JOB 36
36
1Elihu in a thu hiti in a zom sal:
2Pathian ai-awh in ka ṭongmi hi
Thinsau in rei deuh ngai hrih aw.
3I Siamtu Pathian hi a ding a si
ti langternak ah,
Ka thutheihnak a kim nasami hi
ka theih tawkin ka hmang ding.
4Na hnenih ka ṭongmi hi a dik
lomi a um lo;
Na hmaiah mifim taktak cu a um ih
na hmu a si.
5Pathian cu a maksak ngaingai ih
hmuhsuam mi a nei lo;
Theih lomi khal a nei lo.
6Misual pawl cu a zuah lo;
Mifarah pawl thu cu dingtein
a relsak a si.
7Miding pawl cu a hum;
Siangpahrang vekin mi uktu ah
a tuah ih,
Kumkhua in sunlawi upatnak a coter.
8Sikhalsehla milai in anmah ih
thil tuahnak ruangah,
Zonzaihnak an tuar ih cikcin ih
ṭemṭawnnak an ton ahcun,
9Pathian in an sualnak le an
puarthaunak an hnenah a langter.
10Ṭhatlonak ihsin kir sal dingah
an hna a ongter ih ralrinnak thu
a sim.
11Pathian thu an thlun ih amah an
rian a si ahcun,
An nundam sungah hnangamnak le
neihnunnak an dong a si.
12Pathian thu an thlun lo ahcun
ralnam in a siatsuah hai ding ih,
Zianghman thei loin an thi ding.
13Pathian thei lo pawl cu an thin
a ṭeu ringring;
Harsatnak an ton hmanah bomnak
dil in thla an cam lo.
14An san ṭhat laiah an thi ih
An nunnak cu ningzahnak in a cem.
15Sikhalsehla Pathian in minung cu
an harsat tuarnak sungin a run ih,
Harsatnak cu an mit vangtertu ah
a vanter a si.
16Pathian in harsatnak sungin a lo
suah ih,
Himnak sungah nuamzetin a lo ret;
Na cabuai cu eiding rawl in a khat.
17Asinain atu-ah miṭha lo pawl ih
an tuar ṭheumi hremnak na tuar;
Na sualnak thawn mil-aw in
na tuar a si.
18Ralring aw! Nawhthuh ei-nak in
lo bum hlah seh,
Lennak in lo hruaisual hlah seh.
19Bomnak duh ah na au rero khalle
a ṭhahnem lo ding,
Thazaang na neih mi hmuahhmuah in
a lo bawm thei lo ding.
20Zan a ra thlen dingmi cu
hngakhlap duh hlah;
Miphun tampi an hlohralnak
tikcu a si.
21A ṭha lomi lamah feh hlah;
Culam hoi lo dingin a lo khamtu
dingah harsat tuarnak tontermi
na si.
22Pathian ih huham a tumzia cu
cing ringring aw;
Pathian cu zirhtu saya ṭha bik
a si.
23Zohman in Pathian cu hnaṭuan
an fial thei lo ding,
Thilsual tuah tla an puh thei lo
ding.
24Pathian cu a thil tuahmi
ruangah an thangṭhat ringring;
Nannih khal in amah cu nan
thangṭhat ve pei.
25A thil tuahmi hmuahhmuah cu
zokhal in an hmu zo,
Asinain lamhlapi lawngin kan cuan
thei a si.
26Pathian ih maksakzia cu
kan thei kim dah lo;
Pathian ih kum khal siarcawk
rual a si lo.
27Leilung ih tidai la tahrat in
Vanruah ih a sur tertu cu Pathian
a si.
28Thlaici cingtu milai hmuahhmuah
hrangah Pathian in,
Khawdur ihsin ruah a surter a si.
29Pathian umnak vanah ziangvekin
khawdur a feh tile,
Ziangtin khua a ri durdo ti
zohman in an thei lo.
30Amah in vanrang deng tiang
nimthla a kauter,
Asinain tifinriat ih tawdeng cu
a thim thotho.
31Cutiin amah in ruah a surter ih
milai a cawm hai;
An ei ding rawl tampi a pek.
32Nimthlakau a kut in a huam ih,
A hmuitin ngah dingin ṭektla cu
thu a pek.
33Thlisia a rat ding kha khawri
in a than;
Cawrual khal in a rat ding cu
an thei.
Currently Selected:
JOB 36: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
