PUITHIAM HNAṬUANNAK 13

Phaarnat Thu-ah Thlun Ding Daan

1Moses le Aaron hnenah hi daan pawl cu Bawipa in a pek. 2Mi pakhatkhat in a vun ah hma a neih ahcun, a thlingmi a si lole, hnai a khuarmi a si lole, a bolmi menmen a si hmanah, misuan thei phaarnat ih a can thei ruangah amah cu Aaron hrin puithiam pakhatkhat hnenah fehpi a si pei. 3Amah cu puithiam in a zoh pei ih a hma sungih hmul pawl a raan ih a hma cu a kiangkapih vun hnakin a thuk deuh asile phaarnat a si. Puithiam in a zoh ṭheh hnuah amah cu mi thiangfai lo a si tiah a than pei. 4Asinain a vun a hmami cu a raang ih a kiangkap vun hnakin a thuk deuh cuang lo ih a sungih hmul pawl tla a raan lo ahcun amah cu puithiam in ni sarih sung a dangte in a ret pei. 5Ni sarihnak ni ah puithiam in a zoh sal pei ih a hmuhnak ah a hma cu amah keel a si ih a besiat cuang lo a si ahcun ni sarih sung a dangte in a ret sal pei. 6Ni sarihnak ah puithiam in a zoh sal lala pei ih a hma cu besia sinsin loin a dam deuh a si ahcun amah cu a thiangfai a si, tiah a than pei. A hma cu hma menmen lawng a si. A hnipuan a sawp thluh pei ih mi thiangfai a si ding. 7Sikhalsehla puithiam in a zoh ih a thiangfai a si a ti hnuah a hma a besiat sal a si ahcun puithiam hnenah a feh sal pei. 8Puithiam in a rak zoh sal pei ih a hma a karh sinsin a si ahcun mi thiangfai lo a si tiah a than pei. Phaarnat a si.

9Mi pakhatkhat phaarnat a neih tikah amah cu puithiam hnenah fehpi a si peh ih, 10puithiam in a zoh pei. A vun hma cu a raan ih a hma sungih hmul pawl tla a raan ih a hnai a um ahcun, 11a dam thei lomi phaarnat a si. Puithiam in mi thiangfai lo a si tiah a than pei. Mi thiangfai lo a si zo hrangah a dangte ih ret ih zoh a ṭul nawn lo. 12Cun a hma cu a zai vivo ih a taksa ruangpi a khah ṭheh ahcun, 13puithiam in a zoh sal pei. A taksa ruangpi a khat ṭheh ngaingai a si ti a hmuh ahcun mi thiangfai a si, a ti pei. A vun zatein a raan ṭheh ruangah mi thiangfai a si. 14Sikhalsehla a titsa ngaingai a hmat ahcun cutiih a hmat vete in amah cu mi thiangfai lo a si. 15Puithiam in a zoh sal pei ih a titsa a hmami a hmuh ngaingai ahcun amah cu mi thiangfai lo a si, tiah a than pei. A titsa tiangih a hmat ahcun phaarnat a si ruangah amah cu mi thiangfai lo a si, miphaar a si. 16Asinain a titsa hma a dam ih a raang menmen lawng a si sal ahcun puithiam hnenah a feh pei. 17Puithiam in amah cu a zoh pei. A titsa hma cu a raang ih a can sal ahcun puithiam in mi thiangfai a si, tiah a than pei ih mi thiangfai ah a cang pei.

18Mi pakhatkhat khuaihli hma a nei ih a dam hnuah, 19a damnak hmun ihsin a thling ih a raan a si ahcun, a si lole sen-ngo-thlak in a bol mi a suak sal a si ahcun puithiam hnenah a hmuh-aw pei. 20Puithiam in a zoh pei ih a hma cu a kiangkapih vun hnakin a thuk deuh ih a hma sungih hmul pawl a raan ahcun mi thiangfai lo a si, tiah puithiam in a than pei. Khuaihli hma in a thok naan phaarnat a si. 21Sikhalsehla puithiam in a zoh tikah a hma sungih hmul pawl a raang lo ih a kiangkap vun hnakin a hma cu a thuk lo ih a pianzia cu a raang nawn a si ahcun puithiam in amah cu a dangte in ni sarih sung a ret pei. 22A hma a zai vivo a si ahcun puithiam in mi thiangfai lo a si tiah a than pei. 23Asinain a hma cu amah keelin a um ih a zai cuang lo a si ahcun khuaihli hma sii lawng a taang a si hrangah amah cu mi thiangfai a si, tiah puithiam in a than pei.

24Mi pakhatkhat meisa in a kang ih a titsa a raan ahcun, a si lole sen-ngo-thlak a si ahcun, 25puithiam in a zoh pei ih a hma sungih hmul pawl a raan ih a kiangkap vun hnakin a thuk deuh ahcun meisa kangnak ihsin a suakmi phaarnat a si ih, puithiam in mi thiangfai lo a si, tiah a than pei. 26Asinain a hma sungih hmul pawl a raang loih a kiangkap vun hnakin a thuk deuh lo a si ih a pianzia a raang nawn a si ahcun, puithiam in amah cu ni sarih sung a dangte in a ret pei. 27Ni sarihnak ni ah puithiam in a zoh sal pei ih a hma cu a zai vivo a si ahcun phaarnat a si hrangah puithiam in mi thiangfai lo a si, tiah a than pei. 28Sikhalsehla a hma cu a keel in a um ih a zai lo ih a pianzia cu a raang nawn a si ahcun phaarnat a si lo, a thling men a si. Curuangah amah cu puithiam in mi thiangfai a si tiah a than pei; ziangahtile meikang hma sii lawng a si.

29Mipa siseh nunau siseh, a lu ah, asilole a khabe ah, hma a neih asile, 30puithiam in a zoh pei. A hma cu a kiangkap vun hnakin a thuk deuh ih a sungih hmul pawl a aihre ih a fatet ahcun phaarnat a si ih puithiam in mi thiangfai lo a si, tiah a than pei. 31Puithiam in a zoh tikah a hma cu a kiangkap vun hnakin a thuk deuh lo naón a hma sung hmul pawl cu hmul keel an si thotho lo ahcun puithiam in ni sarih sung a dangte in a ret pei. 32Ni sarihnak ni ah puithiam in a zoh sal pei ih a hma cu a zai lo ih a hma sung hmul cu a aihre lo ih tlunah a kapih vun hnakin a thuk sawn lo a si ahcun, 33mi dam lo pa cun, a hma kapih hmul siar lo, a lu a met-aw pei. Cun puithiam in ni sarih sung a dangte in a ret sal pei. 34Ni sarihnak ni ah puithiam in a zoh sal lala pei ih a hma cu zai loin a kapih vun hnakin a thuk sawn fawn lo a si ahcun puithiam in amah cu mi thiangfai a si, tiah a than pei. Cupa cu a hnipuan a sawp pei ih mi thiangfai ah a cang ding. 35Sikhalsehla mi thiangfai a si, ti hnuah a hma cu a zai sal a si ahcun, 36puithiam in a zoh sal pei. A hma a zai ngaingai a si ahcun a hmul a aihre le aihre lo khal zoh a ṭul nawn lo; mi thiangfai lo a si ko. 37Sikhalsehla puithiam ih hmuhnak ah a hma cu a zai lo ih a hma sungah hmul tla ṭha tein a khoh a si ahcun a hma cu a dam a si ih puithiam in mi thiangfai a si, tiah a than pei.

38Mipa siseh nunau siseh a vun parah a raang ṭhukṭhi a um asile, 39amah cu puithiam in a zoh pei. A raang in a ṭialmi pawl cu a raang duakdi a si ahcun a vun parah a raang in a suak men a si ruangah amah cu mi thiangfai a si.

40-41Mi pakhatkhatih sam cu a hmailam siseh, a dunglam siseh, a tlok khalle mi thiangfai lo a si lo. Lukawng menmen a si. 42Sikhalsehla a lukolh ah sen-ngo-thlak hma a um a si ahcun phaarnat a si. 43Puithiam in amah cu a zoh pei ih sen-ngo-thlak hma a um ngaingai a si ahcun, 44puithiam in mi thiangfai lo a si, tiah a than pei. Ziangahtile a lu ah misuan thei hma a nei a si.

45Zokhal siseh phaarnat a neimi cu hnipuan tlek a hruk pei, a sam hriat loin a thlah pei ih a hmur hup in, “Mi thiangfai lo ka si, mi thiangfai lo ka si,” tiah a au pei. 46Hi nat a neih sung hmuahhmuah cu mi thiangfai lo ringring a si pei ih hnarpawn ah amah lawng a um pei.

Thil Mawr Pawl Um Tikih Tuah Dingmi

47Tuuhmul hnipuan siseh, a si lole pat hnipuan siseh, hnipuan a mawr a si ahcun, 48a si lole tuuhmul hnipuan siseh, pat hnipuan siseh, hnipuan khuimaw parih a mawr malte a um a si ahcun, a si lole savun parah siseh, savun ih tahmi thilri pakhatkhat parah siseh, a mawr a um a si ahcun, 49a pianzia a tangphaw nawn a si lole a sen nawn a si ahcun, a zai mi mawr a si hrangah puithiam hnenah hmuh ding a si. 50Puithiam in a zoh pei ih ni sarih sung cuih thil cu a dang tein a ret pei. 51Ni sarihnak ni ah a zoh sal pei ih a mawrmi cu a zai a si ahcun cuih thil cu thil thiangfai lo a si. 52Puithiam in meisa in a ur pei, ziangahtile a zai thei mi mawr a si hrangah meisa in ur ding a si.

53Sikhalsehla puithiam in a zoh tikah a mawr cu cuih thil parah a zai lo a si ahcun, 54cuih thil cu a sawpter pei ih ni sarih sung an ret sal pei. 55Cuih hnuah a zoh sal pei ih a zai lo naón a mawr ih pianzia a lamdang cuang lo a si ahcun thil thiangfai lo thotho a si pei. A mawrnak cu dunglam a si khalle hmailam a si khalle cuih thil cu nan ur pei. 56Asinain puithiam in a zoh sal tikah a mawr cu a reh zo a si ahcun hnipuan a si lole savun ih a mawrnak zawnte lawnglawng a thlek pei. 57Cule a mawr sal lala ih a zai vivo a si ahcun a neitu in a thil cu a ur pei. 58A thil cu a sawp ih a mawrnak neh a hlo thei a si ahcun a sawp sal hnuah a thil cu thil thiangfai ah a cang ding.

59Himi cu tuuhmul hnipuan siseh, pat hnipuan siseh, hnipuan a mawr tikah, a si lole pat hnipuan siseh, tuuhmul hnipuan ih khuimaw zawn ah siseh, a si lole khuimaw zawnih savun ih tuahmi thil a mawr tikah siseh, tuah dingmi daan a si.

Currently Selected:

PUITHIAM HNAṬUANNAK 13: FCL

Highlight

Copy

Compare