JOB 19
19
Job in hiti in a sawn:
1-2Ziangtik tiang lawmmam so
nan ṭong in in hrem rero ding?
3A voi siarcawk lo in hmuhsuam,
Hitiih in hmuhsuam ruangah ningzah
nan thiam fawn lo.
4Sualnak ka tuah ngai hman sisehla,
Nannih natnak ziangso a um?
5Keimah hnakih miṭha deuh ah
nan ruat aw;
Ka tuarnak ruangah ‘A mawh’ tiah
in ruat.
6Mawhnak ih i retu cu Pathian a si
hi nan thei thei lo maw?
Keimah awk duh ah thang a kam a si.
7‘Thisen a luanter,’ tiih ka au
khalle zohman in an ngai lo;
‘I bawm uh’ ka ti khalle dingnak
a um cuang lo.
8Pathian in ka lamzin a phit ih
ka feh thei nawn lo;
Ka lamzin cu khawthim in a khahter.
9Ka sunlawinak hmuahhmuah
i long ṭheh zo;
Ka hminthannak hmuahhmuah a cemter
ṭheh zo.
10A kaa kipin i vuak ih i cemter,
Ka ruahsannak cu zanthing bangin
a hram in a phong,
Vuai ding le thi dingah i taanta.
11Ka parah a thinhengnak cu meisa
bangin a alh;
A ral ṭihnung bikah i ruat.
12Keimah do dingah a ralkap pawl
a thlah;
Phardawl lan thei dingah a lengin
leilung an dawl ih an khahsilh;
Ka deuthlam an kulh ṭheh.
13Pathian in a forh ih ka unau pawl
in in tlansan ṭheh;
I thei ciatu pawl khal mikhual ah
an cang ṭheh;
14Ka sungkhat pawl in in tlansan,
Ka rualpi pawl in in taanta.
15Ka inn ih a riak ṭheumi pawl
in in hngilh ṭheh zo;
Ka siahhlawh nunau pawl in mikhual
le ramdangmi ah in ruat.
16Ka hnen-um ka ko ih i awi lo,
Bomnak dil ih ka leem hmanah
in pan duh lo.
17Ka nupi in ka thaw namsia a tuar
thei lo;
Ka suahpi ka unau hman in in fih.
18Nauhak pawl in in hmuh tikah
in hmuhsuam ih in hnihsan.
19Ka rualpi ṭha bik pawl hman in
in ningsin,
Ka duhdawt bikmi pawl ka ralah
an cang.
20Ka ruh parah ka vun a thlai aw
niarniar;
A nung ti theih fangfang ka si.
21Nannih cu ka rualpi nan si!
I zaangfah hram uh!
Pathian kut in i vuak thluk a si.
22Pathian ih i hrem vekin ziangah so
nannih tla cun in hrem?
Hi tluk in tuarter hi tawk nan ti
lo maw si?
23Hitiih ka ṭong mi hi zotal in
rak khum hai sehla,
Cazual sungah rak ngan hai sehla
ka va duh so!
24Culole thirkhen thawn lungpheng
parah ṭelh in,
Kumkhua hmun dingin ngan hai sehla
ka va duh so!
25Asinain keimah i ṭantu cu
a nung ti ka thei;
A netnak ah leilung parah a ding
leh ding.
26Natnak in ka vun cu ei ṭheh
hmansehla,
Hitiih ka tisa thawn Pathian cu
ka hmu ding.
27Ka mit rori in amah ka hmu ding,
Midang si loin keimah rori in
ka hmu ding a si.
Cumi cu ka thinlung in a hngakhlap.
28‘Ziangtin so kan hrem thei ding?’
nan ti ruangah ka tha hmuah
a poih ṭheh zo.
Keimah hrem duh ah thudang nan hawl.
29Sikhalsehla atu cun ralnam ṭih
thlang uh!
Sualnak parih Pathian thinhengnak
a thlengtertu ralnam cu!
Cutiin thuṭhentu a um sokhaw ti
nan thei ding.
Currently Selected:
JOB 19: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
