EZEKIEL 27
27
Ṭai-ar Khawpi Phumnak ṭahhla
1 Bawipa in ka hnenah, 2“Milaipa, tipikap ah a um ih miphun dangdang tipikap ih a um ve mi thawn pursum leilawn a tuahtu, 3Ṭai-ar khawpi hrangah mithi phumnak hla sak aw. Hihi Cungnungbik Bawipa ih simmi a si tiin sim aw:
Maw ṭai-ar, ‘Mawinak lamah cun
ka kim a si,’ na ti.
4Na inn cu tifinriat a si;
A lo dinsuahtu pawl in lawng
mawizet vekah an lo tuah.
5Na thing ah Hermon Tlang ih
farthing an hmang;
A lo dinsuahtu pawl cun.
Lebanon ihsin sidar thing an lak,
Na puan thlainak dingah.
6Bashan ram in ṭhil thing an lak,
Na lawng hlaunak dingah.
Saipras ih farthing in na zial
pawl cu an tuah,
Saiho in an khuh ih an mawiter.
7Na puanzar cu pat femte in an tah,
Izipt ramih ṭelhmi coihcinmawi
puan a si.
Lam hlapi in theih a theih;
Na parih thlahliap puanzar cu,
Puan ṭha bik pawl an si.
Saipras tikulh ih puan sendup
an si.
8A lo hlautu pawl cu
Sidon le Arvad khuami an si.
Na mithiam pawl cu lawng kiltu
an si.
9Hi lawng tuahtu pawl cu
Byblos ih a zirfeltu an si.
Na sumdawr tuahnak ahcun,
Tipi parih lawng kiltu hmuahhmuah
in sum an tuah a si.
10Persia, Lidia le Libia ramih ralkap pawl in na ralkap an ṭuan. An ralphaw le an lukhuh pawl cu na ralkap inn ah an thlai. Na hrangih hminthannak a ngahtu pawl cu anmah an si. 11Arvad ralkap pawl in na ralhruang pawl an kil ih Gamad ralkap pawl in na ralvennak donhleisang pawl an veng. An ralphaw pawl cu na phar parah an thlai. A lo mawitertu cu anmah an si.
12“Spain ramah sum na tuah ih na thilri tampi ngun, thir, rangva, le suan thawn na thleng. 13Grik ram, Tabul le Meshek ram khalah sum na tuah ih na thilri dar ih tuahmi thilri le sal pawl thawn na thleng. 14Na thilri dangdang thawn hnaṭuantu rang pawl, raldonak rang pawl le laak pawl cu Beth Togarmah ihsin na thleng. 15Rhodes mi pawl thawn khal pursum leilawnnak na tuah. Tipi kapih a ummi ram pawl in na thilri cu saiho le thingdum mankhung in an lo thleng. 16Na zuarmi thilri pawl le na ṭuansuahmi thilri pawl cu Siria mi in an lo lei. Lung hring mankhung, puansen, coihcinmawi puan, pat femte ih tahmi hnipuan, tipi sung ihsin lakmi kep le ruby lungmankhung pawl cu na thilri ai ah an lo pek. 17Judah le Israel in na thilri ai ah sangvut, khuaitizu, olif hriak le rimhmui pawl an lo pek. 18-19Damaskas mi pawl in na zuarmi thilri le na ṭuansuahmi pawl an lo lei ih cuih ai ah Helbon ihsin sabitti le Sahar ihsin tuuhmul an lo pek. Na thilri thawn an tuahciami thir le rimhmui nan thleng aw. 20Dedan mi pawl in na thilri pawl ai ah rangkung dammi puan an lo zorh. 21Arab mi pawl le Kedar ram uktu pawl in na zuarmi thilri ai ah tuu le tuufaate le me an lo pek. 22Sheba le Raamah sumtuahtu pawl in na thilri ai ah sui le ngun hlawnthil, sui le rimhmui ṭha bik pawl an lo pek. 23Haran, Kanneh le Eden khua pawl, Sheba ih sumtuahtu pawl le Asshur le Kilmad pawl in na hnenah sum an tuah. 24Na hnenah hnipuan ṭha le hnipuan mawi, hnipuan sendup, coihcinmawi puan, a tleumi puanpher, ṭha zetih an hrual mi hripi le hrite pawl an zuar a si. 25Na thil zuarmi pawl cu thil phurtu lawng tum bik pawl in a bur a bur in an phur a si.
“Rit zetih thil phurtu,
Tifinriat ih lawng bangtuk na si.
26A lo hlautu pawl in tifinriat par
an lo thlenpi tikah,
Nisuahnak lam thlipi in a lo
soihsiat;
Leilung thawn a hlatnak hmunah.
27Na lennak le na thil zuarmi
hmuahhmuah,
Lawng kiltu na minung pawl,
Na lawng parih zungthiam pawl le
sumtuahtu pawl,
Lawng parih ralkap hmuahhmuah,
An zatein tifinriat ah an pil,
Na lawng thli ih a soihsiat
tik ahcun.
28A pil cuahcomi lawng kiltu pawl ih
Au thawm cu tipikap ah a ra thang!
29“Lawng an zatein an tlansan ṭheh,
Long kiltu hmuahhmuah tikap an
thleng ṭheh.
30Nangmah ngai in nasa zetin an ṭap,
An lu cu leivut an phulh aw ih
Vutcam lakah an lawng ciamco.
31Nangmah ruat in an sam an
met ṭheh,
Buri hnipuan an hruk ṭheh.
An thin na in mitthli tla in
an ṭap.
32Na hrangah mithi phumnak hla
an seh:
‘ṭai-ar cu zo in so a ṭhim
thei ding e,
Tipi sungih a pil zomi
Ṭaiar cu?
33Na thilri pawl tipi ral a thlen
tikah cun,
Mi hmuahhmuah ih haimi na
kimter e.
Na thilri man ṭhazetzet pawl cun,
Siangpahrang pawl na lianter
ṭheh hai e.
34Atu cu tipi sungah na pilpi zo,
Tipithuanthum taw ah na pilta e.
Na thilri le a lo riantu hmuah
hmuah cu,
Nangmah thawn tipi sungah nan
hlota e,’ an ti.
35Tifinriat kapih a ummi miphun pawl in na parih a thlengmi an hmuh tikah an mang a bang. An siangpahrang pawl hman an tuk a sum ih an mithmai ah ṭihnak a lang. 36Nang cu na liam zo, kumkhua in na liamta zo; leilung pumpi ih sumtuahtu pawl cu an tuk a sum, nangmah vek kan cang pang ding, ti an phang,” a ti.
Currently Selected:
EZEKIEL 27: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
