SUAHLANNAK 36

1“Bezalel, Oholiab le Bawipa in zungthiamnak le thilti theinak a pek mi pawl cun Bawipa ih inn hrangih a ṭul mi hmuahhmuah sak dingah a theitu pawl an si ruangah Bawipa ih thupekmi vek cekci in an tuah thluh pei,” tiah a ti.

Israel Mi In Laksawng Tampi An Pek

2 Bawipa in zungthiamnak a pek zomi pawl Bezalel, Oholiab le a dang zungthiam pawl le hnaṭuan bawm duhtu pawl cu Moses in a ko ih hnaṭuan thok dingin a fial. 3Israel pawl in Puanthlam thianghlim saknak dingih thawhlawm an pekmi thilri hmuahhmuah cu an hnenah Moses in a pek ṭheh. Cuih tlunah Israel pawl cun zingtinte in an thawhlawm cu Moses hnenah an rak keng. 4Cutikah Puanthlam thianghlim sak hna a phunphun a ṭuantu zungthiam pawl cu an hnaṭuanmi taanta in an ra ih, 5Moses hnenah, “Bawipa in ṭuan ding in fialmi pawl hrangih thilri a ṭulmi hnakih tam deuh an pe zo a si,” tiah an sim.

6Curuangah Moses in misenpi hnenah thu a than ih, “Nunau siseh mipa siseh, Puanthlam thianghlim saknak dingah zohman in thawhlawm nan pe nawn lo pei,” tiah a ti. Cuih hnu cun Israel pawl in zianghman an rak keng nawn lo. 7An rak ken ciami cu an tuah ding hmuahhmuah an tuah ṭheh hmanah a cem dah lo ding.

Pathian Umnak Puanthlam An Sak

(Suah 26.1-37)

8Hnaṭuantu pawl lakih zungthiam bik pawl in Pathian umnak Puanthlam cu an sak. Puanṭha mankhung mepian, sendup le a senmi puan, cherub timi ramsa lem pawl cuangin coihcinmawi ṭelhmi puan zuun hra in an sak. 9Puan pawl cu a saulam kaih 14 le a kauhlam kaih 2 ciar an si. 10Zuun nga cu an peh ih, a dang zuun nga khal an peh. 11Cutiih pehmi puan tlunta bikih zim veve-ah mepian puan in a beu pawl an tuah. 12Puan pehmi pakhatnak ah beu sawmnga an tuah ih, a pahnihnak puan pehmi khalah beu sawmnga an tuah ve. 13Thlam cu umnak pakhat ih cang dingah puan awh-nak suikual sawmnga in an tuah ih cumi in puan thuah hnih cu an peh.

14Cun Puanthlam khuhnakah mehmul in puan zuun hleikhat an tah. 15Zuun khatah kaih 15 a sau ih kaih 2 a kau. Puan cu an tia aw ṭheh. 16Puan zuun nga kha zuun khatah an peh ih, a dang zuun ruk khal an peh thotho. 17An pehmi pakhatnak puanzimah puanbeu sawmnga an tuah ih pahnihnak puanzim khalah puanbeu sawmnga thotho an tuah. 18Thlam pakhat ih cang dingin puan awh-nak darkual sawmnga an tuah ih, puan thap hnih cu cuih darkual cun an peh. 19Thlam khuhnak dingah a senih buhmi tuucang phaw le acuih parih khuh dingah saphaw ṭha an tuah.

20Puanthlam ih phar cu a tung zawng in an song ih lawithing in an tuah. 21Phar pawl cu tlep khatah dong hra a sau ih dong khat le hrek ciar a kau. 22Phar tlepkhat le tlepkhat pehkomnak ah a kap ciar kha an khuar. Phar a zatein cuticun an tuah thluh. 23Thlanglam phar hrangah tlep kul an tuah ih, 24phar tawdamah ngunih tuahmi tawdam sawmli an tuah. An khuarnak zawn ihsin a hun dotu-ah phar tlepkhat ah tawdam pahnih fingfing an ret. 25Saklam phar hrang khalah phar tlep kul an tuah ih, 26phar tlep khatah tawdam pahnih fingfing in ngun tawdam sawmli an tuah. 27Nitlaknak lam, thlam ih dunglam phar hrangah, phar tlep ruk le, 28thlam ih dunglam kil pahnih hrangah phar tlep hnih an tuah. 29Hi a kilih phar tlep hnih cu a tawdam ihsin a luzimih a ummi kual tiangin an peh-aw thluh. Phar kil pahnih ih phar tlep pahnih pawl cu a cutiih tuah thluhmi an si. 30Cuhrangah phar tlep riat an um ih tlepkhat ah tawdam pahnih ciar in ngun tawdam hleiruk an um.

31Cule lawithing in phartlang an tuah ih, saklam phar hrangah phartlang panga, 32thlanglam phar hrangah phartlang panga le nitlaknak lam thlam ih dunglam phar hrangah phartlang panga an tuah. 33Phar laifang zawnih an bunmi phartlang cu kil khat ihsin kil khat tiang a saumi a si. 34Phar siseh phartlang siseh, sui in an khuut ih phar parih an bunmi sui kual sungah phartlang pawl cu an hrolh.

35Puanzar cu mepian, sendup, a senmi tuuhmul le phiarmi puan mankhung, cherub timi ramsa lem pawl cuangin coihcinmawi ṭelhmi puan pawl in an tuah. 36Puanzar thlainak ah lawithing in ṭhuam pali an tuah ih cuih ṭhuam pawl cu sui in an khuut ih suikual pawl a parah an bun. Ṭhuam pawl dotu-ah ngun tawdam pali an tuah. 37Puanthlam sung luhnak puanzar cu mepian, sendup, a senmi tuuhmul le phiarmi puan mankhung coihcinmawi ṭelhmi puan in an tuah. 38Ṭhuam panga an tuah ih cuih parah a kual pawl an bun. Ṭhuam le a zim pawl cu sui in an khuut. Cuih ṭhuam pawl hrangah dar thawn tuahmi tawdam panga an tuah.

Currently Selected:

SUAHLANNAK 36: FCL

Highlight

Copy

Compare