EZEKIEL 13

Mipa Profet Deu Pawl Eelnak

1 Bawipa in ka hnenah, 2“Milaipa, polcop simsungnak simtu Israel profet pawl kha kawk awla Bawipa ih ṭongkam ngai dingin sim hai aw,” a ti.

3Cungnungbik Bawipa cun, “Hi profet aa pawl cu an cem a si. Anmah ih ruahdan thluntu le langnak a tuahcoptu an si. 4Maw Israel mi pawl, nan profet pawl hi a siat ṭheh mi khawpi sungih a ummi santlai lo cinghnia vek an si. 5Phar a cimnak hmun pawl an kil lo ih phar pawl khal an dawl sal fawn lo; curuangah Bawipa ih ni, raldonak a ra thlen tikah, Israel cu hum theih a si nawn lo ding. 6Langnak an hmuhmi pawl cu thuphan hlir an si; hmailam thu an simciami pawl khal thuphan hlir an si. Keimah ih thu a simtu si in an rel aw. Asinain ka thlahmi an si lo. Cu cingin anmah cun an simmi cu kim dingin an ruahsan lai hrih. 7An hnenah hiti in ka sim: Langnak nan hmuhmi pawl hi thulolak an si ih hmailam thu nan sim sungmi pawl khal hi thuphan hlir an si. Pathian ih ṭong a si, tiin nan rel. Asinain nan hnenah kei in ka sim dah lo!” tiah a ti.

8Curuangah Cungnungbik Bawipa in an hnenah, “Nan ṭongmi cu thulolak an si ih langnak nan hmuhmi pawl cu thuphan hlir an si. Nannih pawl cu ka ral nan si. 9Nannih langnak dik lo a hmutu le hmailam thudik lo ih a simtu profet pawl cu ka lo hrem ding. Thu relcat dingih ka minung pawl an khawm awk tikah nannih pawl nan tel lo ding. Israel ramsung minung cazin sungah nan hmin telhcih a si lo ding. Nan ramah nan kir dah lo ding. Cutiin Cungnungbik Bawipa ka si kha nan thei ding.

10“Profet pawl in ziang hmuahhmuah a ṭha ṭheh ko, ti tahrat in ka minung pawl an hruaisual a si. Ziang hmuahhmuah a ṭha ṭheh lo! Ka minung pawl in phar cu lungto thawn hnget lo zetin an dawl hnuah profet pawl an ra ih a lenglam in siirang an culh meen. 11Profet pawl cu va sim aw: an phar dawlmi cu a cim ding. Ruah tak zetin ka surter ding; rial bokbawn tiatia in a parah ka tlakter ding ih thlipi nasazet ka hranter ding. 12Phar cu a cim ding ih siirang in nan culhmi cu ziangso a ṭhahnem? tiah mi hmuahhmuah in an lo sut ding,” a ti.

13Cungnungbik Bawipa ih ṭong cu hiti in a si: “Ka thinheng in an dawlmi phar siatsuah dingah thlipi ka hranter ding, ruah takzet in ka surter ding ih rial nasa zetin ka tlakter ding. 14Siraang in an culhmi phar cu balsiat ka tum a si; ka balsiat ṭheh ding ih a hramṭohnak lungto pawl cu ka langter ṭheh ding. Phar cu a cim ding ih a lo that ṭheh ding. Cutiin mi hmuahhmuah in Bawipa ka si kha in thei ding.

15“Phar in siseh, siirang ih a culhtu pawl in siseh, ka thinhengnak hmual cu nasa zetin an tuar ding. Cule phar cu a cem zo ih siirang in a culhtu pawl khal an cem zo a si, tiah ka lo sim ding. 16Ziang hmuahhmuah a ṭhat lo laifangih ziang hmuahhmuah a ṭha ṭheh ko, ti ih Jerusalem thuṭha a simtu profet pawl cu an cem zo a si,” tiah Cungnungbik Bawipa in a sim zo.

Nunau Profet Deu Pawl Eelnak

17 Bawipa in, “Milaipa, hmailam thu a simsungtu nanmah lakih nunau pawl hi zohhnik! An ṭhatlonak rel awla, 18Cungnungbik Bawipa ih ṭong hi an hnenah sim aw:

“Maw nunau pawl, nan cem a si. Midang pawl nunnak tlunih huham nan neih theinak dingah mi tampi hrangah ai-neihnak kutkhih nan ṭhitsak ih ai-neihnak puan paate lukhuh nan tah sak a si. Ka minung pawl tlunah nunnak le thihnak thu neih nan duh ih nanmah ih ṭhathnemnak ah nan hmang. 19Sang hlom hnihkhat ngah duh ah le sang ah hnihkhat co duh ah ka minung pawl ih hmaiah in thangsiat. Thi dingih cuanglo minung pawl nan that ih nung tlak lo minung pawl sawn nan nunter. Ka minung pawl hnenah thuphan nan sim ih an lo zum fawn,” tiah a ti.

20Cungnungbik Bawipa cun hiti in a sim: “Nunnak le thihnak tlunih thuneitu si nan tumnak ih nan hmanmi ai-neihnak kutkhih pawl cu ka hua a si. Nan kut ihsin cuih kutkhih cu ka tan ṭheh ding ih nan ukmi milai pawl cu ka luatter ṭheh ding. 21Nan lukhuh pawl cu ka at ṭheh ding ih nan uknak huham sungin ka minung pawl cu kumkhua hrangin ka suakter ding. Cuticun Bawipa ka si hi in thei ding.

22“Tuahmawh ka duh lomi mi ṭha pawl cu nan thuphanpernak in an tha nan nauter. Miṭha lo pawl in thil ṭha lo an tlansan theinak ding le an nunnak an hum theinak ding lamzin nan phihsak a si.

23Atu cun langnak dik lo nan hmuhmi le hmailam thu dik lo ih nan simmi pawl cu a cem zo. Ka minung pawl nan thuneihnak huham sungin ka hum a si; cuticun Bawipa ka si hi in thei ding,” a ti.

Currently Selected:

EZEKIEL 13: FCL

Highlight

Copy

Compare