EZEKIEL 14

Bawipa In Milem Biaknak A Hnong

1 Bawipa ih duhnak theih duh ah Israel hotu hrekkhat pawl cu thuron dingin ka hnenah an ra. 2Cule Bawipa in ka hnenah, 3“Milaipa, hi Israel hotu pawl in an thinlung sungah milem an ret ih cumicu an hrangah rilhbahnak ah a cang. Thu in ron khalle let dingah in maw in ruat?

4“An hnenah Cungnungbik Bawipa keimah ih ka ṭongmi hi sim aw: Israel mi zovek an si khalle sualnak sungih hruailut dingah an thinlung milem hnenah pe tahrat in thuron dingah profet hnenih a rami cu keimah hnenin an milem pawl thawn mil-aw in ka thu lehnak an ngah ding. 5Hi milem pawl in ka minung pawl cu ka hnen ihsin an hruaihlo a si. Asinain ka thulehnak in an thinlung hruai kirsal dingah ka beisei a si.

6“Atu-ah Israel mi pawl hnenah keimah Cungnungbik Bawipa in, ‘Sir aw uh! Kir sal uhla fihnungza nan milem pawl hi tlansan uh,’ ka timi hi sim hai aw.

7“Israel mi pakhat siseh, Israel mi lakih a ummi ramdangmi pakhat siseh, a thinlung ah milem ret tahrat in ka hnen ihsin a tlanhlo ih a rilhbahnak ah milem a ret hnuah thuron dingin profet hnenih a feh a si ahcun Bawipa keimah in thu ka let ding. 8Cupa cu ka ral ah ka tuah ding. Midang hrangah ralrin ṭulmi zohṭhim dingah ka tuah ding. Ka miphun lak ihsin ka hlon ding ih cuticun Bawipa ka si kha in thei ding.

9“Thuphanpi ih thu let dingah profet cu bum ngahmi a si ahcun Bawipa keimah in ka bum ngah ruangah a si. Israel mi pawl sungin ka siatsuah ding. 10Cuih profet le thurontu cu an pahnih in hremnak bangrep an tong ding. 11Israel mi pawl ka hnen ihsin an tlan lonak dingah le an sualnak sungah anmah le anmah an borhhlawhter awklonak dingah cubangtuk cun ka tuah ding. Anmah cu ka minung an si ding ih kei khal an Pathian ka si ve ding,” tiah Cungnungbik Bawipa in a sim zo.

Noah, Daniel Le Job

12 Bawipa in ka hnenah, 13“Milaipa, ram pakhat cu a sual ih ka hmaiah rintlak lo a si ahcun ka kut in ka vun dawh ding ih a ngah ṭheumi rawl pawl cu ka phiatsak ding. Paam ka tlunter ding ih milai siseh, ṭilva siseh ka that ṭheh ding. 14Mi ṭhazet a rak si mi pathum-Noah, Daniel#Daniel timi hi Danel ti khal a si thei, Ezek 28.3 ah zoh. le Job khal um hman hai sehla an ṭhatnak cun anmah ih nunnak lawng a hum thei ding,” a ti. Cungnungbik Bawipa in a sim zo.

15“Asilole minung pawl deh dingah sahrang pawl ka thlah ding; cuticun an ramsung cu ṭihnak le phannak in a khat ding ih zohman cuih ram ah an feh ngam lo ding. 16Kei cu a nungmi Pathian ka si ih Cungnungbik Bawipa keimah ka nun bangin cuih miṭha minung pathum pawl kha rak nung hman hai sehla anmah ih faate pawl hman an hum suak thei lo ding. Anmaió nunnak lawng an hum ngah ding ih an ram cu ramṭhing ah a cang thotho ding.

17“Asilole an ramah raldonak ka thlenter ding ih minung siseh, ṭilva siseh a siatsuah ṭheh theitu hriamnam ka kuat ding; 18Kei cu a nungmi Pathian ka si ih Cungnungbik Bawipa keimah ka nun bangin cuih miṭha pathum pawl kha rak nung hman hai sehla anmah ih nunnak lawng an hum thei ding ih an faate pawl hman an hum thei lo ding a si.

19“Asilole an ramsungah natsia ka umter ih ka thinhengin minung le ṭilva pawl ka that ih nunnak tampi ka cemter a si ahcun, 20Kei hi a nungmi Pathian ka si ih Cungnungbik Bawipa keimah ka nun vekin, Noah, Daniel le Job tla cu rak nung ve hman hai sehla an faate pawl hman an hum thei lo ding. An ṭhatnak cun anmah ih nunnak lawng a hum thei ding a si,” tiah a ti.

21Cungnungbik Bawipa cun hiti in a ti: “Milai siseh, ṭilva siseh that dingah ka mihremnak nasa bik pali-raldonak, paamnak, sahrang pawl, le natsia pawl-Jerusalem parah ka thlenter ding. 22Mi pakhatkhat a luat ih a faate pawl tla a hum ngah a si ahcun na hnenih an rat tikah rak zoh hai aw. Ziangtluk in miṭha lo an si, ti kha rak hmu awla Jerusalem parih hremnak ka thlentermi hi a dik a si, tiah rak theithiam aw. 23Cuticun ziang hmuahhmuah ka tuahmi ah thuhla dik a um ruangah a si, ti na thei ding,” a ti. Cungnungbik Bawipa in a sim zo.

Currently Selected:

EZEKIEL 14: FCL

Highlight

Copy

Compare