JOB 23
23
Job in hiti in a sawn:
1-2Pathian parih ka phunzainak cu
a besia deuhdeuh,
Ka hrumraknak khal a zual sinsin,
Ka parih a kut a rih tuk ruangah.
3A fehnak lamzin thei ningla,
A umnak hmun khal thei ningla,
ka va duh so!
4A hnenah ka thu ka thlenter ding;
Ka thu cu famkim zetin ka sim ding.
5Ka hnenih a ṭong dingmi le
I son dingzia tla theih ka duhzet.
6A huham neih zat in Pathian in
i do pei maw?
Do hlah e, ka ṭong mi ṭhatein
a ngai sawn ding.
7Ka fel a si, Pathian thawn thu
kan rel tlang ding;
Mawhnak na nei lo, tiah kumkhua
daih in i ti ding.
8Nisuahnak lamah ka hawl zo,
Cunah Pathian a um lo.
Nitlaknak lamih ka hawl khalle
a um thotho lo.
9Pathian cu saklam le thlanglam ah
hna a ṭuan;
Asinain ka hmu thei cuang lo.
10Pathian in ka kekar kar khat
tiangin a hmu,
I hniksak asile sui vekih ka thian
kha a thei ding.
11Ka hrangih a hrilmi lamzin cu
feltein ka thlun;
Vorhlam ah siseh, kehlam ah siseh,
ka pial hrimhrim lo.
12A hmurka ihsin a suakmi thupekmi
cu pialsan loin ka tuah ringring;
Ka duhmi si loin amah ih duhmi ka
thlun ringring.
13Pathian cu a thleng aw dah lo;
Zohman in an dodal thei lo ding ih,
A tuah duhmi cu zohman in an kham
thei lo ding.
14Ka hrangih tumtahnak a neih mi
pawl a kimter ding,
Cuih tumtahnak tlunah tumtahnak
dang tampi a nei.
15A hmaiah ṭihphang in ka khur,
Cumi ka ruah tikah cun ka ṭih.
16-17Ziangkimtithei Pathian in
ralṭhatnak ka neih mi hmuahhmuah
a hlohralter ṭheh;
Thimnak in ka mit cawtter hmansehla,
I ṭihtertu ngaingai cu thimnak
a si lo, Pathian Amah a si.
Currently Selected:
JOB 23: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
