EZEKIEL 24

A Tlapmi Beel

1Sal kan taannak kum kua kum, thla hra thla, ni hra ni ah Bawipa in ka hnenah, 2“Milaipa, tuihsun nithla hi ṭhatein ca sungah khum aw; ziangahtile tuihsun hi Babilon siangpahrang in Jerusalem kulh a thok ni a si. 3Keimah Cungnungbik Bawipa in ka minung raltho pawl hrangih tahṭhimnak ka neihmi hi sim hai aw:

Meisa parah beel toh aw,

Beel cu tidai khat te in than aw.

4A sungah sa thawbik pawl can

cia in re aw;

Sa liang le sa cawn pawl,

A hleice ih hrilmi sa ruh tan

cia pawl tla.

5Sa thawbik tuusa pawl sihaiseh.

Beel hnuai ah zanthing pawl hun

thlak aw. Tidai soseh.

Satit le saruh pawl suang aw,”

a ti.

6Cungnungbik Bawipa in hiti in a ti: “Mithat pawl umnak khawpi cu a cem fai zo! Thianfaiter dah lomi a tlapmi beel vek a si. Sa semkhat hnu semkhat an thur vivo ih semkhat hman a taang nawn lo. 7Khua sungah mi an that, asinain leivut ih a khuh theinak leilung parah thisen cu an luangter lo. A ngilmi lungto parah an luanter. 8Cutawkah cun thisen cu ka taan, zohman ih thuh thei lo dingah le thinhengnak thawn phuba lak theinak dingah,” tiah a ti.

9Cungnungbik Bawipa in hiti in a ti: “Mi thattu pawl umnak khawpi cu a cem riai a si. Keimah rori in zanthing ka khawm ding; 10tam sinsin in zanthing cu beet uh. Meisa muah uhla sa cu suang uh. A tidai kang thluh in suang uh. A ruh khal kaang thluh seh. 11Cule dar beel lawng cu meiling parah re uhla sen ko in vaam hiamhiam seh. Cuticun meivam sungah tlap ih a ei ciami cu a cem cuang lo ding naón, 12a tlapmi a kaang ṭheh hnuah cun beel thiangah a cangsal ding. 13Maw Jerusalem, na nuncan ṭhatlonak in a lo borhhlawhter a si. Thianfaiter ka lo tum naón na borhhlawh thotho. Ka thinhengnak nasa zetih na tuar hlanlo na thiangfai nawn lo ding. 14Cungnungbik keimah Bawipa in ka sim zo. Hna ka ṭuan ngaingai tikcu a thleng zo. Na sualnak pawl hi ka um san men lo ding; na parah zaangfahnak ka nei lo ding. Ka thin ka ṭhum lo ding. Na tuahmi ruangah hremnak na tuar ding,” tiah Cungnungbik Bawipa in a sim zo.

Profet Ih Nupi A Thi

15 Bawipa in ka hnenah, 16“Milaipa, na duh bikmi cu rinlopi ah na hnen ihsin ka la ding. Asinain phunzai hlah, a ṭah khal ṭap hlah, na mitthli khal tla hlah seh. 17Na ik-ik khal zohman in thei hlah hai seh. Na mithi ngai langternak ah na lu khuh lo le na ke lawngin a lengah suak hlah. Na hmai khuh hlah, mithi ngai pawl ih eimi rawl khal ei hlah,” i ti.

18Cuih sun zinglam ah mipi pawl thawn thu kan ruah aw rero. Cuih zanlam ah ka nupi in i thih san. A thaisun cu Bawipa ih i sim vek cun ka um. 19Mipi pawl in, “Ziangah so hi bangtuk in na um?” tiah in sut.

20Cutikah an hnenah, “Bawipa in ka hnenah, 21nanmah Israel mi hnenah hi thu sim dingah i fial: Israel mi pawl, nan Biakinn khohkhahnak ruangah nan hngal a si. A zoh nan duh mi le nan pan duh bikmi Biakinn cu Bawipa in a borhhlawhter ding. Cule Jerusalem ih a taangta mi nan innsang ciarih mino deuh pawl cu ral kut in an thi ding. 22Cuih hnuah keimah ih ka tuah vek cekci in nan tuah ve ding. Nan hmai nan khuh lo ding ih mithi ngai pawl ih eimi rawl nan ei lo ding. 23Mithi nan ngai lo ding, ṭah khal nan ṭap lo ding. Lukhuh lo le ke lawngin lengah nan suak lo ding. Nan sualnak ruangah nan taksa a cem duahdo ding ih nan aihram ton aw ding. 24Nan hrangah keimah hi hminsinnak ka si ding; ka tuahmi hmuahhmuah hi nan tuah ṭheh ve ding. Bawipa in hi thil pawl a kimter tikah Bawipa Pathian a si kha nan thei ding, i ti a si,” tiah ka sim hai.

25 Bawipa in, “Milaipa, an hnen ihsin a hngetzetmi Biakinn, an uar zetmi, sunglawi zetin an zoh duhmi le an pan duhmi Biakinn cu ka la hlo ding. An fanu le an fapa pawl khal ka lakhlo sak ding. 26Cubangtuk ih ka tuah ni ahcun, cuih siatsuahnak ihsin a luattu pakhatkhat in cuih thu cu an ra lo sim ding. 27Cuih ni ahcun na ṭong theilonak hi a reh ding; na ṭong thei sal ding ih a luattu hnenah na ṭong thei ding. Cuticun mipi hrangah hminsinnak na si ding ih Bawipa ka si hi an thei ding,” tiah a ti.

Currently Selected:

EZEKIEL 24: FCL

Highlight

Copy

Compare