JOB 33
33
1Curuangah Job, ka ṭong dingmi
hmuahhmuah hi ṭhatein ngaihnik.
2Ka thinlung ih a ummi ka hmurka
in a suak ding;
3Ka ṭongmi hmuahhmuah hi ka
thinlung ih ummi thungai an si;
Felte in ka sim ding.
4Pathian ih thlarau in i tuah ih,
Ziangkimtithei ih thaw in nunnak
i pek.
5I let hnik, i leh thei asile,
Na ṭong dingmi cu ruat hnik!
Ka hmaiah ding in ṭang hnih!
6Nang le kei cu Pathian hmaiah
kan bangrep.
Kan pahnih in tlaklei ih tuahmi
kan si.
7Curuangah i ṭih duh hlah;
Ka lo neh-nen ciamco lo ding.
8Na ṭong ka theih mi cu:
9“Mawhnak ka nei lo, thilṭha lo
zianghman ka tuah lo;
Mawh nei lo ka si ih sualnak in
ka luat.
10Asinain Pathian in i do duh
ruangah thu a hawl ih,
a ral vekah i tuah.
11Ka ke thir cikcin in a ṭeem ih
Ka ke kar hmuahhmuah tla
a zohhliah a si,” na ti.
12Asinain Job, fiangtein ka lo sim:
Na palh a si!
Pathian cu zovek milai hnak hman
in a tumsawn a si.
13Ziangah so milai ih phunzainak
a sawn dah lo tiah,
Pathian cu na mawhthluk rero?
14Pathian cu milai hnenah atu le
atu a ṭong,
Asinain a ṭongmi cu zianghman ah
an siar lo.
15Milai an itthat lai, an mang ah
Mang le langnak in an hnenah
a ṭong.
16A ṭongmi ngai dingah an hna
a ongter ih a sim,
Ralrinnak a simmi kha an ṭih.
17Sualnak tuah nawn lo dingah le
Mi puarthau si nawn lo dingin
a sim.
18Thlankhur sung a thlenter hai lo;
Thihnak ihsin a run hai a si.
19Pathian in milai nun a sim tikah
natnak a tuarter,
An taksa pumpi in natnak a tuar.
20Mi dam lo pawl cun rawl ei
an hiar lo;
Rawl thaw bik hman an luak a suak.
21An taksa a cem deuhdeuh ih
An ruh lawng a taang.
22Thlankhur an pan deuhdeuh,
Mithi khua an thleng cing ding.
23Milai ṭuanvo simfiangtu dingah,
Pathian vancungmi thawng tampi
lakah pakhat tal,
Cuih milai bawm ding le a dikmi
sim dingah a ra meen ding.
24Vancungmi in zaangfahnak thinlung
thawn, “Anih kha cu thlah uh!
Mithi khua ih feh dingmi a si lo;
Amah tlennak man hinah a um,”
a ti ding.
25Cutiin a taksa cu a no ding ih
a cak sal ding.
26Thla a cam tikah Pathian in
a let ding,
Lungawi in Pathian a bia ding ih,
Pathian in a hrangah ziang
hmuahhmuah a tluangter sal ding.
27Cule anih in misenpi hmaiah,
“Ka sual a si, a dik lo ka tuah,
Asinain Pathian in ka nunnak i zuah.
28Thlankhur feh ding i siang loih
Sun khawtleu ka hmu hrih a si,”
a ti ding.
29Cutiin Pathian in atu le atu hna
a ṭuan;
30Mi nunnak cu thlankhur thleng
loin a run ih,
A san sungah lungawinak a pek.
31Curuangah Job, ka lo sim mi hi
ngai aw;
Daite in um awla ka ṭong hrih
ding.
32Asinain thusim ding na neih
asile sim aw, ka ngai ding;
Lungawite in na dik a si ka ti
ding.
33Cuti a si lo ahcun daitein um
awla i ngai aw;
Fimnak thu ka lo sim ding.
Currently Selected:
JOB 33: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
