JOB 35
35
1-2Job, nang in, “Pathian hmaiah
mawhnak ka nei lo,” na ti hi
a dikmi a si tiah na ruat mawsi?
3“Ka sual lonak hin ziangso
i ṭhathnempi?
Sual ningla teh kei hrangah ziang
so a sawt cuang?” tiah na ti.
4Nangmah siseh, na rualpi pawl siseh
Keimah in thu ka lo let ding.
5Van khi hun zohhnik! Khawdur tla
khi hun zohhnik!
Ziangtluk in so nang hnakin an saan?
6Na sual a si hmanah Pathian cu
harsatnak a pe lo.
Thilsual voi tampi na tuah hmanah
Pathian cu a hnaihnok lo.
7Na dingfel ruangah Pathian ka
bawm tiah na ruat mawsi?
Na hnen ihsin Pathian ih haimi
zianghman a um lo.
8Na sual ruangih a tuartu cu
nangmah ih rualpi an si.
Na ṭhatnak ih a bommi cu anmah
thotho an si.
9Milai cu hremnak an tuar tikah
an hui an aihram ṭheu;
Runtu pakhatkhat hnenah runnak
duh ah an dil ih an au.
10Sikhalsehla harnak caan ngaingai
a thleng ih anmah thazaang a petu,
Anmah Siamtu Pathian cu an hoih
duh lo.
11Ramsa le vate hnakin fimvar
deuh ih in tuahtu,
Pathian cu an pan duh hrimhrim lo.
12Bomnak duh ah an au, an ṭap,
Asinain Pathian in a sawn hai lo;
Miṭha lo le mihngal an si ruangah.
13An au rero man a um lo,
Ziangkimtithei Pathian in a hmu lo;
A theih khal a thei hai lo a si.
14Job, nang cun Pathian ka hmu lo
na ti;
Asinain thinsau zetin hngak aw,
Na thuhla a hmaiah a thleng a si.
15Pathian ih thinhengnak in mi
a hrem lo,
Sualnak khal a poisa lo, tiah
na ruat.
16Sullam nei loin na ṭong men,
Na ṭong reromi ih tican ziang
a si ti zianghman na thei lo.
Currently Selected:
JOB 35: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
