SUAHLANNAK 35

Sabbath Ulh Ding Daan Pawl

1Moses in Israel mi hmuahhmuah cu hmun khatah a khawm ṭheh ih an hnenah, “Bawipa ih thupekmi nan tuah ding pawl cu hi bangtuk in a si pei: 2Niruk sung hna nan ṭuan pei; asinain ni sarih ni cu nan hrangah ni thianghlim a si ih, ni sunglawi, nan hnaṭuannak ihsin nan colh ni, Bawipa ih hrangah thianhlimtermi ni a si pei. Cuih ni-ah zozo khal hna a ṭuan asile thah a si pei. 3Hi sabbath ni-ah nan umnak pohpoh ah meisa nan muah lo pei,” tiah a sim.

Pathian Puanthlam Hrang Pekmi

(Suah 25.1-9)

4Moses in Israel mi hnenah, “Bawipa ih thupekmi bangtuk in, 5Bawipa ih hnenah thawhlawm nan pek pei. Thawhlawm pek a duhtu hmuahhmuah in, sui, ngun, dar; 6mepian, sen-uai, a senmi tuuhmul, puan mankhung, mehmul ih tahmi hnipuan, 7tuucang phaw a senih buhmi, saphaw ṭha le lawithing, 8meivannak siti, hriak culhnak ding le zihmui rimthaw dingah zihmui a phunphun, 9lungmankhung sen le Puithiam Sang ih hruk ding ṭaangben hrang le angki thianghlim sunghruk parih ben dingah lungmankhung pawl nan pe pei,” tiah a ti.

Puanthlam Hrangih Thilri

(Suah 39.32-43)

10“Nanmah lakih zungthiam hmuahhmuah in Bawipa ih fialmi thilri hmuahhmuah cu nan tuah pei: 11Pathian umnak inn hrangah puanthlam le a tlun khuh, phar pawl le puan awk-nak kual pawl, phartlang, ṭhuam le a tawdam pawl, 12Thukham Kuang le a putnak zawnfung pawl, kuangsin le kuang phentu puanzar pawl, 13cabuai, cabuai zawnfung pawl le a thilri pawl, Pathian hnenih pek ding sang, 14meivannak fung le a thilri pawl, mei-inn le mei-inn hrang siti, 15zihmui rimthaw ur-nak hrangih biakṭheng le biakṭheng zawnfung pawl, culh ding hriak, zihmui rimthaw, puanthlam luhnak sangka puanzar, 16mei-ur thawinak pek ding biakṭheng le biakṭheng parih dammi dar khohriik, biakṭheng zawnfung pawl le a thilri pawl, kut kholhnak kheng le a tawdam, 17Puanthlam kulhnak puanzar le a ṭhuam pawl le a tawdam pawl, kotka puanzar, 18Puanthlam le a kulhnak hrangah thil bannak le a hri pawl, 19hmun thianghlim sungih puithiam pawl ih hmanmi hnipuan sunglawi le mankhungmi - puithiam Aaron le a fapa pawl ih puithiam hna an ṭuan tikah an hruh dingmi hnipuan thianghlim pawl cu an tuah pei,” tiah Moses in a ti.

Israel Mi Pawl In Thawhlawm An Pek

20Cuih hnuah Moses hnen ihsin Israel pawl cu an umnak ciarah an tlung. 21Puithiam hnipuan thianghlim tuahnak hrang, Bawipa ih Puanthlam saknak hrang le thlam sung hnaṭuannak hrangih a ṭulmi hmuahhmuah pawl cu pek a duhtu pawl le a lung a thotu pawl in Bawipa ih hnenah thawhlawm an pek. 22Nunau siseh mipa siseh an ra ih thil mawiternak ih benmi a phunphun le hnakhai, zunghruk, ṭhi le sui ih tuahmi thilri pawl cu siang zetin an pek. Mi hmuahhmuah in Bawipa ih hnenah pek dingih an ruahmi thawhlawm, sui ih tuahmi thilri pawl tla cu Bawipa ih hnenah an rak keng ih an pek. 23Mepian, sendup le a senmi tuuhmul siseh, mehmulih tahmi hnipuan le a senih buhmi tuucang phaw le saphaw ṭha zet pawl siseh, a neitu in Bawipa ih hnenah an pek. 24Ngun siseh, dar siseh a pe theitu pawl in Bawipa ih hnenah an pek ih, lawithing a neitu pawl in inn saknak ah an pek. 25Cun nunau zungṭha pawl in pat an hnuk ih mepian, sen-uai le a senmi tuuhmul puan le patih tahmi hnipuan mankhung an tuah ih Bawipa ih hnenah an pek. 26Nunau zungṭha pawl in mehmul tla pat ah an hnuk. 27An hruaitu pawl in a thianghlimmi sunghruk angki le ṭaangben parih ben dingah lungmankhung sen an pek ih, 28mei-inn van ding siti, culh ding hriak le zihmui rimthaw ur ding hrangah siti le zihmui tla an pek. 29Israel mi hmuahhmuah in nunau siseh mipa siseh, Moses hnen ihsin Bawipa ih thupek an theih bangtuk in a hnaṭuannak hrangah an pek duhmi thawhlawm cu Bawipa ih hnenah an pe ciamco.

Puanthlam Hrang Zungthiam Hnaṭuantu Pawl

(Suah 31.1-11)

30Moses in Israel pawl hnenah, “Judah phun sung ihsin Hur ih tupa Bezalel, Uri ih fapa cu Bawipa in a hril zo. 31Bawipa in Bezalel cu a thlarau in a khahter ih zungthiamnak, thil tuahtheinak le kutzung thiamnak ih tuah thei dingmi theihtheinak a nei ih, 32pungsan a phunphun suai theinak le sui, ngun le dar in cuih pawl tuah theinak tla a nei; 33lungmankhung taat thiamnak, zanthing in zuk tuahthiamnak le kutzung thiamnak a phunphun a nei a si. 34Bezalel cu Dan hrin sung ihsin Ahisamak ih fapa Oholiab hnenah an kutzung thiam pawl cu midang zirh thiamnak khal Bawipa in a pek a si. 35Lungto parih lungkher thiam pawl le thing parih cangan le zuksuai thiam pawl, pungsan suai thiam pawl le mepian, sendup le a sen ih tah thiam pawl, puan parih ṭelh thiam pawl ih thiamnak bangtuk in Pathian in Bezalel le Oholiab hnenah thiamnak nasa zetin a pek hai. Hnaṭuan a phunphun an thiam ih pungsan a phunphun an suai thiam a si.

Currently Selected:

SUAHLANNAK 35: FCL

Highlight

Copy

Compare