EZEKIEL 33

Bawipa In Kilvengtu Ah Ezekiel A Tuah

(Eze. 3.16-21)

1 Bawipa in ka hnenah, 2“Milaipa, ram pakhat ih raldonak ka thlenter tikah ziang a cang ṭheu ti cu na minung pawl sim aw. Cuih ram minung pawl in anmah lakah mi pakhat kilvengtu ah an hril a si. 3Ral an rat a hmuh tikah mi hmuahhmuah ralrin peknak ah tawtawrawt a tum. 4Mi pakhat in cuih tum thawmvang a thei naón zianghman ah a siar lo ih ral pawl ra in amah an that a si ahcun a thisen cu amah ih lu parah a um, amah mawhthluk ding a si. 5Ralrinnak pekmi a thei naón zianghman ih a siar lo ruangah a thih cu amah ih mawh a si. Ralrinnak an pekmi rak ngaita sehla a luat thei ding naón! 6Sihmansehla ralvengtu in ral pawl an rat kha a hmu naón tawtawrawt a tum lo a si ahcun ral an ra ding ih cuih misual pawl cu an that ding. An thisen man cu ralvengtu ih hnenah ka hlam ding.

7“Maw milaipa, nangmah hi Israel miphun hrangah ralvengtu ah ka lo tuah ding. Ralrinnak ka lo pekmi cu an hnenah na pe sin pei. 8Misual pakhat a thi ding tiah ka than ih a nunnak hum thei dingah a nuncan thleng dingin ralrinnak na pek lo ahcun misual si in a thi ding. A thisen man cu na parah ka hlam ding. 9Ralrinnak na pek naón sualtuah a bansan cuang lo a si ahcun misual in a thi ding; asinain na nunnak cu a him ding,” tiah a ti.

Pumpak ṭuanvo

10 Bawipa in ka hnenah, “Milaipa, Israel mi pawl in ‘Kan sualnak le thil ṭha lo kan tuahmi in kan thil in ritter a si. Kan taksa a ṭum zutzo. Ziangtin so kan nun thei ding?’ tiah an ti rero vekin an hnenah ti sal aw. 11Ṭhatein sim aw; Cungnungbik Bawipa keimah, a nungmi Pathian ka si vekin ka sim: misual pakhat a thih hmuh cu ka lungawi zawng a si lo. Sualnak bansan ih a nun hmuh ka duh sawn. Maw Israel, thil ṭha lo na tuahmi cu bang thlang aw. Ziangah so thih cu na duh?

12“Milaipa, Israel mipawl sim aw: mi ṭha pakhat a sual ahcun a rak ṭhatnak khan a run lo ding. Mi ṭha lo pa in ṭhatlonak a bansan a si ahcun hrem a si lo ding; a sinan mi ṭha pakhat in sualnak tuah a thok a si ahcun a nunnak cu zuah a si lo ding. 13Mi ṭha pakhat hnenah nunnak thu ka tiam; asinain thil ṭha a rak tuah ciami kha a tawk ti ih a ruah tlunah sualnak a tuah a si ahcun thil ṭha a rak tuahmi kha ka ciing nawn lo ding. A sualnak ruangah a thi ding. 14Mi ṭha lo pakhat cu na thi ding tiah ralrinnak ka pek; asinain sual tuah a bansan ih a dingmi le a ṭhami a tuah ahcun, 15thuṭhimnak ah tangka cawitu ih thukamnak thil a lakmi kha a khirh sal ih tlunah a rak rukmi thil khal a pek kir a si ahcun, sualnak a bansan ih nunnak petu daan a thlun ruangah a thi lo ding, a nung ding a si. 16Sualnak a tuahmi pawl kha ka ngaidam ding; a ding le a ṭhami a tuah ruangah a nung ding a si.

17“Cule na minung pawl in ka thil tuah daan hi a dik lo a si, an ti. Asilo, anmah ih thil tuah daan sawn a dik lo a si. 18Miding pakhat in thil ṭha tuah nawn loin thil ṭha lo tuah a thok ahcun cumi ruangah a thi ding a si. 19Mi ṭha lo pakhat in sualnak tuah a baansan ih a dingmi le a ṭhami a tuah tikah cun a nunnak a hum ngah a si. 20Sikhalsehla Israel, ka tuahmi hi nang in a dik lo na ti. Zokhal nan tuahmi vekin thu ka lo ṭhen ding,” tiah a ti.

Jerusalem Siatnak Thuthang

21Sal kan taannak kum hleihnih kum, thla hra thla, ni nga ni ah Jerusalem ihsin a luat mipa pakhat ka hnenah a ra ih Jerusalem khawpi a siat zo a si, tiah i ra sim. 22Cupa a ra thlen hlan ni khatnak zanlam ah Bawipa ih umpinak nasa zetin ka hnenah a thleng. Cupa cu a thaizing a ra thlen tikah Bawipa in ṭong theinak huham i pek sal. Curuangah ka ṭong thei sal.

Mipi Pawlih Sualnak

23 Bawipa in ka hnenah, 24“Milaipa, Israel ramih a siat ṭheh zomi khawsungih a ummi mipi pawl in, ‘Abraham cu pakhat lawng asinain ram pumpi a hnenah pek a si. Kannih cu mi tamzet kan si ih atu-ah hi ram cu kanmah ih ta a si ve zo,’ an ti.

25“Cungnungbik Bawipa keimah ih ka ṭongmi hi sim aw: A sungih thi a um laimi sa nan ei a si. Milem nan bia. Mi nan that! Hi ram hi kanmah ih ta a si, tiah ziangtinso nan ruah thei? 26Nan ralnam hi nan rinsan. Nan thil tuahmi pawl hi fihnungza an si. Zokhal in ṭaangṭawm sualnak nan tuah. Hi ram hi kan ta a si tiah ziangin so a lo ruahter?

27“Cungnungbik Bawipa keimah hi a nungmi Pathian ka si vekin ralrinnak ka pek, sim aw: a siatṭhehmi khawsungih a ummi pawl cu thah an si ding. Hramlak ih a ummi minung pawl cu sahrang in a ei ding. Tlangpar le lungpuk sungih a relhmi pawl cu natnak in an thi ding. 28Hi ram cu ramṭhing ah keimah in ka tuah ding ih an uar zetmi an cah-nak cu a cem ding a si. Israel ramih tlangsaang pawl cu a ruul tuk ding ih a sungin zohman in an pah thei lo ding. 29Mipi pawl an sual ruangah ka hrem ih an ram cu ramṭhing ih ka tuah tikah cun keimah hi Bawipa ka si kha in thei ding,” tiah a ti.

Profet ṭong An Thei

30 Bawipa in, “Milaipa, na minung pawl cu khawkulhnak phardawl kiangah siseh, an inn sangka kiangah siseh, an ton awk tikah nangmah ih thu lawng an rel. Pakhat le pakhat, ‘Atu-ah Bawipa ih ṭongkam ziang bangtuk si a ra thleng, kan va ngai pei,’ tiah an ti aw. 31Curuangah ka minung pawl cu, milai ih an tuah ṭheu vekin, na thusimmi ngai dingah an khawm aw ciamco, asinain tuah dingih na fialmi an tuah lo. Duhdawtnak ṭong cu an hmur in a suak, asinain an duhham lai thotho. 32An hrangah nang cu, na zai ṭha thawn, an thabaang colhdamnak ih ngaihla saktu hnakin na uak cuang lo; ṭingṭang tumtu men ah na cang. Na ṭongmi cu an thei ṭheh naón pakhat hman an thlun hrimhrim lo. 33Asinain na ṭongmi hmuahhmuah a kim tikah cun, an kim thluh ding sikhawh, cutik lawngah anmah lakih profet na um kha an thei ding,” a ti.

Currently Selected:

EZEKIEL 33: FCL

Highlight

Copy

Compare