EZEKIEL 20

Pathian Duhnak Milai In An El

1Thawng kan tlaknak kum sarih kum, thla nga thla, ni hra ni ah Israel mi hotu hrekkhat pawl cu Pathian ih duhnak theih duh ah thuron dingin ka hnenah an ra ih ka hmaiah an to. 2Bawipa in ka hnenah, 3“Milaipa, himi pawl hnenah hin Cungnungbik Bawipa ih ka ṭongmi cu sim aw: Ka duhnak sut dingah nan ra a si lo maw? A nungmi Pathian ka sinak hmin saal in ka lo sim: Ka hnenah zianghman nan dil thei lo ding. Cungnungbik Bawipa keimah in ka sim zo.

4“Milaipa, an parah thuṭhennak relcat dingin na tiar aw maw? Na tiar aw asile tuah zaang aw. An pale pawl in thil fihnungza an tuahmi hi theiter hai aw. 5Ka simmi hi theiter aw: Israel ka rak hril laiah an hnenah thukamnak ka rak tuah. Izipt ramah an hnenah ka lang ih, ‘Keimah hi nan Bawipa ka si,’ tiah ka sim. 6Culai ah Izipt ram ihsin ka suahpi ding ih an hrangih ka hrilcia mi ram, cawhnawi le khuaitizu a luannak ram, ram hmuahhmuah lakih ram ṭha bikah ka fehpi hai ding, tiah thu ka kam a si. 7Keimah hi Bawipa an Pathian ka si ruangah an duh zetmi fihnungza milem pawl cu hlon dingah le Izipt ramih khawzing pawl thawn anmah le anmah mi borhhlawh siter aw lo dingah ka sim. 8Sikhalsehla in dodal ih ka thu in ngai lo. An milem fihnungza pawl cu an hlon lo ih Izipt khawzing pawl khal an tlansan cuang lo. Ka thinhengnak cu Izipt ramah nasa zetin an tuar dingah ka ruat zo. 9Sikhalsehla ka tuarter sal lo, ziangahtile an umnak Izipt ramsung minung pawl hmaiah ka hmin a sia pang ding ka ti. Israel mi pawl hnenah cun Izipt ram ihsin ka lo hruaisuak ding a si, tiah ka than.

10“Cuticun Izipt ram ihsin nelrawn sungah ka hruai. 11A thluntu pawl an nunnak dingah ka thukham pawl ka pek ih ka daan pawl ka zirh. 12Kan karlak ih thukam hminsinnak ah le keimah hi anmah thianghlimtertu an Bawipa ka si ti theihternak dingah Sabbath ni ul dingah thu ka pek. 13Sikhalsehla nelrawn ramsung khalah in dodal ṭhiamṭhiam. A thluntu hnenah nunnak a thlengtertu ka daan pawl cu an bal ih ka thupekmi pawl an hnong. Sabbath ni an buar ṭheh. Nelrawn ram ahcun ka thinhengnak nasa zetih an tuarnak dingah le anmah siatsuah ṭheh dingah ka ruatcat zo. 14Asinain ka ti suak lo, ziangahtile Izipt ram ihsin Israel mi pawl ka hruaisuahnak a hmutu miphun pawl lakah ka hmin a sia pang ding, ka ti. 15Curuangah cawhnawi le khuaitizu a luannak ram, ram hmuahhmuah lakih ram ṭha bik ka pekmi ram ahcun ka thlenpi lo ding tiah ban phar le siatcam in thu ka kam a si. 16Ka thupekmi an hnong ih ka daan an bal. Sabbath an buar ih milem biak an duh sawn ruangah cutiih siatcam in thu ka kamnak a si.

17“Sikhalsehla an parah zaangfahnak ka nei sal ih nelrawn ram ah that ṭheh loin ka um. 18Anmah lakih mino pawl cu: Nan pu le nan pa pawl ih an tuahmi daan tla cu thlun hlah uh; an nunphung khal cawng hlah uhla an milem pawl thawn borhhlawh awter hlah uh, tiah ralrinnak ka pek. 19Keimah hi Bawipa nan Pathian ka si. Ka daan le ka thupekmi pawl thlun uh. 20Sabbath ni cu ni thianghlim ah tuah uhla cuticun thukamnak kan tuahmi hminsinnak ah a cang pei ih keimah hi Bawipa nan Pathian ka si kha a lo theihtertu a si ding, ka ti.

21“Sikhalsehla cuih san milai pawl khal in in dodal ṭhiamṭhiam. A thluntu pawl cu an nung ding ti ih ka timi ka daan pawl le ka thupekmi pawl cu an bal. Sabbath khal an buar. Nelrawn ah ka thinhengnak nasa zet tuar dingah le that ṭheh dingah ka tum zo. 22Asinain ka tuahsuak lo, ziangahtile Izipt ram ihsin Israel mi ka hruaisuaknak a hmutu miphun pawl lakah ka hmin a sia pang ding, ka ti ruangah a si. 23Curuangah thu ka lo kam sal. Leilung pumpuluk ah ka ṭhekdarh hai ding tiah ka kam a si. 24Ziangah hiti in ka tuah tile annih in ka thupekmi an hnong, ka daan an bal, Sabbath an buar ih an pupa pawl ih an rak renmi milem pawl kha an biak ṭhiamṭhiam a si.

25“Cuih tlunah an hrangih a ṭha lomi daan le nunnak a pe thei lotu thu pawl ka pek. 26An milem thawinak thawn an borhhlawhter aw ih an fapatir thawinak ih an pekmi khal ka kham lo. Anmah hremnak ah le keimah hi Bawipa ka si ti langternak ah hiti in ka tuahmi a si.

27“Cule milaipa, Cungnungbik Bawipa keimah in Israel mi hnenih ka ṭongmi hi sim aw: An pupa pawl rintlak lo an sinak in keimah in thangsiat a si. 28An hnen ah pek ding ih ka tiamciami ramah ka hruai hai. Asinain tlangsaang le thinghring an hmuh tik poh ah thawinak an pek vivo. Thawinak an urmi le sabitti an pekmi pawl in ka thin in hengter ngaingai. 29Nan va fehnak ṭhumhmun pawl hi ziangso an si? tiah ka sut. Curuangah cuih hmun pawl cu ‘Bamah,’#Bamah ti cu ṭhum Hmun timi a si ih Nan Fehnak ti thawn a aw suah a bangrep. Khawvel pawl an khawzing biaknak hmun a si ih Israel mi pawl cun an kham. tiah kawh tata an si. 30Ka ṭongmi hi Israel mi sim aw: Ziangah so nan pupa pawl ih sualnak an tuahmi cu nan tuah ve ih an milem hnenah an taksa tiang an pek vekin nan pek duh ve? 31Tuihsun tiang thilri nan pe lai ih cuih milem hnenah cun nan faate pawl hman meisa ah ur tahrat in thawinakah nan pek ih cuticun nan borhhlawhter aw a si. Cuih hnuah nannih Israel pawl ra tahrat in ka hnenah ‘Na duhnak ziang a si?’ tiah in ra ti lai hrih. A nungmi Pathian ka sinak hmin saal in ka lo sim: Zianghman in sut thei lo ding. 32Miphun dang pawl vekin um nan duh ih ram dangih a ummi, thing le lung a betu pawl vekin um nan duh a si; nan thinlung sungah a hliah aw zo. Sikhalsehla cuvek cun a si dah lo ding.

Pathian In A Hrem Ih A Ngaithiam

33“A nungmi Pathian, Cungnungbik Bawipa keimah in ralrinnak ka lo pek: Ka thinheng in ka baan thacak le ka huham hmuahhmuah thawn ka lo uk hai ding. 34Ka lo ṭhekdarhnak miphun pawl le ram pawl ihsin ka lo kirter ding ih ka ban thacak, ka huham le ka thinhengnak thawn in ka lo finkhawm hai ding. 35‘Miphun pawl ih Nelrawn,’ ah ka lo hruai ding ih nan mithmuh ah nan thu ka ṭhen ding. 36Nan pupa pawl Izipt ram Sinai Nelrawn ih ka hnon vek khan nanmah khal atu-ah ka lo hnong hai ding,” tiah Cungnungbik Bawipa in a ti.

37“Nan duhduh ih caangvai thei lo dingin ka lo uk ding ih ka thukam thlun tengteng dingah ka lo tuah ding. 38Nanmah lak ihsin raltho le mi dodal pawl cu ka hlon ding. Atuih an umnak ram ihsin ka suah ding, asinain Israel ram ahcun ka kirter lo ding. Cutiin Bawipa ka si kha in thei ding.

39Cungnungbik Bawipa in, “Israel mi pawl, tho uhla feh uh, nan milem pawl cu nan duh vekin va bia uh! Sikhalsehla atu ihsin ralrinnak ka lo pek cia: hi bangtuk ih nan tuah ṭheh hnu ahcun ka thu nan thlun a ṭul ding; nan milem hnenah thawinak pe tahrat in ka hmin thianghlim cu nan thangsiatter nawn lo pei. 40Khi ram sungah ka tlang thianghlim, Israel ramih tlangsaang parah cun Israel mi nan zatein Keimah in bia ding. Nan parah ka lung a awi ding ih ka hnenah nan hlanmi ṭha bik, nan thawinak pekmi le nan laksawng thianghlim pawl pe dingin ka lo ring ding. 41Ka lo ṭhekdarhnak ramsung ihsin ka lo suah ih hmun khatih ka lo finkhawm tikah, mei-ur thawinak nan pekmi pawl cu ka saang ding ih miphun pawl in a thianghlimmi ka si kha in hmu ding. 42Nan pu le nan pa pawl hnenah pek dingih ka rak tiamciami Israel ramih ka lo kirpi tikah cun Bawipa ka si kha in thei ding. 43Cutikah ziangtlukih fihnungza thil so kan tuah tile ziang vekin kan borhhlawhter aw ti kha nan vun mang sal ding. Thil ṭha lo tampi nan tuah ruangah nanmah le nanmah nan fih aw ding. 44Ka hmin hum dingih thil ka tuah tikah cun nanmah Israel mi pawl in Bawipa ka si kha in thei ding, ziangahtile nan ṭhat lo le nan sual tluk cun ka lo tisiat lo sokhaw,” tiah Cungnungbik Bawipa in a ti.

Thlanglam Ih Meisa

45 Bawipa in ka hnenah, 46“Milaipa, thlanglam vun hoi hnik! Thlanglam kha vun hro awla thlanglam Negeb tupi parah na thu vun phuang aw. 47Cungnungbik Bawipa ih ṭongmi cu thlanglam tupi hnenah sim aw: Zohhnik! Keimah in meisa ka muah ding ih thingkung a hring siseh, a ro siseh na sungih ummi thingkung hmuahhmuah an kaang ṭheh ding. Zohman in an hmit thei lo ding. Thlanglam in saklam ah a hung tlul ding ih mi hmuahhmuah in a mi-emnak an tuar ding. 48Bawipa keimah ih urmi a si kha an hmu ding ih zohman in an hmit thei lo ding,” tiah a ti.

49Sikhalsehla kei in, “Cungnungbik Bawipa, cubangtuk cu i tuarter hram hlah aw. Mi hmuahhmuah in anih cu tahṭhimnak lawnglawng in a ṭong a si, tiah ka parah an phun ciamco,” tiah ka ti.

Currently Selected:

EZEKIEL 20: FCL

Highlight

Copy

Compare