EZEKIEL 31

Izipt Le Sidar Thing Tahṭhimnak

1Sal kan taannak kum hleikhat kum, thla thum thla, ni khat ni ah Bawipa in ka hnenah, 2“Milaipa, Izipt siangpahrang le a minung pawl hnenah hiti in sim aw:

Huham na va nei lawmmam so!

Ziangthawn so ka lo ṭhim ding?

3Lebanon ramih sidar thing

bangtuk na si;

A mawizet le a niimzet mi

hnge thawn,

Mero tawt tiangin a saangzet mi

thing na si.

4Cuih thing ṭhantertu dingah

tidai a um;

A cawmtu dingah leilung hnuai ah

tiva an um;

Cuih thing dinnak hmun cu an

ciarter ringring;

Tupi sungih thing dang hnenah

tivate an thlenter.

5Tidai ṭhate ih a ngah ruangah,

Cuih thing cu thing dang hnakin

a sang sawn;

A hnge pawl an tam ih an sau.

6Vate phunkim in a hnge parah

bu an sak;

A thlahnem ah ramsa pawl in

faate an nei;

A hneemdai ah leilung miphunkip

an cawl.

7Cuih thingkung cu ziangtluk in

a mawi!

A saangzet ih a hnge an sau

zet fawn;

A hram pawl cu thukzet ih a luang

mi tidai an thleng.

8Pathian hmuan ih sidar thing hman

in a tluk lo;

Ziangvek farthing hman cuvek hnge

nei an um lo;

Ziangvek tupifar hman in cuvek

ṭeek ṭha an nei lo;

Pathian hmuan sung hmanah cutluk

thing mawi an um lo.

9Mawizet ih ka tuahmi a si,

a zaammi hnge thawn;

Pathian ih Eden hmuan thing pawl

ih dawt kuahkomi a si.

10Atu-ah Cungnungbik Bawipa keimah in mero tawt ko ih a ṭhangmi thingkung parah ziangvek thil a thleng ding ti ka lo sim ding. Cuih thingkung cu a sang deuhdeuh ih a hngal deuhdeuh. 11Cutiih a hngal ruangah amah cu ka hnong zo; ramdang bawi ih kut sungah ka thlengter zo. Cuih bawi cun a ṭhatlonak vekin a parah hna a ṭuan ding. 12Zaangfahnak zianghman nei lo ramdangmi in an hau ding ih an tlansan ding. A kiakmi a ṭeek le a hnge pawl cu ramsung tlangpar le phairawn kipah an tla ding. A hneemdai hnuai ih a ummi miphun hmuahhmuah in an tlansan ding. 13A tlumi thing parah cun vate pawl an ra fu ding ih a hnge tlun ah ramsa pawl an vak ding. 14Curuangah atu thok ihsin thingkung dang cu ziangvek ṭha in tidai an ngah khalle cuih thingkung vek cun an sang thei nawn lo ding ih mero a tawttu thing an um nawn lo ding. An zatein milai vekin thi ṭheh ding an si ih mithi khua ih a rak fehcia pawl a vun thlun vetu an si ding,” tiah a ti.

15Cungnungbik Bawipa in hiti in a sim: “Cuih thingkung mithi khua ih a feh ni ah, riahsiatnak langternak ah, leilung hnuai tidai cu amah khuhtu ah ka tuah ding. Tivapi pawl ka kaitaar ding ih tivate pawl cu ka luangter lo ding. Cuih thingkung a thih ruangah Lebanon Tlang sang parah thimkhawzing ka tlunter ding ih tupi sung ih thingkung hmuahhmuah ka vuaiter ṭheh ding. 16Mithi khua ih ka vun kuat tikah, a tluk thawmvang in miphun pawl a hninter ṭheh ding. Cuih thingkung a tluk ruangah Eden hmuan ih thingkung hmuahhmuah, a hleice ih hrilmi thing pawl le tidai ṭhazet ih a ngahtu Lebanon thingkung pawl cu mithi khua ih a rak fehciatu thing pawl an si ruangah an lung a awizet ding. 17Cuih thingkung thawn hmunkhat ah a tlu ciami thingkung pawl fin dingah mithi khua Sheol ah an vung feh ding. A hneemdai ih a ummi hmuahhmuah cu miphun dangdang lakah ṭhekdarh ṭheh an si ding,” a ti.

18Hi thingkung cu Izipt siangpahrang le a minung pawl an si. Eden hmuan ih thingkung pawl hman amah vekih a saangmi le mi mit la thei an um lo. Sikhalsehla atu ahcun Eden hmuan ih thingkung dang vek ṭhiamṭhiam in mithi khua ah a feh pei ih raldonak ih a thimi le Pathian thei lo mi pawl a vun fin ding a si. Keimah in ka sim zo,” tiah Cungnungbik Bawipa in a ti.

Currently Selected:

EZEKIEL 31: FCL

Highlight

Copy

Compare