EZEKIEL 32

Izipt Siangpahrang Cu Tisartam Vek A Si

1Sal kan taannak kum hleihnih kum, thla hleihnih thla, ni khat ni ah Bawipa in ka hnenah, 2“Milaipa, Izipt siangpahrang hnenah ralrinnak fiangtein pe aw. Ka thu cu a hnenah hiti in sim aw: Miphun pawl lakah kiosa vekin hna na ṭuan, asinain tiva sungih a vak reromi tisartam vek sokhaw na si. Na ke in tidai na nawiter ih tiva pawl na balter ṭheh. 3Miphun pawl an tonkhawm awk tikah ka sur in ka lo awk ding ih annih in tikap ah an lo dir ding. 4Leilung parah ka lo hlon ding ih na sa eitu dingah leilungtlun vate le ramsa hmuahhmuah ka ko ding. 5A ṭoih hluahhlomi na ruak cu tlang le nelrawn pawl khuhnakah ka hmang ding. 6Na thisen in tlangsaang pawl a hnih ṭheh hlanlo le tivate pawl a khahter ṭheh hlanlo ka thle rero ding. 7Nangmah ka lo siatsuah tikah cun van khi lang loin ka khuh ding ih arsi pawl ka thimter ṭheh ding. Ni cu khawdur phenah a relh ding ih thlapi khal a vang lo ding. 8Van ih a ummi tleunak hmuahhmuah ka hmit ṭheh ding ih na ram cu thimnak in a khuh ṭheh ding. Cungnungbik Bawipa keimah in ka sim zo.

9“Ka lo siatsuahnak thuthang cu na theih dah lomi ram pawl sungih ka phuan tikah miphun tampi an thin a nuamlo ding. 10Na parih thil ka tuahmi hin miphun tampi mangbang zetin a tuah ding. Ka ralnam ka vai tikah cun siangpahrang tampi thinphang in an khur thlohthlo ding. Nangmah na tluk ni ahcun an zatein anmah ih nunnak ruat ah thinphang in an ṭhia rero ding,” a ti.

11Cungnungbik Bawipa in Izipt siangpahrang hnenah, “Babilon siangpahrang ih ralnam na tong ding. 12Zaangfah nei lo miphun pawl ih ralkap pawl in an ralnam an suah ding ih na minung pawl an sattan ding. Na minung pawl le na uanawknak thilri dang hmuahhmuah cu an siatsuah ṭheh ding. 13Tiva kua kipah na ṭilva pawl ka that ding ih tidai nawitertu ah minung siseh, ṭilva siseh tiva kua ah an feh nawn lo ding. 14Na tidai ih hnawm pawl cu a taw ah ka ṭhutter ding ih na tiva pawl cu thiangfai zetin ka luangter ding ih hriak bangin a fim ding. Cungnungbik Bawipa keimah in ka sim zo. 15Izipt cu ramṭhing ah ka tuah ih cutawk minung hmuahhmuah ka siatsuah ṭheh tikah cun keimah hi Bawipa ka si kha in thei ding. 16Hi ralrinnak pekmi hi mithi phumnak hla ah a cang ding. Izipt le a minung pawl parih riahsiatnak langternak dingah miphun tampi nunau pawl in an sak ding. Cungnungbik Bawipa keimah in ka sim zo,” tiah a ti.

Mithi Khua

17Sal kan taannak kum hleihnih kum, thla khat thla, ni hleinga ni ah Bawipa in ka hnenah, 18“Milaipa, Izipt mi pawl hrangah mithi ngai in um aw. Mithi khua ah miphun cak zetzet pawl thawn vun kuat aw. 19An hnenah cun:

Midang hnakin ka mawi cuang

tiah na ruat aw maw?

Mithi khua ah na vung feh ding ih,

Pathian thei lo pawl thawn

daiziar in na um ding.

20“Izipt mi pawl cu ral kutih a thimi pawl thawn an tlu ding. Anmah that ṭhehtu dingah ralnam tiarcia in a um. 21Ralṭha bik pawl le Izipt ṭan ih raldotu pawl in mithi khua in Izipt mi pawl an rak hmuak ih, ‘Ral kutih a thimi Pathian theilotu pawl cu hinah an rung ih an umta a si,’ tiah an au.

22“Cunah Assiria a um ve; a ralkap pawl ih thlaan cu a kiangkap hmunkip ah an um. An zatein ral kutih thi an si. 23An thlaan pawl cu mithi khua thuknak bikah an um. A ralkap pawl cu raldonak ah an thi ih an thlaan in a thlaan an kulh. Cupawl cu an dam laiah a nungmi pawl ram a ṭhihṭhaih rerotu an rak si.

24“Elam khal cunah a um; a ralkap pawl ih thlaan cu a kiangkap ah an um ṭheh. An zatein ral kutih a thimi an si ih mithi khua ahcun serhtan loin an vung feh. An dam laiah cun tuksumnak khuazakip ah a rak umtertu an si naón atu ahcun mualpho le daiziar in an um zo. 25Elam cu ralkut in a thimi pawl lakah a it; a ralkap pawl ih thlaan cu a kiangkap ah an um. An zatein serhtan lo, ral kut thi lawnglawng an si. An nun laiah cun khuazakip ah tuksumnak a khahtertu an si; asinain atu ahcun ral pawl ih thah mi lakah an tel ih mualpho le daiziar in an thi.

26“Meshek le Tubal khal cunah an um; an ralkap pawl ih thlaan cu an kiangkap ah an um. An zatein serhtan lo, ral thahmi lawnglawng an si. A nungmi pawl a ṭhihṭhaihtu bik an rak si. 27Khuahlan ih ralṭha hminthang pawl cu an thih tikah hriamnam kim thawn an phum. An ralnam cu an lu hnuai ah an ret ih an ralphaw cu an ruangpi parah an ret. Asinain annih cu cuvekin upatnak thawn phum an tong lo. Hi ralṭha pawl cu a nungmi pawl ṭhihṭhaih thei dingin huham an rak nei.

28“Cuvekin Izipt mi pawl cu serhtan lo, ral thahmi pawl lakah palcih mi ah an cang ding.

29“Edom khal cutawkah a siangpahrang pawl le a hotu pawl thawn an um. Anmah cu ralkap cak zetzet an rak si, asinain atu ahcun mithi khua ah serhtan lo, ralthahmi pawl thawn an um a si.

30“Saklam ih siangpahrang pawl tla cunah an um; Sidon mi pawl khal an um ve. An huham in khuazakip ah ṭihphang in mi an rak tuah, asinain atu ahcun ral thahmi le serhtan lo pawl thawn mualpho in an cawl zo. Mithi khua ih a vung fehtu pawl thawn mualphonak cu an ṭawm aw a si.

31“Hitiih ral ih thahmi pawl hmuahhmuah an hmuh tikah Izipt le a ralkap pawl hrangah cun an hnem awknak a si ding,” tiah Cungnungbik Bawipa in a ti.

32“Izipt siangpahrang cu a nungmi pawl ṭhihṭhaihtu si dingah ka ngaihtuah; asinain amah le a ralkap pawl cu thah an si ding ih ral kutin a thimi serhtan lo pawl thawn phum an si ding,” tiah a ti. Cungnungbik Bawipa in a sim zo.

Currently Selected:

EZEKIEL 32: FCL

Highlight

Copy

Compare