EZEKIEL 34

Israel Tuukhal Pawl

1 Bawipa in ka hnenah, 2“Milaipa, Israel uktu pawl an ṭhat lo zia hi sim aw. Profet ṭong in simsuak awla Cungnungbik Bawipa keimah in an hnenih ka ṭongmi hi sim aw: Nannih Israel tuukhal pawl, nan cem a si! Nanmah le nanmah cu nan kilkhawi aw zet naón nan tuu pawl cu nan kilkhawi dah lo. 3Tuuhnawi nan in, tuuhmul hnipuan nan hruk, tuu ṭha bik pawl nan that ih nan ei. Sikhalsehla tuu cu nan kilkhawi dah lo. 4Tuu ṭawnṭai pawl ṭhatein nan zoh lo, a na mi pawl nan tuamhlawm lo, tuahmawhnak a tongmi pawl an hma nan tuam sak lo, a hlo ih a tawivakmi pawl hawl in nan hruaikir lo, a si lole a hlomi pawl nan hawl duh hrimhrim lo. Nan tisiat sawn a si. 5Cuih tuu pawl cu khaaltu an neih lo ruangah ramkip ah ṭhekdarh ṭheh an si ih sahrang pawl in an deh ih an ei. 6Curuangah ka tuu pawl cu thlua le tlang lakah an vakvai. Leilung tlun khuazakip ah ṭhekdarh ṭheh an si ih zohman in an hawl lo, hruai tumtu khal an um lo.

7“Tuukhal pawl, Bawipa keimah in nan hnenih ka lo simmi hi ngaihnik uh. 8A nungmi Pathian ka si ih fiangtein ka lo sim. Ka simmi nan ngai le a ṭha sawn. Tuukhal an um lo ruangah ka tuu pawl cu sahrang in an nam, an deh ih an ei a si. Ka tuukhal pawl in tuu cu a hawl an tum lo. Tuu pawl si loin anmah sawn an kilkhawi aw. 9Curuangah tuukhal pawl, ka simmi hi ngaihnik uh. 10Cungnungbik Bawipa keimah in ka run phuang: Keimah hi nan ral ka si. Ka tuu pawl cu nan hnen ihsin ka la ding ih anmah khaaltu nan si sal nawn lo ding, nanmah le nanmah khal ka lo kilkhawi awter nawn lo ding. Nan hnen ihsin ka tuu pawl cu ka la ding ih nan ei nawn lo ding a si.

Tuukhal ṭha

11“Cungnungbik Bawipa keimah in ka lo sim: Keimah rori in ka tuu pawl cu ka hawl ding ih ka kilkhawi ding. 12Tuukhal in a vakvaimi tuu pawl cu a zohṭha ih a hruaikhawm bangin ka tuah ve ding. Khawthim le siatralnak ni ih ṭhekdarh ṭheh an rak sinak hmunkip ihsin ka hruaikhawm ṭheh ding. 13Ramdang dang ihsin ka suahter hai ding ih hmun khatah finkhawm in anmah ih ramah ka hruai ding. Israel tlang sang pawl le tiva kapah ka hruai ding ih hramhring umnak hmun nuam ah ka cawm hai ding. 14Israel ramsung tlangpar phuul lakah siseh, tiva kuam ah siseh, phairawn hramhring lakah siseh, hnangam zetin an tlang ding ih hrampi an piat huahho ding. 15Ka tuu pawl khaaltu cu keimah ka si ding ih colhnak hmun khal ka hawl sak ding. Cungnungbik Bawipa keimah in ka sim zo.

16“A hlomi tuu pawl ka hawl ding, a vakvaimi pawl ka hruaikir ding, hma a neimi pawl an hma ka tuamsak ding ih a nami pawl ka damter ding; asinain a thaumi le a cakmi pawl cu ka tisiat ṭheh ding, ziangahtile kei cu a dingmi tuahtu tuukhal ka si.

17“Cun ka tuurual pawl, Cungnungbik Bawipa keimah in ka lo sim: pumpak ciar in nan thu ka ṭhen ding ih a ṭhami le a siami cu ka lo thiadang ding; tuu le me ka ṭhen ding. 18Mi ṭhenkhat cu hrampi ṭha bik nan ei hi nan lung a kim hrih lo; nan ei lomi tla nan palbeek ṭheh a si! Tidai fimzet nan in ih nan in lomi tidai cu nan nawiter! 19Ka tuurual dang pawl cun nan palbeek mi hrampi le nan nawitermi tidai an in a ṭul a si.

20“Curuangah Cungnungbik Bawipa keimah in ka lo sim: nanmah tuu cak le tuu ṭawnṭai karlakih thuṭhentu ka si ding. 21Tuu cak lo le tuu dam lo pawl kha a kapah nan engpet ih lengah pawt ko in nan khik. 22Sikhalsehla ka tuu pawl cu ka run ding ih nan tisiat nawn lo ding. Ka tuu pawl pakhat hnu pakhat in an thu ka ṭhen ding ih a ṭha le a sia ka dang ding. 23Anmah khaaltu dingah i riantu David bangtuk siangpahrang ka pe ding ih a kilkhawi hai ding. 24Bawipa keimah hi an Pathian ka si ding ih anmah uktu siangpahrang cu i riantu David vek a si ding. Keimah in ka sim zo. 25An himnak dingah anmah thawn thukamnak ka tuah ding. Ram sungih ṭihnungza sahrang pawl hmuahhmuah ka hloter ṭheh ding ih cuticun ka tuu pawl cu hramlakah thlangamte in an um ding ih tupi sungah an bok huahho ding.

26“Thlua ka suah hai ding ih ka tlang thianghlim kiangkap ah an um ding. Cutawkah an ṭul tikah thlawsuah ruah ka surter ding. 27Thingkung pawl in rah an rah ding, an loram in thlairawl a suah ding; cuticun zokhal anmah ih ram ciarah hnangamte in an um ding. Ka minung pawl an ṭeemnak thir cikcin cu ka botcat ṭheh ding ih salih a tuahtu pawl kutsung ihsin ka luatter tikah Bawipa ka si hi in thei ding. 28Pathian thei lo miphun pawl in an ram nawm lo ding ih sahrang pawl khal in an deh an ei nawn lo ding. Hnangamzet in an um ding ih zohman in an ṭhihṭhaih lo ding. 29Ram ṭha ka pe ding ih an ram sungih paamnak cu ka rehter ding. Miphun dang pawl in an hnihsan nawn lo ding. 30Israel cu ka hum ih ka minung an si kha mi hmuahhmuah in an thei ding. Cungnungbik Bawipa keimah in ka sim zo.

31“Nannih ka tuu pawl, ka cawmmi ka tuurual pawl cu ka minung nan si ih Keimah hi nan Pathian ka si,” tiah Cungnungbik Bawipa in a ti.

Currently Selected:

EZEKIEL 34: FCL

Highlight

Copy

Compare