EZEKIEL 10

Bawipa Sunlawinak In Biakinn A Tlansan

1Ramsa nung cherubim pawl lu tlunih tlunkhuh-kuum cu ka hun zoh ih a tlunlam ah safaira lungmankhung in tuahmi siangpahrang tokham bangtuk pakhat ka hmu. 2Pathian in puan paate a sintupa hnenah cun, “Ramsa nung cherubim pawl thuai ih a ummi lengke pawl karlak in va feh awla na sumpi khatión meiling keng aw. Cuih meiling cu khawpi parah va ṭhehdarh aw,” tiah a ti.

Ka zoh ih a va feh lai kha ka hmu. 3Biakinn sung a vungluh zawng ah cherubim pawl cu Biakinn thlanglam kapah an ding; cule Biakinn sunglam khaan cu mero in a khat. 4A tleu zukzomi Bawipa ih umnak tleu cu cherubim hnenin a hung kai ih Biakinn sangka lamah a ṭhawn. Cutiin Biakinn sung cu mero in a khat ih a tual cu a tleu pempem. 5Cherubim pawl ih thla khawn thawm cu a lenglam tual khalin a thang ṭheh. Ziangkimtithei Pathian ih aw vekin a thang.

6 Bawipa in puan paate a sintupa cu cherubim pawl hnuai ih a ummi lengke pawl karlakin meisa la dingah thu a pek ih cupa cu a feh ih lengke pakhat kiangah a ding. 7Cherubim pawl lakih pakhat in an kiang ih a ummi meisa cu a kutin a hei dawh ih meiling hrekkhat a hei lak ih puan paate sintupa kut sungah a ret. Cupa cun meiling kha a lak ih a suak.

8Cuih cherubim pawl cun an thla hnuai ciarah milai kut vek a si mi an neih fingfing kha ka hmu. 9-10Leengke cu an pali in an bangrep ih cherubim kiangah an um fingfing khal kha ka hmu. Leengke pawl cu lungmankhung vekin an tleu zukzo ih lengke pakhat sungah lengke dang pakhat dingzetin a tan zawng in a vunglut mi an nei fingfing. 11Cuih cherubim pawl an ṭhawn tikah her ṭul loin khuitawk lam khalah an ṭhawn thei hluahhlo. An feh duhnak lamah hmunkhatah an feh tlang hluarhlo; dunglam herta ṭul loin an feh tlang thei a si. 12An ruang pumpi, an dunglam zaangtluan, an kut pawl, an thla pawl le lengke pawl khal mit hlir in an khat. 13Hi lengke pawl cu hmaisabik langnak ih ka rak hmuhmi lengke pawl thawn an bangrep a si.

14Cherubim pakhat in hmai pali fingfing an nei. Hmaisa bik cu cawcang hmai a si; pahnihnak cu milai hmai a si; pathumnak cu kiosa hmai a si ih palinak cu muvanlai hmai a si. 15(Hi cherubim pawl cu Khebar Tivapi kiangih ka rak hmuhmi ramsa nung thotho kha an si.) Cherubim pawl cu thli lakah an zamso ih, 16an ṭhawn tikah lengke pawl khal an feh ve. Zam dingih an thla an pharh tik khalah lengke pawl an tel ve. 17Cuih cherubim pawl an colh tikah lengke pawl khal an cawl ve; an zam tikah lengke pawl khal an tel ve; ziangahtile cherubim pawl in lengke pawl cu an uk a si.

18Cule a tleu zukzo mi Bawipa ih umnak cu Biakinn sangka ihsin a suak ih cherubim pawl ih tlunah a ṭhawn. 19Ka mit hmuhhngan ahcun an thla pharh tahratin leilung ihsin an hung zam ih lengke pawl khal an tel ve. Biakinn nisuahnak lam kotka ah an cawl ih a tleu zukzomi tleunak cu an tlunah a um. 20Hi cherubim pawl cu Khebar Tivapi ah Israel ih Pathian thuai ih ka rak hmuh zomi ramsa nung pawl an si, ti ka theithiam.

21An zatein hmai pali an nei fingfing; thla pali fingfing le an thla hnuai ah milai kut bangtuk pakhat ciar an nei fingfing. 22An hmai pawl cu Khebar Tivapi ih ka rak hmuhmi ramsa nung pawl hmai vek cekci an si. Cherubim pawl cu hmailamah dingtein an feh fingfing.

Currently Selected:

EZEKIEL 10: FCL

Highlight

Copy

Compare