JOB 32
32
Elihu Ih A Simmi
(32.1—37.24)
1Job ih rualpi pathum in Job cu an sawn duh nawn lo, ziangahtile mawh nei lo ah a ruat aw tuk. 2Cutiin Job cu miding ah a ret-aw ih Pathian a mawhthluk ruangah an kiangih a dingtu Elihu an timi pa cu a thin a rak hengzet ih a suup aw thei nawn lo. (Elihu cu Ram hrin a si mi Buz tesinfa Barakel ih fapa a si.) 3Elihu cu Job rualpi pathum par khalah a thin a heng, ziangahtile Job ih ṭong an leh thei lo ruangah Pathian a palh a si, ti thawn a bang aw. 4Elihu cu nauta bik a si ruangah midang an ṭong a cem hlan lo daitein a rak um meen. 5Asinain a rualpi pathum in Job thu an leh thei lo tikah a thin a ṭeu ih hiti in a ti.
Elihu in:
6Kei cu nauhak ka si ih nannih cu
upa nan si;
Curuangah kei ka ruahmi hun sim
ding hi ka hreh zet.
7Nannih ṭong hmaisa ding nan si,
Upa deuh in nan fimnak in ṭawm
ding nan si, tiah ka ti.
8Asinain minung hnenah ra in
fimnak in petu cu,
Ziangkimtithei Pathian ih thlarau
a si.
9Minung cu an tar ruangah an fim
a si lo ih,
Thudik khal an thei a si cuang lo.
10Curuangah i ngai ve hnik uh
ti ka duh,
Ka ruahmi ka lo sim ve ding.
11Nan ṭong sung hmuahhmuah kha
thin sau zetin ka rak ngai,
Fimnak ṭongkam nan hawl rero
laiah ka lo hngak ringring.
12Ṭhatein ka lo ngai ih nan neh
lo a si ti ka thei.
Job ih a ṭongmi pawl nan el thei
lo a sihi!
13Ziangtin so fimnak neitu kan si
tiah nan ti ngam?
Job a sawn theitu cu Pathian a si,
Nannih cun nan ti thei nawn lo.
14Job cu nan hnenah a ṭong,
ka hnenah a ṭong lo;
Asinain a thu nan leh vek cun ka
let dah lo ding.
15Job, ṭong ding an thei nawn lo;
Na thu an lo sawn thei lo.
16Daite ih an um tiang maw ka
hngah ding?
Ṭong ding zianghman nei nawn
loin an ding meen!
17Asilo, keimah in atu ah ka lo
sawn ding;
Ka ruahnak ka lo sim ding.
18Ṭong loin ka um thei nawn lo,
Ka sungah ka ṭong dingmi a khat
tuk thlang.
19Ṭongnak tikcu ka neih lo asile
sabitti thar a khatmi saphaw thawl
a kuai vekin ka puak kuai ding.
20Ka ṭong hrimhrim a ṭul a si,
Cuti lawngin ka thaw a suak ding;
Ka kaa in ka simsuak hrimhrim ding.
21Hi thu ah zohman ṭan cuangmi
ka nei lo ding;
Zohman ka porh hlei lo ding.
22Mi porh khal ka thiam lo;
Mi ka porh asile hmakhatte ah
Pathian in i hrem ding.
Currently Selected:
JOB 32: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
