EZEKIEL 25

Ammon Parih Profet ṭong

1 Bawipa in ka hnenah, 2“Milaipa, Ammon ram hi mawhthluk awla a ṭhatlonak hi phuangsuak aw. 3Cungnungbik Bawipa keimah i ka ṭongmi hi ngai dingah sim aw: Ka Biakinn borhhlawh in a um hi na lung a awi; Israel ram siatsuah ṭheh in a um ih Judah mi pawl sal ih an taan hi na di a riam a si. 4Cutiih na lung a awi ruangah nisuahnak lam nelrawn ih a um miphun pawl ka lo nehter ding. Na ram sungah ralkap riahnak an sak ding ih na ram an luah ding. Na ei dingmi le na in dingmi thingrah le cawhnawi pawl cu an ei an in ding. 5Rabbah khawpi cu kalauk tlannak ramah ka tuah ding ih Ammon ram pumpi cu tuu pawl tlannak hmunah ka cangter ding; cuticun keimah hi Bawipa ka si kha in thei ding.

6“Cungnungbik Bawipa in hiti in a ti: na za na beng ih lungawi in na khir ciamco; Israel ram parah iksiiknak na nei. 7Cutiih na um ruangah miphun dang kut ah ka lo pe ding ih annih in an lo ram ding, na thilri an lo long ding. Ka lo siatsuahnak cu a besia zet ding ih miphun pakhat na si thei nawn lo ding; ka ram ti ding khal na nei nawn lo ding. Cutikah keimah hi Bawipa ka si kha na thei ding,” a ti.

Moab Parih Profet ṭong

8Cungnungbik Bawipa in, “Moab,#Grik le Latin Baibal sungah Moab tiin a um. Hebru Baibal sungah cun Moab le Seir tiin a um. in Judah khal hi midang vek thotho a si ko ual, a ti ruangah, 9Moab ramri kiltu khua pawl, khua mawi bik Beth Jeshimoth, Baal Meon le Kiriathaim pawl tla telin, ral pawl ka doter hai ding. 10Nisuahnak lam nelrawn ih ummi miphun pawl in, Ammon mi thawn Moab ram cu an neh ding. Keimah in ka nehter ding ih Ammon mipawl ti a um nawn lo ding. 11Moab cu ka hrem ding ih keimah hi Bawipa ka si kha an thei ding,” a ti.

Edom Parih Profet ṭong

12Cungnungbik Bawipa in, “Edom mi pawl in Judah mi parah zaangfahnak nei loin phuba an lak ruangah Edom mi pawl cu kumkhua in mawhphurtu ah an cang. 13Atu-ah ka than a si: Edom cu ka hrem ding ih minung le ṭilva hmuahhmuah ka that ṭheh ding. Teman khua ihsin Dedan khua tiang an ram cu ramṭhing ah ka tuah ding ih an minung pawl cu ralnam in an thi ding. 14Ka minung Israel mi pawl in ka ai ah Edom mi parah phuba an la ding ih ka thinhengnak le ka aithawhnak cu Edom mi pawl an tuarter ding. Keimah ih phuba lakmi cu ziangvek a si ti cu Edom in a thei ding,” a ti. Cungnungbik Bawipa in a sim zo.

Filistin Parih Profet ṭong

15Cungnungbik Bawipa in, “Filistin mi pawl in kumkhua an ral a si mi pawl parah zaangfahnak zianghman nei loin phuba an lak ih an mitkem in an siatsuah ṭheh a si. 16Curuangah atu-ah thu ka than: Filistin cu ka do ding ih ka that ṭheh hai ding. Filistin Rawn ih a nung hrihmi pawl khal ka siatsuah ding. 17Nasa zetin ka hrem ding ih an parih phuba ka lakmi cu a na ngaingai ding. Ka thinhengnak an tuar rero ding. Cuticun keimah hi Bawipa ka si kha in thei ding,” a ti.

Currently Selected:

EZEKIEL 25: FCL

Highlight

Copy

Compare