JOB 34
34
Elihu in hiti in a peh sal:
1-2Nannih mifim le thuthei pawl,
Ka thusimmi hi ngaihnik uh.
3Rawl cu nan tep ih a thawt le
thawt lo nan thei;
Nan hna in thu nan thei ih thudik
a si le si lo nan thei.
4Na thu cu thudik a si le si lo
kan hril pei;
Thu ṭha a si le si lo khal
kan ruat hnik pei.
5Job in, “Mawhnak ka nei lo;
Ka parah Pathian in dingtein thu
a ṭhen lo;
6Ziangtin so ka mawh ngai a si,
tiah thuphan cu ka rel thei ding?
Ka hma hi dam thei sal ding rual
a si lo,
Asinain sualnak cu ka nei lo,”
a ti.
7Job vek milai nan hmu dah maw?
Pathian hmuhsuamnak cu ol tein
a rel;
A hrangah cun tidai in tluk in
a ol a si.
8Miṭha lo pawl thawn pawl awk
a duh ih,
Misual pawl thawn an feh tlang
ringring.
9Pathian ih rualpi ṭha si hi
Zianghman ṭhathnemnak a um lo,
a ti.
10Nannih theihthiamnak a nei pawl
I ngai uh!
Pathian in thil ṭha lo a tuah
ding maw?
Ziangkimtithei in thil sual a tuah
ngai ding maw?
11Milai cu an hnaṭuan thawn kaih-aw
in hlawhman Pathian in a pek,
An tuahmi ziaza thawn mil-aw in
an parah a thlenter a si.
12Ziangkimtithei Pathian cu
zo ih par hmanah a ding lomi a tuah lo;
Zokhal bangraan tein a zoh.
13Midang zotal in Pathian hnenah
thuneihnak an pe maw?
Leilung pumpi hi kil aw,
tiah zotal in ṭuanvo an pe maw?
14Pathian in a thlarau a lak ih
nunnak thaw a lak kir a si ahcun,
15Nunnak nei mi hmuahhmuah hi
an thi ding ih,
Minung hi leivut ah a cang sal
ding a si.
16Fimnak nan neih ngaingai
a si ahcun i ngaihnik uh!
17A dingmi le a nasami Pathian
nan hnong a si maw?
Pathian in thudik a hua, sisehla
ziangtinso leilung a uk thei ding?
18Pathian in siangpahrang le
hotu pawl a hnong,
Santlai lo le mi ṭha lo
an si ahcun.
19Pathian in mi hmuahhmuah a tuah,
Zohman a thleidang lo;
Uktu bawi a ṭan loih mifarah hua
in milian a duh cuang lo.
20Milai cu rinlopi in zanah
an thi thei;
Pathian in a vuakthluk ih an hlota.
Micak zet khal ziangtitham loin
a cemter a si.
21Pathian in minung lamzin a zoh,
Milai ih ke kar cu a zohhliah!
22Ziangvek thimnak a si khalle
misual hmu lo dingin Pathian a
phen theitu thimnak a um lo.
23Pathian hmaiah milai feh tahrat
in a thu ṭhen dingah,
Pathian in tikcu khiah a ṭul lo.
24Hotu pawl hnong tahratin
hotu dang re dingah,
Pathian in an thu zingzoi rero ta
a ṭul lo.
25Ziangahtile an tuahmi fate bik
khal a thei ṭheh;
Zan ah a hlon hai ih
a siatsuah ṭheh.
26Misenpi hmuh theinak hmunah
misual pawl a hrem;
27Ziangahtile
amah an thlun duh nawn lo ih,
A thukham hmuahhmuah tla
an poisa nawn lo.
28Anmah pawl in mifarah an tisiat
ruangah an hui ih an ṭap;
Mifarah pawl ih bom dilnak aw cu
Pathian in a thei.
29Pathian in umsan meen dingih
a ruah ahcun,
Zoin so an mawhthluk thei ding?
A hmai a thuh ahcun milai in
ziangso an ti thei ding?
30Anmah uktu ah Pathian thei lo,
mi-neh-nen hmang ret hman sehla,
Ram sungmi pawl in ziangso an ti
thei cuang ding?
31Job, Pathian hnenah na sualnak
na phuang zo maw?
Sual nawn lo dingin
thu na kam-aw zo maw?
32Ka mawhnak i hmuh hram aw,
tiah na dil maw?
Thil ṭha lo tuah nawn lo dingin
na lung a kim zo maw?
33Pathian ih hnaṭuannak
na soisel zo hnuah,
Na duhmi lo tuahsak dingah
na beisei lai mawsi?
Hi thu cu nangmah ruahcat ding a si,
Kei ih ruahcat ding a si lo!
Atu-ah na ruahnak in sim hnik!
34Thu a ruat thei pawl cu an lung
a kim ko ding;
Ka thusimmi a theitu mifim pawl
an ti ve ko ding:
35Job hi thuhla thei ngah loin
a rak ṭong pang a sihi!
A ṭong mi hi sullam a rak nei lo
a sihi! an ti ko ding.
36Job ih ṭong hi ṭhateih
nan ruat a si ahcun,
Miṭha lo pakhat vekin a ṭong a si,
ti nan hmu ko ding.
37A sualnak ih tlunah dodalnak
a beet ih,
Kan mithmuh le kan hna theih ah
Pathian a hnihsan, a hmuhsuam a si.
Currently Selected:
JOB 34: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
