EZEKIEL 16

Jerusalem Cu Rintlak Lo Ah A Cang

1 Bawipa cun ka hnenah hiti in a sim sal: 2“Milaipa, Jerusalem in thil borhhlawh a tuah hi ṭhatein sim aw: 3Ziangkimtithei Bawipa in a hnenih ka simmi hi simfiang aw:

“Maw Jerusalem, Kanaan ramah a suakmi na si. Na pa cu Amor mi a si ih na nu cu Hit mi#Amor mi le Hit mi pawl cu Israel mi pawl in milem bia le hlawhhlang phun ih an ruahmi an si. a si. 4Na suah laiah zohman in na laihri an lo tan lo; zohman in an lo kholh lo; ci thawn khal an lo hnawt lo ih puan khal in an lo tuam lo. 5Zohman na parah zaangfahnak nei in hi bangtuk ih a lo tuahsaktu an um lo. Na suah laiah duhtu khal na nei lo. Hramlakih hlon menmi na si.

6“Cule na kiangin ka feh tikah na thisen lakih na taal rero kha ka lo hmu. Thisen in a lo tuam ṭheh, asinain na thih ding cu ka lo siang lo. 7A harhdam zetmi thingkung bangin ka lo ṭhanter. Na hung ṭhang ih a cakzetmi fala na hung si. Na sam a sau, na pawhte a bom, asinain na tak lawngin na um.

8“Na kiangih ka fehsal tikah mi ngai mi na neih ding tikcu a thleng ka ti ih na taklawng cu ka angkifual in ka lo khuh ih nangmah ngaitu si dingah thu ka lo kam. Asi, nangmah thawn ṭhit umnak thukam ka tuah ih ka ta ah na cang,” a ti. Cutiin Ziangkimtithei Bawipa in a sim.

9“Cule tidai ka lak ih na thi cu ka lo hnawtfai sak. Na vun cu olif hriak in ka culh. 10Ṭelhmi puan in ka lo thuam ih saphaw ṭha bik ih tuahmi kedam ka lo pek; lu tuamnak puan paate le pu angkifual ka lo pek. 11Nunau hlawnthil faute le ṭhi pawl ka lo leih. 12Hnarkhaih, hnakhaih pawl le suilukhuh mawizet ka lo pek. 13Sui le ngun hlawnthil na nei ih puanṭelh le pu hnipuan na hruk ringring. Maida ṭha bik in tuahmi sang na ei ih khuaitizu le olif hriak na ei. Na mawizet ih siangpahrang nu ah na cang a si. 14Soisel ding um lo ih na mawi ruangah ramkipah na hmin a thang; hitluk duhnungza ih a lo tuahtu cu keimah ka si,” a ti. Cutiin Ziangkimtithei Bawipa in a ti.

15“Sikhalsehla na mawinak le na hminthannak cu zum awknak ah na hmang ih na hnenih a rami hmuahhmuah thawn na it vivo.#Hi zawn ah hin Hebru Baibal sungah ṭong fang dang pahnih a um hrih naón a tican theih thei a si lo. 16Na khuavang pawl biaknak hmun mawiternak ah na hnipuan hrek khat cu na hmang ih hlawhhlang#Hi zawn ah hin Hebru Baibal sungah ṭong fang dang pali a um hrih naón a tican theih thei a si lo. bangin na tonmi kip hnenah na taksa na pek. Hi bangtuk ih cang ding a si lo. 17Ka lo pekmi sui le ngun hlawnthil pawl cu mipa lem tuahnak ah na hmang ih anmah thawn nan sual. 18Ka lo pekmi puanṭelh pawl cu milem pawl khuhnakah na hmang ih na hrangah ka timi olif hriak le rimhmui pawl cu milem pawl hnenah na pek a si. 19Ei ding rawl thaw bik sangvut, olif hriak le khuaitizu ka lo pek; asinain milem pawl thinlung tlonnak ah thawinak ah na pek ṭheh a si,” a ti. Cutiin Ziangkimtithei Bawipa in a ti.

20“Cule fanu le fapa i hrinsakmi pawl cu na lak ih milem hnenah thawinakah na pek. Ka hrangah rintlak lo ih na can hi a sia tuk zo lo maw? 21Ziangah so ka faate pawl cu lak tahratin milem hnenah thawinakih na pek? 22Hlawhhlang ṭuan in fihnungza ih na nun rero lai sungah hin na sentet lai ih taklawngte in na thisen lakih na rak taal rero kha na vun ruat dah maw?” tiah a ti.

Jerusalem Cu Hlawhhlang Nun In A Nung

23Cungnungbik Bawipa in, “Na cem, na cem riai a si! Thil ṭha lo hmuahhmuah na tuah ṭheh hnuah, 24lamzin kiangkap kipah milem biaknak hmun na tuah vivo ih hlawhhlang hna na ṭuan. 25Na mawinak cu ciarbek lakah na hnuk a si. A ra mi kip hnenah na taksa na pek ih a ni a ni in hlawhhlang hnaṭuan ah na pil deuhdeuh. 26A hurnak a suup thei lotu na ramhnen Izipt mi pawl cu na ihkhun ah na itter ih cutiin na hlawhhlannak in ka thin i hengter deuhdeuh a si.

27“Atu-ah nangmah hrem dingah le na covo leiram thlawsuah lakkir dingah ka kut ka hawi zo. Nangmah a lo huatu le na nunsual ruangih a lo mitkemtu Filistin mi pawl ih kut sungah ka lo pe zo.

28“Midang in diriam in an lo tuah thei lo ruangah Assiria mi pawl na dawi. An hlawhhlang ah na cang, sikhalsehla annih khal in diriam in an lo tuah thei ve lo. 29Babilon mi pawl, sumtuah thiam pawl hrang khalah hlawhhlang na si, asinain na di an lo riamter thei thotho lo,” tiah a ti.

30Ziangkimtithei Bawipa in hiti in a ti: “Mi zuangzam na va si so! Ningzahnak zianghman nei lo hlawhhlang bangin hi thil hmuahhmuah cu na tuah ṭheh. 31Lamzin tluan kipah milem biaknak na tuah ih hlawhhlang na ṭuan. Sikhalsehla hlawhhlang dang vekin tangka duh ah na tawivak lo. 32Mah ih pasal sawn duh loin mikhual pawl thawn pawl aw in sualnak a tuahtu nupinu vek na si. 33Hlawhhlang cu a hlawh man an pek, sikhalsehla nang cun a lo duhtu hmuahhmuah laksawng na ṭhen ih hmunkip ihsin ra in na hnenih ra it dingah nawhthuh na pek vivo a si. 34Nang cu hlawhhlang nunau phundang na si. Hlawhhlang ṭuan dingah zohman in an lo hneek lo. Hlawhhlang man na ngah lo, nangmah sawn in man na pek riangri. Asi, mi phundang na si,” tiah a ti.

Jerusalem Parih Pathian Thuṭhennak

35Maw Jerusalem, hlawhhlang nu! Bawipa ih ṭong hi ngaihnik!

36Ziangkimtithei Bawipa in hiti in a ti: “Hlawhhlang dang bangin na hurnak thawn a lo duhtu pawl hnenah na hnipuan na hlit ṭheh ih fihnungza na milem pawl na biak ih na faate pawl that tahrat in milem hnenah thawinak na pek. 37Hi bangtuk ih na tuah ruangah a rak lo nompitu pawl hmuahhmuah cu na duh mi siseh, na huatmi siseh, hmunkhatah ka finkhawm ding. Na kimvel ah a lo raltu dingah ka kokhawm ṭheh ding ih na hnipuan ka lo hlit ṭheh ding; lawngfangkheh ih na um kha lo hmu hai seh. 38Mipa dang thawn ṭaangṭawm sualnak a tuahtu le mi a thattu nunau cu an hrem hai bangin mi thisen cu na parah ka hlam ding ih ka thinheng le ka aithok in ka lo hrem ve ding ih na thi ding. 39An kut sungah ka lo pe ding ih hlawhhlang na ṭuannak le milem na biaknak hmun pawl kha an balsiat ṭheh ding. Na hnipuan an lak ding; na hlawnthil an lo long ding ih na taklawngte in an lo thlah ding.

40“Lungto in nangmah deng dingah mipi pawl kha an tokhrok ding ih an ralnam in an lo sattan ṭheh ding. 41Na inn pawl meisa in an urciam ding ih na tuarnak cu nunau burpi an zohter ding. Hlawhhlang ṭuan nawn lo dingin ka lo kham ding ih na mi ngaimi pawl laksawng pe nawn lo dingin ka lo kham fawn ding. 42Cuih hnuah ka thinhengnak cu a reh ding ih ka dai ding. Ka thin a heng nawn lo ding ih ka lo thiik nawn lo ding. 43Na sentet laiih ka lo kilkhawinak pawl na hngilh ṭheh ih na thilsual tuahmi pawl in ka ai i thokter. Na parih a thlengmi pawl cu na thil tuahmi pawl ruangih cawhkuan ka lo pekmi an si. Ziangah so fihnungza thil tampi na tuah ih tlunah zuanzamnak tla na beet sinsin?” tiah a ti. Ziangkimtithei Bawipa in a sim zo.

Nu Bang, Fa Bang

44 Bawipa in, “Jerusalem, na parah mipi in ‘Nu bang, fa bang,’ tiah ṭongṭhimnak an hmang ding. 45Nang hi na nu na zon taktak. Na nu cun a pasal le a faate pawl a ngaih lo. Pasal le faate a huatu na unau pawl bangtuk na si. Nang le na unau pawl ih nu cu Hit mi a si ih nan pa cu Amor mi a si.

46“Na u-nu upabik cu a fanu pawl thawn saklam ih a ummi Samaria a si. Na naunu cu a fanu pawl thawn thlanglam ih a ummi Sodom a si. 47An thu cawng in fihnungza an tuahmi tuah ve hi na lung a kim tawk maw? A kim tawk lo; ziang hmuahhmuah na tuah mi ah, rei lote sungah annih hnakin na luar sawn a si.

48“A nungmi Pathian ka sinak hmin saal in Cungnungbik Bawipa in ka lo sim: nangmah le na khawte pawl ih nan tuahmi thil ṭha lo pawl hi na naunu Sodom le a khawte pawl hman in an tuah dah lomi a si. 49Amah le a fanu pawl cu ei ding tirawl tampi an nei ih hnangam le thindaite in an um ruangah an puarthau; asinain mifarah le mi nauta pawl cu zianghman ah an siar lo. 50An hngal ih an thinlung a ruh ruangah le ka huat zawng thil an tuah ruangah, na theih vekin, ka siatsuah ṭheh a si.

51“Na sual tuahmi a hrek hman Samaria cun a tuah lo. A tuah dah mi hnakin fihnungza sawn na tuah a si. Na balh zia hi na unau nu pawl ih balhnak thawn ṭhim tikah annih cu mi thianghlim ti tlak an si. 52Mualpho le ningzahnak na tuar cuahco a ṭul ko. Na siatnak hi a tamtuk ih na kiangkap ih a ummi na unau nu pawl cu mi mawhlo an bang. Na suahpi nunau pawl mi thiangfai tlukih na canter ruangah atu cu na mithmai sen in na ningzahnak hi phur aw,” tiah a ti.

Sodom Le Samaria An ṭhangso Ding

53 Bawipa in Jerusalem hnenah, “Sodom le a fanu pawl, Samaria le a fanu pawl cu ka ṭhangsoter sal ding. Asi, nang khal ka lo ṭhangsoter ding. 54Na nuncan thei aw in na ning a zak ding; na mualphonak in na suahpi nunau pawl kha mifel ah a cangter ding. 55An zatein an ṭhangso sal ding ih nangmah le na khawte pawl tla a hlan vekin nan nungsal ding. 56Na rak puarthau laiah le thilsual na tuahmi phuan ṭheh a si hlanah cun, 57Sodom cu hnihsuahsainak ah na hmang ṭheu a si lo maw? Atu ahcun Sodom vekah na cang zo: Edom mi le Filistin mi le a dang a lo huatu na ramhnen pawl ih hnihsuah sainak ah na cang zo. 58Thil mawi lo le fihnungza na tuah ruangah na tuar ding a si,” tiah a ti. Bawipa in a sim zo.

Kumkhua A Hmunmi Thukamnak

59Cungnungbik Bawipa in, “Na hlawhmi ka lo pe ding, na tuah vekin na parah ka tuah ve ding, ziangahtile na thutiam-awhnak zianghman ah siar nawn loin na thukamnak na bal a si. 60Sikhalsehla na no lai ih thu ka rak lo kammi cu ka hngetter ding. Cule nangmah thawn kumkhua daih thukamnak ka tuah ding. 61Ziangvek thil ka tuah ti kha na ciing ding ih na suahpi nunau pawl - upa siseh nauta siseh - na kirpi sal tikah cun na thil tuahmi parah na ning a zak zet leh ding. Ka thukammi sungah a tel lo naón na suahpi nunau pawl cu na fanu bangtuk ah ka tuah ding. 62Na hnenih ka thukam cu ka tharsuah ding ih cuticun Bawipa ka si kha in thei ding. 63Na tuahsual mi hmuahhmuah ka lo ngaidam ding, sikhalsehla nang cun na ciing ringring ding ih na ningzak in na kaa hman na ang ngam lo ding,” tiah a ti. Ziangkimtithei Bawipa in a sim zo.

Currently Selected:

EZEKIEL 16: FCL

Highlight

Copy

Compare