JOB 30
30
1Asinain atu-ah cun ka hnak ih
mino deuh tla in,
Hnihsuahsainak meen ah in hmang;
An pa le pawl cu zianghman ih
ṭhahnem lo,
Ka tuu kiltu ka uico bawmtu hmanah
ka duh lomi pawl an rak si.
2Tha nei lo micor pawl,
ka hrangah zianghman ṭuan thei
ding lo pawl kha!
3An farah, an ril a rawng tuk ih
Zan khawthim ramṭhing tla ahcun
Thinghram ro hman a nget rero
ding pawl an si.
4Nelrawn hrambur an bawt ih an ei,
Thawtnak zianghman nei lomi
hmunphiah kung tla an ei.
5Mi hmuahhmuah in an hauh ih an
dawihlo;
Fifir nan hauh vek khin!
6Lungpuk le khaam ih an laih mi
kua sungah an um.
7Hramlak ah ramsa bangin an ai,
Hrambur thuai ah an ben aw.
8Mi ṭhahnem lo, zianghman ih
siartlak lo rual,
Ram sung ihsin dawihlomi an si.
9Atu ahcun an ra ih in ra hnihsan,
Kei cu an puahcokmi lawng ka si.
10In ti daan cu luaksuakza a si;
Ka hrangah cun mi ṭha tukah an
ruat aw,
Ra tahrat in ka hmaiah cil in ra
phui.
11Pathian in mi ṭawnṭai le
bawmtu nei lo ih i tuah ruangah,
An thinhengnak cu ka parah an
burh ciamco.
12Miburpi in suupnak neiloin in do,
In dawi ih tlanhloter in tum;
Neta bik siatsuah ding an timtuah.
13Ka luatnak lamzin in in khan ih
a siatsuah in tum;
A rak khamtu zohman an um lo.
14Ka ṭankhuarnak hruang pawl
an pahtlang ih,
Ka parah an rung tla ciamco.
15Ṭihphannak in i neh,
Ka hminthannak le huham ka neihmi
cu thli vekin an hlo ṭheh.
Ka lennak cu mero vekin a hlo.
16Atu cu thih ding lawng ka baak;
Ka tuarnak a deem deuh ti a um
dah cuang lo.
17Zan ah ka ruh hmuahhmuah in a na;
I ṭam rerotu cu reh ti a um dah
cuang lo.
18Pathian in ka angki hngawng in
i kai ih,
Ka hnipuan peeng ṭheh in i dirh.
19Ciarbeek sungah i hlon ih
Hnawmhne le vutcam tluk ka si zo.
20Pathian, ka lo ko naón i sawn
dah lo;
Thla ka cam khalle i umsan meen.
21Zaangfah nei loin i tisiat a si.
Na tha neih tawp in i hrem.
22Thli i sem hloter;
Thlisia lakah nangmah in i hlon
ciamco.
23Milai zokhal ih ton ciar dingah
relcat ciami,
Thihnak ah i thlenpi tum a si,
ti ka thei.
24Zaangfahnak dil dah ti lo,
zianghman a ti thei nawn lotu,
A thinlung le a taksa
a siat ṭheh zo mipa cu
ziangah so na do duh rero?
25Harsatnak a tongtu hnenah ka
ṭap ih,
Mi tlasam hrangah ka riah a sia,
a si lo maw?
26Lungawinak le tleunak ka ruahsan
mi an si naón,
Vansaannak le thimnak riangri an
ra thleng.
27Ka thinlung cu donharnak le
natnak thawn a buai nasa,
Nitinte tuarharnak in i tlun sinsin.
28Natnak ka tuar ih ka dum ṭheh,
Tleunak malte hman ka ngah lo;
Misenpi hmaiah ding tahrat in
bomnak ka dil.
29Ka aw cu hramlak ih cinghnia le
sumbuh ai bangin,
Riahsia le lunglengza aw a si.
30Ka vun hmuah a dum ṭheh;
Khurhnat in ka na ih ka taksa cu
meisa ling in a ling.
31Lungawinak hlasak thawm ka rak
theihnak hmunah,
Atu cu riahsiatnak le ṭahnak aw
lawng ka thei.
Currently Selected:
JOB 30: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
