EZEKIEL 26

Ṭai-ar Parih Profet ṭong

1Sal kan taannak kum hleikhat kum, thla khat#thla khat timi hi Hebru Baibal sungah cun cuih thla ti lawngin a um. thla, ni khat ni ah Bawipa in ka hnenah, 2“Milaipa, ṭai-ar khawpi sung mipi pawl in an aupi reromi cu hihi a si: ‘Jerusalem a siat ṭheh zo! Sumtuahnak thazaang a nei nawn lo! In zuamtu kan ral a si thei nawn lo ding,’ an ti.

3“Curuangah Cungnungbik Bawipa keimah ih ṭongmi cu hiti in a si: ṭai-ar khawpi, Keimah hi na ral ka si. Miphun tampi nangmah do dingah ka rak hruai ding ih tipithuanthum tilet tho bangin na parah an ra thleng ding. 4Na khawpi kulhnak phardawl cu an siatsuah ding ih na ralvennak donhleisang inn pawl cu an siatbal ṭheh ding. Cule keimah in leivut pawl cu ka phiatfai ding ih lungto lawng ka taan ding. 5Cuih lungto pawl cu tipi sungih lungto a dingmi an si ding ih cuih parah ngakaitu pawl in an sur an pho ding. Cungnungbik Bawipa keimah in ka sim zo. Miphun tampi in ṭai-ar cu an ram ding. 6An ramsung khua pawl ih a ummi pawl tla ralnam in an that ding. Cuticun ṭai-ar in keimah hi Bawipa ka si kha a thei ding,” a ti.

7Cungnungbik Bawipa in, “Siangpahrang hmuahhmuah lakih siangpahrang maksak bik Babilon siangpahrang Nebuchadnezzar cu ṭai-ar do dingin ka run hruai ding. Ralkap tampi, rang, rangleng le rangralkap pawl thawn saklam in a rung ding. 8Ramsung khua ih a ummi pawl cu raldonak ah an thi ding. Ral pawl cun kahsam an lai ding, leilungsang an dawl ding, an ralphaw cu phar bangin a pit ding ih a sahzet ding. 9Phar sutnak thingtum in na khawpi phar pawl cu an su ciamco ding, nan ralvennak donhleisang pawl cu hreitlung in an hau ding ih an bal ciamco ding. 10An rang pawl ih thawhtermi leivut in a lo khuh ding. A siatciami khawpi kotka in an feh tikah an rang pawl in an rawl phurhnak leng le rangleng pawl an hnuhnak thawmvang cun nan phar pawl an hnin durdoter ding. 11Rangralkap pawl in nan lamzin parah mi an nor vutvo ding ih mipi pawl an ralnam in an that vivo ding. A tumzetmi nan ṭhuam pawl cu leilung ah an tlu ṭheh ding. 12Nan lennak le nan sum tuahnak thilri pawl cu an duhduh in an lak ding. Nan phar pawl cu an bal ṭheh ding ih nan nomcennak inn pawl cu an bauh ṭheh ding. Lungto le zanthing pawl, inn le phar balmi pawl cu tipithuanthum sungah an hlon ṭheh ding. 13Nan hlasak ka cemter ding ih nan ṭingṭang aw pawl cu ka daiter ding. 14Lungto lawng ka taan ding ih a parah ngakaitu pawl in an sur an pho ding. Nan khawpi cu dinsal a si nawn lo ding. Cungnungbik Bawipa keimah in ka sim zo,” a ti.

15 Bawipa Pathian in ṭai-ar khawpi hnenah hiti in a ṭong: “Neh mi na si ih na tluk tikah tipikap ih a ummi pawl in ral ih thahmi pawl an airaknak aw kha an thei ding ih an tuk a sum ding. 16Tipithuanthum ih khualtlawn miphun pawl ih siangpahrang hmuahhmuah cu an tokham ihsin an ṭum ding. An puanfual le an puanṭelh pawl an hlit ding ih lei parah khur thlohthlo in an to ding. Na tuarzia an hmuh tikah an tuk a sum tuk ding ih khur loin an um thei lo ding. 17Cule na hrangah hi mithi phumnak hla hi an sak ding:

Khawpi hminthangzet cu a siat zo,

A lawng pawl cu tipipar ihsin

an hlo zo.

Hi khawpi sung mipawl in

tipithuanthum an rak uk;

Tipi kapih um ram pawl cu an

ṭihter hai.

18Tikulh tampi an khur ciamco,

Hi khawpi a tlak ni ahcun.

An mipi pawl an mang a bang

ngaingai,

Cuvek siatsuahnak an hmuh

tikah cun.”

19Cungnungbik Bawipa in, “A siat ṭheh ih zohman an um duh lonak khawpi pawl vekin ramṭhing ah ka lo tuah ding. Tipithuanthum tidai in ka lo khuh ding. 20Khuahlan laiih a rak nungmi pawl thawn hmun khatih um dingah mithi khua Khurthuk ah ka lo kuat ding. Cuih leilungthuai ram, kumkhua in siatsuahmi ramah cun mithi pawl thawn ka lo umter ding. Curuangah zo ih umnak hman na si nawn lo ding ih a nungmi ram sungah hmun na luah nawn lo ding. 21Rapthlakza hminsin mi na si ding ih cuticun na cemta ding. Mi in an lo hawl ding, asinain an lo hmu dah lo ding a si,” a ti. Cungnungbik Bawipa in a sim zo.

Currently Selected:

EZEKIEL 26: FCL

Highlight

Copy

Compare