EZEKIEL 8

Ezekiel In Pathian A Hmuh Voihnihnak

(8.1—10.22)

Jerusalem Ih Milem Biaknak

1Sal kan taannak kum ruk kum, thla ruk thla, ni nga ni ah sal kaihmi Judah mi hotu pawl cu ka inn ah an ra ih an to. Rinlopi ah Cungnungbik Bawipa ih kut cu a huham thawn ka parah a rung thleng. 2Ka hun zoh ih meisa bangin milai pianhmang ka hmu. A taai tanglam cu meisa bangtuk a si; a taai tlunlam cu hnawtfaimi dar bangin a tle. 3Kut bangtuk a si mi in i run dawh ih ka sam in i run kaih. Cutiin Pathian ih thlarau cun thli lakah i cawi ih Jerusalem ah i ret. Pathian thinhengnak a suahtertu milem an retnak Biakinn saklam kotka ih a sunglam sangka ah i fehpi.

4Cutawkah Khebar Tivapi kap ka rak um lai ih ka rak hmuhmi, Israel ih Pathian umnak hmun a si ti langtertu, a vaangzetmi tleunak ka hmu. 5Cutikah Pathian in, “Milaipa, saklam hun zohhnik!” tiah i ti. Ka hun zoh ih Pathian thin a hengtertu milem cu kotka kiangih a ummi biakṭheng kiangah ka hmu.

6Pathian in, “Milaipa, thil an tuahmi hi na hmu maw? Ka hmun thianghlim ihsin a hlatnak ah i dawi vivotu, Israel mi pawl ih tuahmi thil fihnungza pawl hi zohhnik! Hi hnakih thil fihnungza sinsin na hmu ding,” tiah i ti.

7A lenglam tualih rung luhnak kotka ah i fehpi ih phar ong pakhat kha i hmuh. 8“Milaipa, khatawk ihsin phar kha hun bauhhnik!” i ti. Ka hun bauh ih sangka pakhat a um ka hmu. 9“Vunglut awla khatawkih fihnungza thil an tuahmi pawl kha vung zohhnik!” tiah i ti. 10Ka vunglut ih ka zoh tikah phar parah cun rul zuk pawl, a dang ramsa thiang lo zuk pawl le Israel mi pawl ih an biakmi zuk an suaimi pawl ka hmu. 11Cutawkah cun Israel hotu pawl upa sawm sarih an um ih Shafan ih fapa Jaazaniah khal a tel ve. Rimhmui urnak kheng an keng fingfing ih rimhmui an urmi ihsin meikhu a kai vivo. 12Cutikah Pathian in, “Milaipa, Israel hotu pawl in thupte ih khawthim sungah thil an tuahmi hi na hmu ngah maw? Khaan pakhat sungah a khat ih a ummi milem an be rero a sihi! Anmah cun, ‘Bawipa in in hmu lem lo! Kan ram a dungtun zo a si,’ an ti,” tiah i ti.

13Cule Bawipa in ka hnenah, “Hi hnakih thil borhhlawh an tuah kha na hmu hrih ding,” i ti. 14Cutiin Biakinn ih saklam kotka ah i fehpi ih nunau pawl an khuavang Tammuz#Tammuz an timi an khawzing cu hrampi a thih tikah a thi ve ih a cerhsal tikah a nungsal ve ti ih an zummi a si. Nunau pawl in a thih tikah an ṭah ṭheu. thih ruangih an ṭah rero kha i hmuh.

15 Bawipa cun, “Milaipa, hihi na hmu maw? Hi hnakih fihnungza na hmu hrih ding,” i ti. 16Cutiin Biakinn sunglam khaan ah i fehpi lala. Cutawkah, Bawipa ih innthiang sangka kiang biakṭheng le inntual karlakah cun minung kul hluannga tluk an um. Hmun thianghlim an dungtun ih nisuahnak lam hoi in an kuun ih a hung suak lai reromi ni cu an biak.

17Cutikah Bawipa in, “Milaipa, khikhi na hmu maw? Hi Judah mi pawl cun hitawk ih na hmuhmi thil fihnungza pawl an tuah ih tlunah an ramsung hmun kipah thisen suahnak an zaiter vivo naón an di a riam hrih lo. Hitawk Biakinn sung rori ah ra tahratin an ra tuah ih ka thin in hengter sinsin. Ziangtluk mitkemza #ziangtluk mitkemza timi hi khawvel pawl in an hnar ah thing hnge an thlaih ṭheu mi daan a ti duhmi a si. in so in hmuhsuam hi zohhnik! An hnar ah thinghnge tla an thlaih! 18Ka thinhengnak hmual cu nasa zetin an tuar ding a si. Zohman ka zuah lo ding, ka zaangfah fawn lo ding. Ka hnenah an aw neih patawp in thlacam in an au ding, asinain ka theihsak lo ding,” tiah a ti.

Currently Selected:

EZEKIEL 8: FCL

Highlight

Copy

Compare