JOB 29
29
Neta Bik Job Ih Simmi
1Job cu hiti in a ṭong sal:
2Ka nunnak hi a hram in thok thei
sal sehla,
Pathian in i rak zoh camcin lai
vek khan!
3Pathian ih mei-inn cu ka lu parah
a tleu ih,
Khawthim sung ka feh tikah tleunak
i pek.
4Culai ahcun ka rak neinung zet ih
Pathian ih pawlkomnak ruangah ka
innsang cu a him.
5Ziangkimtithei Pathian ka hnenah
a rak um ih,
Ka faate pawl khal ka kiangkap ah
kimtein an um.
6Ka caw le ka me pawl in hnawi
tampi in pek;
Lungkhol lak khalah ka olif kung
an kho thei.
7Khawsung upa pawl an ton awknak
khawpi kotka ih ka to ve tikah,
8In hmuh vete in mino pawl cu an
kiang,
Upa pawl tla in upatnak langter
in an ding.
9An hotu pawl an ṭong nawn lo,
An hmurka huh mi an bang.
10An lakih mi upa pawl tla an dai
khepkhep. An lei a caang nawn lo.
11I hmutu le ka thu i theitu pawl
hmuahhmuah in,
Ka hnaṭuanmi ruangah in porh zet.
12Mifarah an au tikah ka bawm,
Ngakṭah zonzai zohman bawmtu
nei lo ka zoh hai.
13Awloksong vansaanglam mi pawl in
in thangṭhat zet,
Nuhmei pawl tla himnak le thinlung
nomnak ka hawl sak.
14Dingfelnak cu hnipuan bangin
ka hruk ih,
Dingthluk lairelnak cu puanfual le
lupawng bangin ka hruk.
15Mitcaw pawl hrangah an mit
can-ai ka si;
Ke-awl pawl hrang khalah an ke
can-ai ka si.
16Farah zonzai hrangah pa ka si ih
Ka theih lo mikhual pawl harsatnak
an ton tikah ka ṭan hai.
17Zaangfahnak nei lo thuneitu pawl
ka siatsuah ih,
An hremmi pawl ka luatter hai.
18Kum reipi nung dingah le
Ka inn sungah thlangamte ih thi
dingah ka ruat aw ringring.
19A hrihram in tidai a ngahtu le
A hnge in daitla a dong ringringtu
thingkung vek ka rak si.
20Zokhal in in lawm, i relsiatu
zohman an um lo;
Ka thazaang a ṭum suk lo.
21Midang hnen ruahnak ka pek tikah
Daite in ka thu cu an ngai.
22Ka sim ṭheh tikah kam khat hman,
El ding le beet ding an nei lo.
Ka ṭongmi cu an sungah ruahti
bangin a pil.
23Zokhal in ka ṭong ngai ding an
hiar zet,
Lothlo pawl in ṭoruah an duh
zet bangin.
24An thin a nau tikah ka mithmai
ṭha ka langter;
Hni suamso ih ka um tikah an thin
a nuam sal.
25Hotu hna ka ṭuan ih thurel
ṭulmi ka relcat;
Siangpahrang in a ralkap pawl
a ho vekin ka ho;
An riah a siat asile ka hnem hai
a si.
Currently Selected:
JOB 29: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
