SUAHLANNAK 37
37
Thukam Kuang An Tuah
(Suah 25.10-22)
1Bezalel in Thukam Kuang cu lawithing thawn a tuah ih dong hnih le hrek a sau, dong khat le hrek a kau ih dong khat le hrek a sang. 2A sunglam siseh a lenglam siseh sui hlir in a khuut ih a kimvel cu sui in a vel. 3Sui kual pali a tuah ih khatlamah pahnih veve in a ke pali ah a bun. 4Lawithing in zawnfung pali a tuah ih sui in a khuut. 5Thukam Kuang zawnfung cu khatlam kap veve ih suikual ahcun a hrolh. 6Thingkuang sin cu sui hlir in a tuah ih dong hnih le hrek a sau ih dong khat le hrek a kau. 7A sinih khatlam le khatlam zim veve ah cherub timi ramsa lem pahnih sui in a tuah ih, 8zim khatah pakhat veve a ret. A dangte in si loin a sin thawn an peh-aw thluh. 9Cherub timi ramsa lem pawl cu a tlunah an thla an pharh ih kuangsin cu an thla in an phen. Hmai hoih-aw in kuangsin cu an zoh veve.
Hunmi Sang Hrangah Cabuai A Tuah
(Suah 25.23-30)
10Bezalel in lawithing thawn cabuai a tuah ih dong hnih a sau, dong khat a kau ih dong khat le hrek a sang. 11Sui hlir in a khuut ih a kimvel cu sui in a khap. 12A tlangkap cu zung li kau in a tuah ih a kimvel cu sui thotho in a khap. 13Sui kual pali a tuah ih a ke kiang cabuai kiil li ah a bun. 14Cuih sui kual pali cu cabuai zawnfung a kaitu an si hrangah cabuai tlangkap ri zawn ah a bun. 15Zawnfung pawl cu lawithing in a tuah ih sui in a khuut. 16Cabuai parih inmi thawinak hrangah pakan pawl, hai pawl, khuat le kheng pawl cu sui hlir in an tuah ṭheh.
Meivannak Fung A Tuah
(Suah 25.31-40)
17Bezalel in meivannak fung cu sui hlir in a tuah. A tawdam le a fung cu ṭhazet ih sermi sui in a tuah. A mawitertu pangpar, a mum le a parh pawl tla cu a fung thawn an peh-aw thluh. 18A fung ihsin a ṭeek paruk a suak ih kap khatah ṭeek thum veve an um. 19A ṭeek ih kipah almon pangpar bangtuk in a mum le a parh thawn a mawitertu pangpar pathum ciar an um. 20Meivannak fungah almon pangpar bangtuk in a mum le a parh thawn a mawitertu pangpar pali an um. 21A ṭeek khuahkhat hnuai ah pangpar mum pakhat fingfing a um. 22Pangpar mum pawl le a ṭeek pawl cu meivannak fung thawn an peh-aw ṭheh; sermi sui pakhat in tuahmi a si. 23Meivannak fung pakhat parah meivanmi pasarih a tuah ih caiceh le darkheng pawl cu sui hlir in a tuah. 24Meivannak fung le a thilri hmuahhmuah tuahnak ah sui pawng zakhat a hmang.
Rimthaw Urnak Biakṭheng
(Suah 30.1-5)
25Lawithing thawn rimthaw urnak hrangah biakṭheng a don. A tung le a vang a can aw ih dong khat sau le kau a si. A saanlam cu dong hnih a sang. A parih a bunmi thingzum pawl cu biakṭheng thawn an peh-aw thluh. 26A par siseh a parih thingzum bunmi pawl le a kap pali tla siseh, sui hlir in a khuut ṭheh ih a kimvel cu sui in a khap. 27Suikual pahnih a tuah ih cuih biakṭheng putnak zawnfung pawl hrolhnak hrangah a tlangzim ih hnuai kap hnih ah acuih suikual pawl cu a bun. 28Zawnfung pawl cu lawithing in a tuah ih sui in a khuut ṭheh.
Hriak Le Rimhmui A Tuah
(Suah 30.22-38)
29A thianghlimmi hriak culhnak hrangah siti le zihmui tuahtu pawl ih an tuah ṭheu vekin a hmuizetmi zihmui a tuah.
Currently Selected:
SUAHLANNAK 37: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
