PUITHIAM HNAṬUANNAK 16
16
Remnak Ni #Remnak Ni: timi hi Sualthlah Ni ti khal a theih. Pathian in an sual a thlah ni tican a si. Mirang ṭong ih “atonement” timi a si; Hebru ṭong in “yom hakkippurim” an ti: “yom” ti cu “ni” tican a si ih, “kippur” ticu “thlahsak,” “khuh-sak” tican a si. Tuihsan tiangin Judah mi pawl in “Yom Kippur” timi, rawl uul in puai an tuah ringring. Pui 23:27-28; Mipum 29:11 ah zoh.
1 Bawipa hnenah a thianghlim lomi mei-ur thawinak an pek ruangih Aaron fapa pahnih an thih hnuah Bawipa in Moses hnenah hiti in thu a sim. 2“Na u Aaron kha ṭhatein sim awla puanzar dungih Hmun Thianghlim Bik ahcun a tikcu caan lawngah luh ding a si, ziangahtile cutawk cu Thukam Kuang sin tlunah mero sungin ka langnak hmun a si. Ka sim vekih a thlun lo asile a thi rori ding. 3Sualthlah thawinak hrangah cawcangte le mei-ur thawinak hrangah tuucang a rak ken hnu lawngah Hmun Thianghlim Bik ahcun a lut thei ding a si,” tiah a ti.
4Cule Bawipa in a hnuailam ih daan pawl hi a pek. Hmun Thianghlim Bik sungih a luh hlanah Aaron cu a kholh-awta pei ih a puithiam thilthuam - korfual mankhung, sunghruk pawl, taikhap le lupawng pawl cu a hruk pei.
5Israel mipi in Aaron hnenah sualthlah thawinak hrangah mecang pahnih le mei-ur thawinak hrangah tuucang pakhat an pe pei. 6Amah ih sualthlahnak le a innsang pawl ih sualthlahnak ah cawcang pakhat thawinakah a pe pei. 7Cuih hnuah Bawipa umnak Puanthlam sangka ah mecang pahnih cu a keng pei. 8Cutawkah cun, “Bawipa hrangah,” timi le “Azazel#16.8 Azazel: ti cu Hebru ṭong a si ih a tican cu, a tlanhlo mi me a si tiin an rak zum. Asinain Baibal thiam tam deuh cun, “Nelrawn khawsia hmin” a si tiin atu ahcun an zum. hrangah,” tiih khenmi lungto pahnih in camcawh fung zuhnak a tuah pei. 9Bawipa hrangih hrilmi mecang pakhat cu Aaron in sualthlah thawinak hrangah a pe pei. 10Cule Azazel khawsia hrangih hrilmi mecang cu a nung in Bawipa hnenah hlan a si pei ih, Israel miphun sualthlahnak dingah nelrawn khawsia Azazel hnenah a thlah pei.
11Aaron in amah ih sualthlahnak le a innsang sualthlahnak ih cawcang thawinak a pek tikah, 12biakṭheng ihsin meilingvam kheng khat le rimhmui thaw ṭhuam hnih a lak pei ih Hmun Thianghlim Bik ahcun a keng pei. 13Cutawkih Bawipa umnak hmunah cun rimhmui cu a ur pei ih rimhmui khu in Thukam Kuang sin cu a zeel ding; cuticun Thukam Kuang sin cu a hmu lo ding ih a thi lo ding a si. 14Cawcang ih thisen hrekkhat cu a lak pei ih a mehtok in kuangsin ih hmailam kap cu a theh pei; cule a hrekkhat cu Thukam Kuang ih hmailam kapah voi sarih tiang a theh fawn pei.
15Cuih hnuah Israel mi ih sualthlahnak hrangah me cu a that pei ih a thisen cu Hmun Thianghlim Bik ah a keng pei. Cule cawcang thisen a theh bangtuk in cuih thisen cu Thukam Kuangsin ah le hmailam kapah a theh pei. 16Cubangtuk in Israel miphun ih thianhlim lonak le sualnak ihsin Hmun Thianghlim Bik cu thianfaiter dingah thawinak a tuah pei. A thiangfai lomi riahnak laifangih a um ruangah Aaron in Puanthlam cu cubangtuk in a thianfaiter pei. 17Thianfaiter dingah Hmun Thianghlim Bik ah Aaron a luh ih a suah sal hlan lo zohman Puanthlam sungah an um lo pei. Amah ih hrang, a innsang hrangah le Israel mipi hrangih thianfaiternak a tuah thluh hnuah, 18Hmun Thianghlim Bik ihsin a suak pei ih mei-ur thawinak peknak hmunah biakṭheng thianfaiter dingah a feh pei. Cawcang ih thisen hrekkhat le mecangih thisen hrekkhat cu a keng pei ih biakṭheng par a kil ih a ummi ki pali pawl cu a kimvel in a hnih thluh pei. 19A kutzung in cuih thisen hrekkhat thawn biakṭheng cu voi sarih tiang a theh pei. Cuticun Israel miphun ih sualnak ihsin biakṭheng cu a thianfaiter ding ih a thianghlimmi-ah a cang ding.
Ai-awhtu Mecang
20Aaron in Hmun Thianghlim Bik le Bawipa umnak Puanthlam sung hmuahhmuah le biakṭheng tla thianfaiter dingih thawinak a tuah ṭheh tikah a nungmi mecang, Azazel hrangih timi, cu Bawipa hnenah a hlan pei. 21Cuih me lu parah a kut pahnih in a suang pei ih cuih lu parah cun Israel miphun ih siatnak, sualnak le Pathian an dodalnak pawl hmuahhmuah cu a phuang thluh pei ih cuticun mecang parah a thlenter thluh pei. Cule an tirh mipa in mecang cu nelrawn ah a dawihlo pei. 22An sualnak hmuahhmuah cu mecang cun zohman um lonak ramṭhing ah a phur thluh ding.
23Cule Puanthlam sungah Aaron cu a lut pei ih Hmun Thianghlim Bik sung a luh hlanih a hrukmi puithiam thilthuam pawl cu a phuak pei ih cutawkah a ret pei. 24Hmun thianghlim ah ti a kholh-aw pei ih amah ih hnipuan a hruk pei. Cuih hnuah a va suak pei ih Israel miphun ih sualnak le amah ih sualnak pawl thlahnak dingah mei-ur thawinak a tuah pei. 25Sualthlah thawinak ṭilva ih thau cu biakṭheng parah a ur pei. 26Nelrawn khawsia Azazel hnenih mecang a dawi hlotu an tirhmi pa in Israel miphun umnak hmunih a ra kir hlanah ti a kholh-awta pei ih a hnipuan pawl a sawpfai thluhta pei. 27Sualthlahnak dingah an thahmi cawcang le mecang, sualthlah thawinak hrangih an thisen Hmun Thianghlim Bik ih an kenmi cu an riahnak ihsin khawlengah an suah pei ih an ur pei. An vun siseh, an sa siseh, an sungril tla siseh, ur thluh an si pei. 28A urtupa cu riahnak hmunih a kir hlanah a hnipuan a sawpfai thluh pei ih tidai in a kholh aw pei. Cuih hnu lawngah riahbuk ah a kir sal pei.
Remnak Ni Ulh Daan
29A hnuailam ih daan pawl cu a kumkhua ih nan thlun dingmi an si. Thla sarih thla#16.29 Thla sarih thla: ti mi cu Hebru ṭong in “Tishri” an ti ih September thlahrek le October thlahrek a ceem. ni hra ni ah Israel mi hmuahhmuah le anmah lakih a ummi ramdangmi pawl cu rawl an ul pei ih hna zianghman an ṭuan lo pei. 30Cuih ni ahcun an thianhlimnak dingah le an sualnak hmuahhmuah ihsin an thianfainak dingah thianternak an tuah pei. 31Cuih ni cu ni thianghlim ngaingai a si pei; rawl an ul pei ih zohman hna an ṭuan lo pei. Hi daan cu kumkhua-in an thlun pei. 32A pa-ih hnaṭuan sawngtu dingah felteih sahriak culhmi le Pathian hnenih hlanmi Puithiam Sang in thianfaiternak cu a tuah pei. Puithiam thilthuam a hruk pei ih, 33Hmun Thianghlim Bik, Bawipa umnak Puanthlam sung hmuahhmuah, biakṭheng, puithiam pawl le Israel mipi an zate hrangah thianfaiternak cu a tuah pei. 34Hi daan cu hmailam sanmureng tiang thlun ding a si. Hi thianfaiternak cu Israel mi pawl an sualnak thlah dingah le thianfaiter dingah kum khatah voi khat tuah a si pei.
Bawipa ih thupek bangtuk in Moses#16.34 Moses: timi ai-ah Aaron ti khal a si thei. Hebru Baibal sungah a tuah ti lawngin a um. in a tuah ṭheh.
Currently Selected:
PUITHIAM HNAṬUANNAK 16: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
