EZEKIEL 21

Bawipa Ih Ralnam

1 Bawipa in ka hnenah, 2“Milaipa, Jerusalem hi mawhthluk aw! An khawzing biaknak hmun pawl mawhthluk hai aw. Israel ram hi ralrinnak pe awla, 3Bawipa keimah ih ṭong hi sim aw: Keimah hi nan ral ka si. Ka ralnam ka suah ding ih nan zatein mi mi sia siseh mi ṭha siseh ka lo that ṭheh ding. 4Saklam ihsin thlanglam tiang mi hmuahhmuah parah ka ralnam ka hmang ding. 5Keimah Bawipa in ka ralnam ka zuuk zo ih a kawm sungah ka khum sal nawn lo ding, ti kha zozo khal in an thei ding.

6“Milaipa, riahsiat ruangih thinlung kuai ṭheh ding vekin aihram aw. Mi hmuahhmuah ih an lo hmuh theinak ding hmunah riahsia in hrum ciamco aw. 7Ziangah so na hrum ciamco ti ih an lo sut ahcun thusia a rathleng ding mi ruangah ka hrum a si, ti aw. Cuih thusia a rathlen ngaingai tikah cun an thinlung ṭihnak in a khat ding, an kut a zawng thluahthlo ding, ralṭhatnak an neih mi hmuahhmuah a cem ṭheh ding ih an khuk pawl a hnin ciamco ding. Cuih tikcu a ra thleng zo, a ra thleng zo a si,” tiah a ti. Cungnungbik Bawipa in a sim zo.

8 Bawipa in ka hnenah, 9“Milaipa, profet na si vekin phuangsuak aw. Keimah Bawipa ih ka ṭongmi hi mipi hnenah sim aw:

Ralnam, ralnam pakhat cu hriam

zetin an tat,

Tleu zetin an hnawt.

10Mi thahnak ah tat hriammi a si;

Nimthlakau vekin tleu zukzo

dingah hnawtmi a si.

Zohman in nuam an ti lo ding;

Ziangahtile ka minung pawl in

Ralrinnak pekmi le hremnak

hmuahhmuah cu

Zianghman ah an siar lo a si.

11Ralnam cu an hnawt,

Zamrang ih hman theih dingah.

An tat hriam ih an hnawt,

Mi thattu kut sungih ret dingah.

12Milaipa, ninghang in ai ciamco aw,

Hi ralnam hi ka minung pawl

thahnak ah timi a si.

Israel lal pawl thah nakah an ti.

Ka minung pawl thawn thah cih

an si ding,

Israel hotu pawl tla cu!

Riahsia in na ṭang cuum aw.

13Ka minung pawl ka hniksak,

An sual an sir duh lo a si ahcun,

Hi thil pawl hi an parah

a thleng ding.

14“Milaipa, profet na si vekin atu-ah phuangsuak aw. Na za beng awla ralnam cun a sat rero ding. Mi thattu nam a si, ṭihtertu nam a si ih mi sattu nam a si. 15Ka minung pawl an ralṭhatnak a cemter ih a sawnter hai. Nimthlakau vekin a tleu zukzo mi ralnam thawn, mi that dingah tiar cia in an khawpi cu ka fuuk. 16Maw ralnam, vorhlam le kehlam ah sat vivo aw. Na hernak kipah sat vivo aw. 17Kei khal ka za ka beng ding ih cuticun ka thinhengnak a reh ding. Keimah Bawipa in ka sim zo,” a ti.

Babilon Siangpahrang Ih Ralnam

18 Bawipa in ka hnenah, 19“Milaipa, a ralnam thawn Babilon siangpahrang a run theinak lamzin pahnih in hminsin aw. Cuih lamzin pahnih cu ram pakhat ihsin a thok ding. Lamzin ṭeekah hminsinnak ṭhuam phun aw. 20Pakhat in Ammon khawpi Rabbah fehnak lamzin a hmuh ding ih a dang pakhat in ralhruang ih kulhmi Judah khawpi Jerusalem lamzin a hmuh ding. 21Babilon siangpahrang cu lamzin ṭeekah a ding. Khui zin ka thlun ding ti theihnak ah ai a zing: thal pawl thing tahrat in a zoh; a milem pawl thu a ron ih raithawinak sathin hnit a zoh. 22‘Jerusalem,’ ti ih nganmi a thal cu vorhlam kut in a kai. Cuih thal cun ruhkulh pawl sut thluknak ding, raldo tikah hawhawt ciamco ding, kotka pawl sut balnak ding, ralhruang hnakin sangsawn ih leilung dawl ding le donhleisang don ding pawl a sim ṭheh. 23Lungkimnak cakhen an tuah zo ruangah hibangtuk in thil a cang ding ticu Jerusalem mi pawl cun an zum lo. Sikhalsehla hibangtuk in a cang ngaingai ding cu an sualzia theihternak ah le ral ih kaihmi an si ding, ti ih ralrin pek cianak a si. 24Himi cu keimah Cungnungbik Bawipa ih ka ṭongmi a si. Nan sualnak pawl an lang ṭheh zo. Nan mawhzia cu zapi theih a si zo. Hnonmi nan si thlang ih nan ral pawl ih kut ah ka lo pe ding a si.

25“Nang mi ṭha lo, mi borhhlawh Israel hotu, hremnak neta bik na tuar ding ni a ra thleng cuahco zo. 26Cungnungbik Bawipa keimah in ka sim zo. Na siangpahrang lukhuh le na lupawng cu hlon aw. A hlan vekin zianghman a um nawn lo ding. Farah nauta pawl kha thuneihnak dinhmun ah cawisaang aw. Mi uktu pawl hnuai ah ṭhum ṭheh aw. 27Siatralnak! Siatralnak! Asi, khawpi cu ka siatsuah ṭheh ding. Asinain hi khawpi hrem dingah ka hrilmi uktu a ra thlen hlan cu hi thil cang ding pawl hi a kim hrih lo ding; a kim tikah a kut ah ka pe ding.

Ralnam Le Ammon Mi Pawl

28“Milaipa, profet na si vekin phuang awla Israel a hmuhsuamtu Ammon mi pawl hnenah ka ṭongmi hi than aw. An hnenah:

‘Ralnam cu mithat dingah zuuk

cia in a um;

Mi that dingih hnawt tleumi a si;

Nimthlakau vekih tle zukzo

dingah.

29Langnak nan hmuhmi cu thuphan an si ih hmailam thu nan simsungmi cu thulolak an si. Mi ṭha lo le mi siava ngaingai nan si ih nan tuarnak ni, neta bikih hremnak nan tuarnak ni cu a ra thleng cuahco zo. Ralnam in nan hngawng a lo sat ding.

30“‘Nan ralnam cu a kawm sungah thun sal uh. Nan seemnak hmun le nan suahnak ramah nan thu ka ṭhen ding. 31Meiling bangin ka thinhengnak cu nan parih ka burh tikah ka thinhengnak nan tuar ding a si. Cule mi siatsuah lamih a thiambik pawl, zaangfah nei lomi pawl ih kut ah ka lo pe ding. 32Meisa in siatsuah ṭheh nan si ding. Nan thisen cu nan ram sungah a luang ding ih zohman in an lo thei nawn lo ding,’ ti aw,” tiah a ti. Bawipa in a sim zo.

Currently Selected:

EZEKIEL 21: FCL

Highlight

Copy

Compare