EZEKIEL 9

Jerusalem In Hremnak A Tuar

1Pathian cun ringzet in, “Ra uh, hi khawlipi a hremtu ding nannih milai pawl, nan hriamnam rak keng uh,” tiah a ti. 2Hmakhatte-ah Biakinn saklam kotka lenglam in minung paruk an hung suak ih hriamnam an keng fingfing. An hnenah puan paate a sinmi minung pakhat a um ih cangannak thil a keng. An zatein an ra ih dar biakṭheng kiangah an ding.

3Cule Israel ih Pathian a um ti langtertu, a vaangzetmi tleunak cu, a rak um cianak cherubim ramsa nung pawl hnenin a hung kai ih Biakinn sangka lamah a ṭhawn. Bawipa in cangannak thilri a pai ih puanrang paate a sintu hnenah cun, 4“Jerusalem khawlipi pumpuluk ah feh awla hi khawpi sungih fihnungza thil an tuahmi ruangah riahsia le thinnuam lo ih a ummi hmuahhmuah pawl ih cal ah hminsinnak khen aw,” tiah a ti.

5Cule Bawipa in midang pawl hnenah cun, “Amah kha khawlipi sungah hei thlun uhla mi va that uh. Zohman zuah hlah uh; zohman zaangfah hlah uh. 6Patar pawl, tlangval pawl, fala pawl, nupinu pawl le nauhak pawl that ṭheh uh. Sikhalsehla a cal ih hminsinnak a neitu cu zohman dai hlah uh. Hi ka Biakinn ihsin thok uh,” tiah a ti kha ka thei. Curuangah Biakinn ih a dingmi hotu pawl par ihsin an thok.

7Pathian in an hnenah, “Biakinn cu borhhlawhter uh. A tual pawl cu miruak in khatter uh. Zamrang in thok uh,” a ti. Cuticun khawsung mi pawl cu an that.

8Cutiih mi an thah rero laiah cun keimah lawng ka si. Leilung ah ka bokkhup in ka hlon aw ih, “Maw Cungnungbik Bawipa, Israel ramsung ih a taangsun mi pawl thah ṭheh ding tiangin maw Jerusalem parah na thin a heng?” tiah napi in ka au ciamco.

9Cutikah Pathian in, “Israel le Judah mi pawl in tuksumza sualnak an tuah a si. An ramsung khuazakipah mi an that ih an khawpi Jerusalem cu thilsual in an khahter zo. Bawipa in kan ram in dungtun zo ih kan tuahmi khal in hmu lem lo, an ti. 10An parah zaangfahnak ka nei lo ding. Midang parih an tuah vekin an parah ka tuah ve ding a si,” tiah i ti.

11Cule cangannak thilri a pai ih puan paate a sintu cu a ra kir ih Bawipa hnenah, “Na thupekmi vekin ka tuah ṭheh zo,” tiah a sim.

Currently Selected:

EZEKIEL 9: FCL

Highlight

Copy

Compare