EZEKIEL 11

Jerusalem Cu Hnonmi Khawpi A Si

1Pathian thlarau in i cawi ih Biakinn ih nisuahnak lam kotka ah i ret. Cuih hmunah minung kul hluannga ka hmu ih an ram hotu upa pahnih Azzur ih fapa Jaazaniah le Benaiah ih fapa Pelatiah tla an tel.

2Cule Pathian in, “Milaipa, hi minung pawl in thu ṭha lo an tawlrel ih hi khawpi sungah ruahnak ṭha lo an leenter. 3Annih in, ‘Tuan ah inn pawl kan sak thei hrih lo ding.#tuan ah inn pawl kan sak sal ding ti tla a si thei. Hi khawpi cu rawl suannak beel vek a si ih kannih hi beel sung sa vek kan si,’ an ti. 4Curuangah milaipa, atu ihsin an ṭhat lonak sim aw,” tiah i ti.

5 Bawipa ih thlarau cun i run zeel ih Bawipa ih thu cu hiti ih sim dingin i fial: “Maw Israel mi pawl, nan ṭongmi le nan khawkhanmi hmuahhmuah ka thei ṭheh. 6Hi khawpi sungah hin mi tamzet nan that ih khawsung lamzin cu miruak in a khat zo a si.

7“Curuangah Cungnungbik Bawipa keimah in nan hnenah ka lo sim. Nan tivek in hi khawpi cu rawl suannak beel a si ko; asinain beel sung sa teh ziangso a si? Nan thahmi miruak pawl an si lo maw? Curuangah hinah nan um lo ding: khawpi ihsin ka lo hlonhlo hai ding. 8Nan ṭih bikmi cu ralnam a si maw? Nanmah do dingah ralnam thawn ral pawl ka rak hruai ding. 9Khawpi sungin ka lo dawi ding ih ramdangmi pawl ih kutah ka lo thlenter ding. Thi dingah nan thu ka relcat zo ih, 10nan ramsungih raldonak ah nan thi ding. Cule mi hmuahhmuah in Bawipa ka si kha in thei ding. 11Beel in beel sung sa a hum vek cun hi khawpi in a lo hum lo ding. Israel ramsung khuitawkih nan um khalle ka lo hrem thotho ding. 12Keimah cu Bawipa ka si kha in thei ding; nan kiangkap miphun pawl ih daan nan thlun naón keimah ih daan sawn cu nan balsiat ih ka thupekmi pawl cu nan el a si,” tiah a ti.

13Profet ṭong ih thu ka phuan rero laiah Pelatiah cu a tlu ih a thi. Bokkhup in leilungah ka bok ih ringzet in, “Maw Cungnungbik Bawipa! Israel ramih a taangmi hmuahhmuah thah ṭheh na tum maw si?” tiah ka au.

Saltaang Pawl Hnenah Pathian Thukamnak

14 Bawipa in ka hnenah, 15“Milaipa, Jerusalem khawsungih a ummi pawl in saltaannak ih a ummi nangmah le na unau Israel mi pawl ih thu cu an rel celcel a si. ‘Saltaang pawl cu Pathian bia thei dingah an hla tuk. Hiram cu kan ta si dingah Pathian in in pe zo a si,’ tiah an ti.

16“Na saltaanpi pawl cu ka ṭongmi hi sim aw. Lamhlapi miphun lakih um dingah a kuattu le ram dangdang ih a ṭhekdarhtu cu keimah sokhaw ka si. Sikhalsehla tikcu tawite sung cu an fehnak ramah anmah hnenah ka um ding.

17“Curuangah keimah Cungnungbik Bawipa ih ka ṭongmi hi sim aw. Ka ṭhekdarhnak ram pawl ihsin ka finkhawm sal ding ih Israel ram cu an kut ah ka pe sal ding. 18An kirsal tikah cun thil fihnungza le a borhhlawh mi milem pawl cu an hlon ṭheh ding a si. 19Thinlung le ruahnak thar ka pe ding. Lungto vekih a hakmi an thinlung cu ka hlon hlo ding ih thinlung neem ka pe ding. 20Cuticun ka daan pawl cu an thlun ding ih ka thupekmi pawl cu felzetin an tuah ding. Anmah cu ka minung an si ding ih keimah hi an Pathian ka si ding. 21Sikhalsehla fihnungza le a borhhlawh mi milem pawl biak a duhtu pawl cu ka hrem ding. An tuahmi ruangah ka hrem ding,” a ti. Cungnungbik Bawipa in a sim zo.

Pathian Sunlawinak In Jerusalem A Tlansan

22Cule ramsa nung cherubim pawl cu an zam ih lengke pawl khal an tel ve. Israel Pathian ih umpinak a tle zukzomi cu an tlunah a um. 23Cule a tle zukzomi cu Jerusalem khawlipi ihsin a suak ih nisuahnak lam tlangpar ah a ṭhawn. 24Cutiih langnak ka hmuhmi ahcun Pathian thlarau in i cawi ih Babilon ram saltaang pawl lakah i ret sal. Cule langnak cu a hlo ih, 25Bawipa ih i hmuhmi hmuahhmuah cu saltaang pawl hnenah ka sim ṭheh.

Currently Selected:

EZEKIEL 11: FCL

Highlight

Copy

Compare