EZEKIEL 22

Jerusalem Sualnak

1 Bawipa in ka hnenah, 2“Milaipa, mithat pawl an khahnak khawpi hi a thu ṭhen dingah na tim na tuah maw? Fihnungza thil tampi a tuahmi hi fiangtein a hnenah simta aw. 3Cungnungbik Bawipa keimah ih ka ṭongmi hi sim aw: na minung tampi na that ih milem bia tahratin na borhhlawhter awk ruangah na tikcu a rathleng cing ding. 4Mi na that ih na tuahcopmi na milem pawl thawn na borhhlawhter awk ruangah na tikcu a rathleng ding, na caan a cem cing ding a si. Curuangah a si miphun pawl ih hnihsuahsainak ah ka lo canter ih ram tampi ih hmuhsuam dingah ka lo tuah. 5Cin le daan zianghman na neih lo ruangah ram hla tilo, ram nai tilo in an lo nautat ciamco. 6Israel hotu pawl in anmah ih thazaang an ring ih mi an that. 7Khawpi sung mi zohman nu le pa upattu an um lo. Ramdang mikhual pawl nan bum ih nuhmei le ngakṭah pawl par ihsin hlawknak nan hawl. 8Hmun thianghlim pawl zianghman ah nan siar lo ih Sabbath khal nan buar. 9Mihrek in midang pawl thah duh ah thuphan an per. Mihrek in raithawinak sa an ei. Mihrek in an taksa hiarnak lawnglawng an diriamter. 10Mihrek cu an pa ih nupi thawn an it tlang. Mihrek in nunau pawl thi an neih lai hmanah hranhram in an sualpi. 11Mihrek cu an uire; Midang in an mo nu siseh an pa ih fanu siseh an thlem. 12Nanmah lakih mihrek in tangka duh ah mi nan phil. Mihrek in an unau Israel mi hnenah tangka cawih tahratin tangka ṭhang an lak ih a miat hawl in an lian. Kei cu in thei nawn lo,” a ti. Cungnungbik Bawipa in a sim zo.

13“Ruk nan ru ih mi nan thah ruangah ka kuttum in ka lo cuum ding. 14Cutiih ka lo tuah ngaingai ni ahcun, cahnak le ralṭhatnak kan nei ding tiah mawsi nan ruat? Keimah Bawipa in ka sim zo ih ka thu cu ka kimter ding. 15Nan minung pawl cu miphun dang hnenah le ram dangdang ah ka ṭhekdarh ding ih thil sualral nan tuahmi cu ka cemter ding. 16Cuticun miphun dang pawl in an lo thangsiat ding, asinain nannih in Bawipa ka si kha in thei ding,” tiah a ti.

Pathian Ih Thianternak Somei

17 Bawipa in ka hnenah, 18“Milaipa, Israel mi pawl hi ka hrangah hman tlak an si lo. Thir-eek vek an si: sodengtu in somei sungih a taantami ngun, dar, rangva, thir le suan pawl ih eek bangtuk an si. 19Curuangah Cungnungbik Bawipa keimah in thir eek vekih santlai lo an si ti kha atu-ah ka sim a si: Jerusalem ah ka ko ṭheh ding ih, 20ngun, dar, thir, suan le rangva pawl somei sungih an finkhawm vekin ka finkhawm ding. Cupawl cu somei sungih an titter vekin ka tuah ding. Ka thinhengnak le ka aithawhnak in ka titter ṭheh hai ding. 21Asi, Jerusalem ah ka finkhawm ding ih an hnuai ihsin meisa ka muah ding ih ka thinhengnak in ka titter hai ding a si. 22Somei sungih ngun an titter vekin Jerusalem ah ka titter hai ding ih cuticun Bawipa ih thinhengnak kan tuar ti an thei ding,” tiah a ti.

Israel Hotu Pawlih Sualnak

23 Bawipa in ka hnenah hiti in a sim sal. 24“Milaipa, Israel mi pawl hi sim aw: an ram hi a thianghlim lo; curuangah ka thinheng in ka hrem ding. 25An hotu pawl cu anmah ih deh ciami ramsa tlunih a huuk reromi kiosa bangtuk an si. Mi an that, an zatein an ngah theizat in tangka le thilri an lak; mi an thah ruangah nunau tampi nuhmei ah an cangter. 26Puithiam pawl in ka daan an bal ih thil thianghlim kha an upat lo. Thil thianghlim le thil borhhlawh an thleidang thiam lo. A thiangmi le a baalmi an dan awknak kha mi an zirh lo. Sabbath khal zianghman ah an siar lo. Curuangah Israel mi pawl hin keimah in upat lo a si. 27Acozah bawi pawl cu an deh ciami ramsa a bauhthlek rerotu cinghnia hraang vek an si. Milian si duh ah mi an that. 28Mi in phar pawl cu siirang an hnih vekin an sualnak cu profet pawl in an thuhsak a si. Profet pawl in langnak dik lo an hmu ih simsungnak thuphan an sim. Cungnungbik Bawipa ih thu ka sim an ti; asinain Bawipa keimah in an hnenah thu ka sim dah lo. 29Milian pawl in mi an bum ih mi an ram. Farah zonzai an tisiat ih ramdangmi parah hlawknak an hawl. 30Phardawl a dawl theitu minung ka hmu lo; phar pawl bal ṭheh a sinak zawn ih a ding theitu le ka thinheng in ram pumpi siatsuah ding ka tum tikah rampi a ṭan theitu ding minung ka hawl rero naón pakhat hman ka tong lo. 31Curuangah ka thinhengnak cu an parah ka burh ding ih an thil tuahmi ruangah ka thinlingnak meisa in ka siatsuah ding,” tiah a ti. Cungnungbik Bawipa in a sim zo.

Currently Selected:

EZEKIEL 22: FCL

Highlight

Copy

Compare