SUAHLANNAK 30

Zihmui Rimthaw Urnak Biakṭheng

(Suah 37.25-28)

1“Zihmui rimthaw urnak ah lawithing in biakṭheng nan don pei. 2Dong khat sau, dong khat kau, a tung a vang a can-aw ih dong hnih saangmi a si pei. Thingzum nan bunmi pawl cu biakṭheng thawn an peh-aw thluh pei. 3A par le a kil pali le thingzum bunmi pawl cu sui in nan khuut thluh pei ih a kimvel cu sui in nan khap pei. 4A putnak zawnfung pawl kaitu-ah suikual pahnih nan tuah pei ih a zim hnuai, a siirlam pahnih ah nan bun pei. 5Hi zawnfung pawl cu lawithing in nan tuah pei ih sui in nan khuut pei. 6Sin a neimi Thukam Kuang hmaiih a thlai awmi puanzaarih hmaiah biakṭheng cu nan ret pei. Cutawkah ka lo tong hai ding a si. 7Aaron in meivanmi a zoh tikah acuih biakṭheng parah zingtinte in zihmui rimthaw a ur pei. 8Zanlam ih meivanmi a thleng tik khalah zihmui rimthaw cu a ur pei. Hi zihmui rimthaw nan pekmi cu sankhat hnu sankhat cat loin nan tuah ringring pei. 9Hi biakṭheng parah thlenter lo dingih khammi zihmui siseh, mei-ur thawinakih hmanmi ṭilva le thawinakih hmanmi rawl tla siseh, nan ret lo pei ih inmi-thawinakih hmanmi tidai khal nan burh lo pei. 10Kum khatah voikhat, Aaron in thingzum bunmi pawl ih parah sual ngaidamnak hrangah thawinakih hmanmi sathi thawn acuih biakṭheng cu a thianghlimter pei. Himi khal hi sankhat hnu sankhat tuah ringring a si pei. Bawipa hnenih pekmi a thianghlim zetmi biakṭheng a si ding,” tiah a ti.

Bawipa Ih Umnak Puanthlam Hrang Ngunkhuai

11 Bawipa in Moses hnenah, 12“Israel mi pawl mipum nan siar tikah Bawipa hnenah mi hmuahhmuah in an nunnak tlennak man an pek ciar pei; ziangahtile mipum siar laiah an hnenih siatsuahnak a thlen lonak dingah a si. 13Mipum siarnak cazin sungih a telmi hmuahhmuah in hmunthiang cuaithlainak ih an khiahmi zat in an pek ciar pei. Himi cu Bawipa hnenih thawinak a si bangtuk in mikip in an pek thluh pei. 14Kum kul le a tlunlam mi hmuahhmuah in mipum siarnak cazin sungih telhcih an si hrangah hi paisa cu Bawipa ih hnenah an pek ciar pei. 15Nan nunnak man Bawipa hnenih nan pek tikah milian le mifarah thleidannak um loin bangrep te in nan pek pei. 16Israel mi hnen in hi paisa cu nan khong pei ih Keimah umnak Puanthlam sungih hnaṭuannak ah nan hmang pei. Bawipa in Israel mi pawl cu a ciin ringringnak dingah le nan nunnak hrangih pekmi-ah hi paisa cu a si ding,” tiah a ti.

Kutke Kholhnak Darkheng

17 Bawipa in Moses hnenah, 18“Kutke kholhnakah kheng pakhat dar in nan tuah pei ih a tawdam khal dar in nan tuah pei. Pumkhawmnak thlam le mei-ur thawinak biakṭheng karlakah acuih darkheng cu nan ret pei ih a sungah tidai nan ret pei. 19Aaron le a fapa pawl in an kut le an ke kholhnakah cuih tidai cu an hmang pei. 20Bawipa hnenih mei-ur thawinak pek dingah pumkhawmnak thlam sungih an luh tik le puithiam hnaṭuan in biakṭheng an naih tikah hi tidai thawn an kholh-aw a si ahcun an thi lo ding a si. 21An thih lonak dingah an kut le an ke pawl cu an kholh tengteng pei. Himi cu anmah le an tesinfa pawl tiangin a kumkhua-in an thlun ringring dingmi daan a si,” tiah a ti.

Culhnak Sahriak Le Zihmui Rimthaw

22 Bawipa in Moses hnenah, 23“Zihmui phun ṭha bik pawl: cingthling pawng kul, a rimhmuimi sinnamon thing thling pawng hra, a rim thawmi futi pawng hra, 24lawi thingthling pawng kul, (biakinn cuai khainakih khaimi fekfek) le olif hriak khuat nga nan lak pei. 25Himi pawl cu zihmui rawithiamtu ih rawimi bangin nan rawi pei ih culhnak ding hriakah nan hmang pei. Cumi cu a thianghlimmi culhnak ding hriak a si pei. 26Hi hriak in Keimah umnak Puanthlam, thukam kuang, 27sang retnak cabuai le a thilri pawl, meisa vannak fung le a thilri pawl, zihmui rimthaw urnak biakṭheng, 28mei-ur thawinak biakṭheng le a thilri hmuahhmuah le kut kholhnak kheng le a tawdam pawl cu nan culh ṭheh pei. 29Cubangtuk in thlam sungih thilri pawl cu Pathian hrangah nan thianghlimter pei ih a thianghlim ngaingaimi thil zarh ah an cang ding. Himi thilri pawl a daitu hmuahhmuah cu an thianghlim ve ding ih a zarhmi-ah an cang ve ding a si. 30Cun Aaron le a fapa pawl cu hriak nan culh pei ih ka hrangih puithiam an ṭuan theinak dingah nan thianghlimter pei. 31Cule Israel mi pawl hnenah, ‘Hi culhnak ding hriak thiang cu nan hrangah sankhat hnu sankhat a thianghlimmi siti a si ding. 32Mi menmen parah nan burh lo pei ih hi hriak thiang bangtuk in rimthawmi zihmui le hriak rawi in nan hmang lo pei. A thianghlimmi hriak a si bangtuk in a thiangmi a si tiin nan ruat pei. 33Hi hriak bangtuk tuah a cawngtu le puithiam siar lo midang parih a hmangtu pohpoh cu a miphun sung ihsin hlon a si pei,’ tiin sim aw,” tiah a ti.

Zihmui Rimthaw

34 Bawipa in Moses hnenah, “Zihmui rimthaw a phunphun: stakte, onikha, galbanum le a citmi frankinsens zihmui pawl ihsin a zatrep ciar in la aw. 35Cupawl cu zihmui tuah thiamtu pawl ih an tuah vekin feltein rawi awla zihmui rimthaw-ah tuah aw. Cumi cu ci thawn rawi awla thiangfai ding le thianghlim dingah alter aw. 36A hrek cu a vut ṭhazet ih cang dingin deng awla, a hrek cu ka lo tonnak ding hmun, Puanthlam sungih Thukam Kuang hmaiah thawinakah nan hmang pei. Hi zihmui rimthaw cu a thianghlim zetmi-ah nan ruat pei. 37A cuih zihmui rimthaw bangtuk in nanmah hrangah tuah tahratin nan hmang lo pei. Hi zihmui rimthaw cu Bawipa hnenih pek ciami thil thianghlim a si kha nan thei pei. 38Mi pakhatkhat in acuih zihmui rimthaw bangtuk a tuah ih a hmang a si ahcun a miphun sung ihsin hlon tengteng a si pei,” tiah a ti.

Currently Selected:

SUAHLANNAK 30: FCL

Highlight

Copy

Compare