lu ah a hnih thluh pei. Cuticun thianfaiternak cu puithiam in a tuah pei.

19Cule puithiam in sualthlah thawinak cu a pek pei ih thianfainak a tuah pei. Cuih hnuah mei-ur thawinak hrangih ṭilva cu a that pei ih, 20biakṭheng ah thawinak a pek pei. Thlairawl thawinak tla a tuah pei. Cuticun puithiam in thianfainak a tuah pei ih cupa cu mi thiangfai ah a cang pei.

21Cupa cu a farah ih zianghman a lei thei lo a si ahcun a thianfainak hrangah tuucang pakhat lawng a keng pei ih mawhnak thawinakah a pek pei. Himi cu Bawipa hnenah a hleice ih pekmi a si. Olif siti thawn rawimi sangvut tla rel tan lawng thlairawl thawinak hrangah a keng pei ih olif siti khuat khat a keng fawn pei. 22Thuro pahnih a si lole laileng pahnih a keng fawn pei ih pakhat cu sualthlah thawinakah le a dang pakhat cu mei-ur thawinak hrangah a si pei. 23Himi pawl cu a thianfainak ni riat ni ah Puanthlam ih sangka ah puithiam hnenah a pek pei. 24Puithiam in tuucang le olif siti cu a lak pei ih Bawipa hnenah a hleice laksawngah puithiam pawl hrangah a pek pei. 25Tuucang cu a that pei ih a thisen hrekkhat a lak hnuah cumi pa-ih vorhlam hna-rah le a vorhlam kutzungpi le a vorhlam kezungpi-ah a hnih pei. 26Cun puithiam in siti hrekkhat cu amah ih kehlam zaphak sungah a thlet pei ih, 27a vorhlam mehtok kutzung in Bawipa ih mithmuh ah siti hrekkhat cu voi sarih tiang a theh pei. 28Tuucang thisen a hnihnak a vorhlam hna-rah le a vorhlam kutzungpi le a vorhlam kezungpi ah siti cu a hnih pei. 29A zaphak sungih a taang hrihmi siti cu cupa ih lu ah a hnih thluh pei. Cuticun thianfainak cu a tuah pei. 30Cun thuro pakhat a si lole laileng pakhat cu, 31sualthlah thawinakah a pek pei ih a dang pakhat cu mei-ur thawinakah thlairawl thawinak thawn a pek pei. Cuticun puithiam in thianfainak cu a tuah pei. 32Himi cu misuan thei phaarnat a nei ih midang bangin thawinak a tuah thei lomi pawl hrangih pekmi daan a si.

Inn Mawr

33 Bawipa in Moses le Aaron hnenah, 34Kanaan ram, Israel mi pawl co dingih a pek dingmi ramih an luh tikah an inn sungah mawr a um ih cuih mawr cu a zai vivo asile a hnuailam ih daan pawl hi an thlun dingih a pekmi an si. 35Mi pakhat in a inn a mawr ti a hmuh tikah puithiam hnenah a feh pei ih a sim pei. 36Cutikah inn zoh dingih a va feh hlanah puithiam in inn sungih a ummi thilri hmuahhmuah cu thilri thiangfai loih rel an si lonak dingah ṭhawn thluh dingin thu a pek pei. Cuih hnuah a va feh pei ih, 37inn mawr cu a va zoh pei. A mawr pianzia cu a tangphaw nawn a si lole a sen nawn in a ṭial ih phar tla a ei a si ahcun, 38cuih inn cu a taan pei ih ni sarih sung tawh a kalh pei. 39A ni sarihnak ah inn cu a va zoh sal pei. A mawr a zai asile, 40a mawr umnak lungto pawl cu lak tahratih khawpi leng hmun thiangfai loih va hlon dingin thu a pek pei. 41Cuih hnuah phar a sunglam hmuahhmuah cu ziat thluh dingah le phar maannak tlak pawl cu lak thluh ih khawpi lengih hmun thiangfai lo ah hlon dingin a fial hai pei. 42Cun an lakih an hlonmi lungto ai-ah a dang lungto pawl an hmang pei ih phar cu a thar in tlak an maan sal pei.

43Lungto pawl an hlon ih a phar pawl an ziat ih an maan sal thluh hnuah a inn cu a mawr thotho a si ahcun, 44puithiam in a va zoh sal pei. A mawr a rak zai ngaingai a si ahcun cuih inn cu inn thiangfai lo a si. 45Cuih inn cu bal ding a si ih a lungto pawl, zanthing pawl le an maanmi tlak pawl hmuahhmuah cu an phur pei ih khawpi leng hmun thiangfai lo ah an hlon pei. 46Hi inn tawh an kalh sungah a sungih a luttu cu cuih sun zanlam tiang mi thiangfai lo a si pei. 47Hi inn sungah a itmi le rawl a eitu cun a hnipuan a sawp fai thluh pei.

48Puithiam a rat ih a zoh tikah in phar pawl an maan sal hnuah a mawrmi a suak sal nawn lo a si ahcun a mawr cu a reh zo a si ruangah puithiam in cuih inn cu inn thiangfai a si, tiah a ti pei. 49Inn thianfaiternak ah puithiam in vate pahnih, sidar zanthing, pathri sen le hissop kung pakhat a keng pei. 50Vate pakhat cu tidai thiangfai retnak ih tuahmi khuhriang tlun ah a that pei. 51Cule sidar zanthing, hissop kung, pathri sen le vate nung cu a lak pei ih a thahmi vate ih thisen sungah le tidai thiangfai retmi sungah cun a hnim pei. Cuih hnuah inn cu voi sarih tiang a theh pei. 52Cuticun vate thisen, tidai thiangfai, vate nung, sidar zanthing, hissop kung le pathri sen pawl in inn cu a thiangfaiter ding. 53Cule vate nung cu khawpi lengah hramlakah a thlah pei. Cubangtuk in thianfaiternak cu inn hrangah a tuah pei ih inn thiangfai ah a cang ding.

54Himi pawl cu mi suan thei phaarnat, 55hnipuan siseh inn siseh a mawrmi, 56hma, khuaihli a si lole hma sia pawl, 57a thiangfai le thiangfai lo, tiih langternak ah pekmi daan pawl an si.

Currently Selected:

PUITHIAM HNAṬUANNAK 14: FCL

Highlight

Copy

Compare