JOB 20
20
Zofar in hiti in a sawn:
1-2Job, ka riah i siatter;
Na thu let loin ka um thei nawn lo.
3Na ṭong cia mi pawl hi hmuhsuam
nak ṭong an si;
Asinain ziangvek in ka lo sawn ding,
ti ka thei, theihthiamnak ka nei.
4Na theih vekin, hlanlaipi leilung
parih minung an um hramthok ihsin,
5Miṭha lo lungawinak cu tikcu tawite lawng a si.
6Ṭhangso in van tiang hmansehla,
A lu in vanrang dai hmansehla,
7Leivut vek thli in a semhlo ding;
A rak thei ciatu pawl in
‘Khuiah so a si’ an ti rero ding.
8Zanmang bangin a hlo ding;
Mang ih hmuh mi bangin
ziangtik hmanah hmuh sal a um
nawn lo ding.
9A hmutu mit in an hmu lo ding;
A um ṭheunak hmun in a hlo ding.
10Farah zonzai hnen ihsin a ruk mi
thilri pawl cu,
A fapa pawl in an lennak sungin an
pek kir ding.
11A nonal ih a cakvakmi a ruang cu,
Rei lote-ah leivut ah a cang ding.
12Thil ṭha lo cu a thlum zetin
a thei;
Curuangah a hrekkhat a ka sungah
a hmawm.
13A lei hnuai ah reipi a ret,
A thlummi kha a phui siang lo.
14Asinain cuih rawl a eimi cu
a pumpi sungah a kha;
Thihsii vekin a kha a si.
15Mi ṭha lo in a rukmi thilri cu
a luak sal ṭheh;
Pathian in a long sal, a pumpi sung
ta hman a phorh sal ṭheh.
16Mi ṭha lo ih a dolh mi cu
thihsii a si;
Rul hraang ih tur bangin mi a that.
17Tiva bangin olif siti a luangmi
cu a hmu lo ding;
Cawhnawi le khuaitizu a luangmi
khal a hmu lo ding.
18Hna a ṭuan sanmi hmuahhmuah
ei loin a hlon a ṭul ding;
A lennak thilri pawl nuam in
a hmang man lo ding.
19Ziangahtile farah pawl a namsuk
ih zianghman ah a siar hai lo.
Mi inn sak cia pawl tla a long.
20A duhhamnak cu cem ti a nei lo;
Curuangah a sunloih mi thilri hman
hum theimi zianghman a nei lo.
21A in a ei ih a hlah mi zianghman
a um lo;
A lennak cu a rei hlanah a cem.
22Hlawhtling zetin a um laifangah,
Vansan malmaknak a ra thleng;
Harsatnak le riahsiatnak nasa
zetin a hnenah a thleng a si.
23A duhzat in ei ko seh!
Pathian thinhengnak cu a hnenah
meisa bangin a alh ding ih
ruah bangin a parah a sur ding.
24Tlan a tum ih thir ralnam in
a luat hmanah,
Dar conkiang in a ngah ih a thin
a sun ngah.
25Conkiang cu a pum ah a phun aw,
Cuih conkiang cu an suah ngah;
A tleumi a zik hriam ihsin thisen
for khat hnu for khat a tla;
Cutikah a thinlung cu tuksumnak
in a khat.
26A khawl ciami thilri hmuahhmuah
cu siatsuah an si;
Milai ih muah lomi meisa in
amah le a innsang an kaang ṭheh.
27Hi pa sualnak cu van in a langter;
Amah do dingah leilung cu a tho.
28Pathian thinhengnak cu tilik
bangin a ra ding ih,
A lennak hmuahhmuah a zatein
a siatsuah ding.
29Mi ṭha lo pawl ih tonmi cu
cu bangtuk a si;
An hrangah Pathian ih lairel
ciami a si.
Currently Selected:
JOB 20: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
