EZEKIEL 30

Bawipa In Izipt A Hrem Ding

1 Bawipa cun ka hnenah hiti in a sim sal. 2“Milaipa, profet ṭong in phuangsuak awla Cungnungbik Bawipa keimah ih ka ṭongmi hi than aw. Hitiin napi in au aw:

ṭihnungza ni a thleng ding,

3Cuih ni cu a nai zo,

Bawipa in a ṭuannak ding ni cu,

Miphun pawl hrangah khawdur le

harsatnak ni a si.

4Izipt ramah raldonak a um ding,

Sudan ramah vansaannak a um ding.

Izipt ramah mi tampi thah an

si ding,

Ram cu an siatsuah ṭheh ding ih

Ramṭhing ah an cangter ding.

5“Cuih raldonak ahcun Ethiopia ram, Libia ram, Lidia ram, Arabia ram, Kub ram le ka minung lak hman in ralkap an sanmi pawl tampi an thi ding,” a ti.

6 Bawipa in, “Saklam ah Migdol ihsin thlanglam ah Aswan tiang Izipt ram a humtu hmuahhmuah cu raldonak ah an thi ṭheh ding. A zum-aw zetmi Izipt ralkap pawl cu siatsuah ṭheh an si ding. Cungnungbik Bawipa keimah in ka sim zo. 7An ram cu leilung pumpuluk ah ramṭhing bikah a cang ding ih an khua pawl cu hnawmpen ah an cang thluh relrel ding. 8Izipt ram cu meisa in ka ur ih a humtu pawl thah ṭheh an si tikah, Bawipa ka si hi in thei ding.

9“Cuih ni a ra thlen ih Izipt cu siatsuah ṭheh a si tikah thlangamte ih a ummi Ethiopia mi pawl hnenah long in thu phurtu ka thlah ding ih Ethiopia mi pawl an tuk a sum ding. Cuih ni cu a ra thleng cing ding,” a ti.

10Cungnungbik Bawipa in, “Izipt lennak cemtertu dingah Babilon siangpahrang Nebuchadnezzar ka hmang ding. 11Amah le a ralkap pawl cu ram tisiat ṭhehtu dingah an ra ding. Izipt ram cu ralnam thawn an do ding ih ram sungah miruak a khat ding. 12Nail tivapi ka caarter ding ih Izipt ram cu mi ṭha lo pawl kuthnuai ah ka re ding. Ramdangmi pawl in a ram pumpuluk in an tisiat ṭheh ding. Bawipa keimah in ka sim zo,” a ti.

13Cungnungbik Bawipa in, “Memfis ih a ummi milem pawl le khuavang pawl cu ka siat ṭheh ding. Izipt ram uktu ding zohman an um lo ding ih mi hmuahhmuah an thin ka phangter ṭheh ding. 14Izipt thlanglam ih Pathros khua cu khawṭhing ah ka tuah ding ih saklam ih a ummi Zoan khua cu meisa in ka ur ding. Thebes khua cu ka hrem ding. 15Izipt ram sungih ruhkulh nasa bik a neitu Pelusium khua cu ka aithawhnak ka tuarter ding. Thebes khua ih lennak cu ka siatsuah ding. 16Izipt cu meisa in ka ur ding ih Pelusium cu harsatnak a tuar ding. Thebes khua ih khawkulh phardawl pawl cu bal ṭheh a si ding ih khawsung cu tidai in a khat ding. 17Heliopolis khua le Bubastis khua ih tlangval pawl ral kutin an thi ding ih midang pawl cu salkaihmi ah an cang ding. 18Izipt cahnak ka khiak ih an uar zetmi an thazaang ka cemter tikah cun Tahpanhes parah khawthim a thleng ding. Khawdur in Izipt cu a khuh ding ih Izipt ramih khawsungmi pawl hmuahhmuah cu ralkaihmi ah an cang ding. 19Cutiih Izipt ka hrem tikah cun Bawipa ka si kha in thei ding,” a ti.

Izipt Siangpahrang Ih Cahnak A Cem

20Sal kan taannak kum hleikhat kum, thla khat thla, ni sarih ni ah Bawipa in ka hnenah, 21“Milaipa, Izipt siangpahrang ih baan ka khiak zo. Damter dingah le ralnam kai sal thei ding tlak ih cak sal dingah zohman in an buah sak lo ih an tuam sak fawn lo. 22Atu-ah Cungnungbik Bawipa keimah in hiti in ka sim: Izipt siangpahrang ih ral cu keimah ka si. A baan pakhat a ṭha hrih mi siseh, a kiak zo mi siseh, ka khiak ding ih a kut ihsin a ralnam a tla ding. 23Leilung tlun khuazakip ah Izipt mi pawl cu ka ṭhekdarh ṭheh ding. 24Cule Babilon siangpahrang ih baan ka cakter ding ih ka ralnam a kut sungah ka pek ding. Asinain Izipt siangpahrang ih baan cu ka khiak ding ih hrum rero in a ral hmaiah cun hmapu in a ril ding. 25Asi, anih cu ka ṭawnṭaihter ding ih Babilon siangpahrang cu ka cakter ding. A hnenah ka ralnam ka pek ih Izipt ram lamih a hawi tikah cun mi hmuahhmuah in Bawipa ka si kha in thei ding. 26Leilung tlun khuazakip ah Izipt mi pawl cu ka ṭhekdarh ṭheh ding. Cuticun Bawipa ka si hi in thei ding,” tiah a ti.

Currently Selected:

EZEKIEL 30: FCL

Highlight

Copy

Compare